ກຳມະບານ ຮາກຖານ ຫ້ອງວ່າການແຂວງ ອຸດົມໄຊ ດໍາເນີນ ກອງປະຊຸມໃຫຍ່ ຄັ້ງທີ 4

   ກອງປະຊຸມໃຫຍ່ຄັ້ງທີ 4 ຂອງກໍາມະບານຮາກຖານ ຫ້ອງວ່າການແຂວງ ອຸດົມໄຊ ຈັດຂຶ້ນໃນຕອນແລງ ວັນທີ 17 ພຶດສະພາ 2018 ຢູ່ທີ່ຫ້ອງປະຊຸມຂອງຫ້ອງວ່າການແຂວງ ໂດຍການເປັນປະທານຂອງ ທ່ານ ອ່ອນຄຳ ສີສົມບູນ ປະທານ ກຳມະບານຮາກຖານ ຫ້ອງວ່າການແຂວງ, ມີທ່ານ ໄຊພອນ ຖົມປະດິດ ປະທານສະຫະພັນກຳມະ ບານແຂວງ, ທ່ານ ວັນນາ ແກ້ວສັນຕິ ຫົວໜ້າຫ້ອງວ່າການແຂວງ, ມີບັນດາຕາງໜ້າກຳມະບານຮາກຖານ, ໜ່ວຍອ້ອມຂ້າງ ແລະ ສະມາຊິກກໍາມະບານພາຍໃນຫ້ອງວ່າ ການແຂວງຂົ້າຮ່ວມ.

 ການດໍາເນີນກອງປະຊຸມ ໃນຄັ້ງນີ້ ກໍເພື່ອສະຫຼຸບຕີລາຄາຄືນ ຜົນການເຄື່ອນໄຫວ ຈັດຕັ້ງປະຕິບັດວຽກງານ ກຳມະບານຂອງຕົນ ໃນໄລຍະຜ່ານມາ ໃນນັ້ນ ໄດ້ຍົກໃຫ້ເຫັນເຖິງຜົນງານດ້ານດີ, ດ້ານອ່ອນຂໍ້ຄົງຄ້າງ, ບົດຮຽນທີ່ຖອດຖອນໄດ້ ລວມທັງທິດທາງແຜນການ ທີ່ຈະສືບຕໍ່ເຄື່ອນໄຫວໃນຕໍ່ໜ້າ. ຕໍ່ກັບຜົນງານທີ່ກຳມະບານຮາກຖານ ຫ້ອງວ່າການແຂວງ ອຸດົມໄຊ ຍາດມາໄດ້ນັ້ນ ມັນສະແດງອອກຄື ສະມາຊິກກໍາມະບານ ຈຳນວນ 32 ສະຫາຍ, ຍິງ 11 ສະຫາຍ ໄດ້ຮັບໃບຍ້ອງຍໍ ຈາກສູນກາງສະຫະພັນ ກໍາມະບານລາວ ເຊິ່ງໃຫ້ກຽດມອບໂດຍທ່ານ ໄຊພອນ ຖົມປະດິດ ປະທານສະຫະພັນກຳມະບານ ແຂວງ,  ເພື່ອປະຕິບັດຕາມລະບຽບ ລັກການຂອງສຸູນກາງສະຫະພັນກຳມະບານ ວາງອອກນັ້ນ ທາງຄະນະກໍາມະບານຮາກຖານຊຸດເກົ່າ ໄດ້ຂຶ້ນກ່າວອໍາລາໜ້າທີ່ ພ້ອມທັງມີການປ່ອນບັດຄັດເລືອກເອົາຄະນະ ຊຸດໃຫມ່ ເຊິ່ງມີຜູ້ສະຫມັກທັງໝົດ 7 ສະຫາຍ ໃນນັ້ນ ໄດ້ເລືອກເອົາ 5 ສະຫາຍ.  ເພື່ອສືບຕໍ່ຊີ້ນໍາ ນໍາພາສະມາຊິກກໍາມະບານຂອງຕົນ ເຄື່ອນໄຫວຕາມທິດທາງລວມ ກໍຄືທິດທາງແຜນການທີຕົນເອງ ໄດ້ກໍານົດໄວ້.

ໂອກາດດ່ັງກ່າວ ທ່ານ ໄຊພອນ ຖົມປະດິດ ປະທານສະຫະພັນກໍາມະບານແຂວງ ໄດ້ມີຄຳເຫັນຕໍ່ກອງປະຊຸມ ເຊິ່ງໄດ້ຍ້ອງຍໍຊົມເຊີຍຕໍ່ກັບຜົນງານທີ ກຳມະບານຮາກຖານ ຫ້ອງວ່າການຍາດມາໄດ້ ພ້ອມທັງເນັ້ນຫນັກ ໃຫ້ຄະນະຮາກຖານຊຸດໃຫມ່ ລວມທັງສະມາຊິກ ຈົ່ງພ້ອມກັນສືບຕໍ່ສ້າງຜົນງານ ໂດຍອີງໃສ່ ທິດທາງແຜນການ, ພາລະບົດ ບາດ, ສິດ ແລະ ໜ້າທີ່ຂອງຕົນ.