ແຂວງອຸດົມໄຊ ມີທ່າແຮງ ຫຼາຍດ້ານ ໃນການພັດທະນາ ເສດຖະກິດ-ສັງຄົມ

ການພັດທະນາ ເສດຖະກິດ-ສັງຄົມຂອງແຂວງ ອຸດົມໄຊ ໃນໄລຍະຜ່ານມາ ເຫັນວ່າ ມີການຂະຫຍາຍຕົວຢ່າງຕໍ່ເນື່ອງ ແຕ່ເມື່ອທຽບໃສ່ທິດທາງ ແຜນການອັນລວມ ຂອງແຂວງ ແລະ ຄວາມຮຽກຮ້ອງຕ້ອງການ ຂອງສັງຄົມແລ້ວ ແມ່ນຍັງບໍ່ທັນໄດ້ຕາມລະດັບຄາດຫມາຍ ເນື່ອງຈາກຍັງມີຂໍ້ຫຍຸ້ງຍາກບາງດ້ານ ທີ່ເປັນສາເຫດໃນການກົດໜ່ວງ ທ່ວງດຶງ ໃນການພັດທະນາ ເສດຖະກິດ-ສັງຄົມ ຂອງແຂວງ

ທ່ານ ປອ ຄໍາພັນ ເຜີຍຍະວົງ ເຈົ້າແຂວງອຸດົມໄຊ ມີຄໍາເຫັນ ໃນໂອກາດທີ່ລົງເຄື່ອນໄຫວພົບປະຢ້ຽມຢາມ ແລະ ໂອ້ລົມພະນັກງານຫຼັກແຫຼ່ງ ທົ່ວເມືອງໄຊ ວ່າ ການຂະຫຍາຍຕົວທາງດ້ານເສດຖະກິດ ສັງຄົມຂອງແຂວງອຸດົມໄຊ ມາຮອດປັດຈຸບັນ ເຫັນວ່າ ຍັງບໍ່ທັນໄດ້ຕາມກຳນົດຄາດຫມາຍ ເນື່ອງຈາກຍັງມີຂໍ້ຫຍຸ້ງຍາກຫຼາຍດ້ານ ເປັນຕົ້ນແມ່ນບັນຫາໜີ້ສິນ, ໄພພິບັດ ທາງທຳມະຊາດ, ບັນຫາພື້ນຖານໂຄງລ່າງຕ່າງໆ ແຕ່ເຖິງຢ່າງໃດກໍຕາມ ຖ້າແຂວງເຮົາຫາກຮູ້ຫມູນໃຊ້ບັນດາທ່າແຮງ, ທີ່ຕັ້ງ ແລະ ບັນດາເງື່ອນໄຂທີ່ອຳນວຍຄວາມສະດວກ ຂອງຕົນແລ້ວ ອາດຈະເຮັດໃຫ້ແຂວງອຸດົມໄຊ ໄດ້ຮັບການພັດທະນາຢ່າງກະໂດດຂັ້ນ ເຊັ່ນ ແຂວງອຸດົມໄຊ ເປັນແຂວງໃຈກາງທາງຜ່ານທາງພາກເໜືອ, ມີຊາຍແດນຕິດຈອດກັບ ຫຼາຍແຂວງ ແລະ ປະເທດ ສປຈີນ ສະດວກສະບາຍໃນການພັດທະນາ, ບ້ານເມືອງມີຄວາມສະຫງົບ ແລະ ເປັນລະບຽບຮຽບຮ້ອຍ, ປະຊາຊົນມີນຳໃຈເອື້ອເຟື້ອເພື່ອແຜ່, ມີນ້ຳໃຈຮັກຊາດ, ມີຄວາມສາມັກຄືເປັນຈິດໜຶ່ງໃຈດຽວກັນ, ມີມູນເຊື້ອດຸຫມັ່ນຂະຫຍັນພຽນ, ອົງອາດກ້າຫານ, ເປັນຈຸດທີ່ຫມັ້ນຂອງການນຳເຄື່ອນໄຫວການປະຕິວັດ. ເຊິ່ງເປັນເງື່ອນໄຂອັນສໍາຄັນໃນການພັດທະນາເສດຖະກິດຂອງແຂວງ ໃຫ້ມີບາດກ້າວຂະຫຍາຕົວ.

ທ່ານ ປອ ຄຳພັນ ເຜີຍຍະວົງ ເຈົ້າແຂວງອຸດົມໄຊ ກ່າວຕື່ມອີກວ່າ ນອກຈາກ ບັນດາທ່າແຮງບົ່ມຊ້ອນ ແລະ ເງື່ອນໄຂ ທີ່ອໍານວຍຄວາມສະດວກ ໃນການພັດທະນາເສດຖະກິດຂອງ ແຂວງອຸດົມໄຊ ໃຫ້ມີບາດກ້າວຂະຫຍາຍຕົວແລ້ວ ອີກບັນຫາໜຶ່ງທີ່ຂາດບໍ່ໄດ້ກໍຄືຄວາມສາມັກຄື ແລະ ຮ່ວມແຮງຮ່ວມໃຈກັນ ຈັດຕັ້ງປະຕິບັດ ຈິ່ງຈະເຮັດໃຫ້ວຽກງານດັ່ງກ່າວ ປະສົບຜົນສຳເລັດຕາມລະດັບຄາດຫມາຍທີ່ວາງໄວ້.

ດັ່ງນັ້ນ ທ່ານຈິ່ງໄດ້ຮຽກຮ້ອງໃຫ້ການນໍາ, ພະນັກງານລັດຖະກອນ ທຸກຂັ້ນ ຕະຫຼອດຮອດປະຊາຊົນ ຈົ່ງພ້ອມກັນເປັນຈິດໜຶ່ງໃຈດຽວກັນ ໃນການສ້າງສາ ແລະ ພັດທະນາແຂວງອຸດົມໄຊ ໃຫ້ມີບາດກ້າວຂະຫຍາຍຕົວຢ່າງຕໍ່ເນື່ອງ.

ຂ່າວ: ຄານມະນີ ຮຽນດໍຈັນ