2 ປີເຄິ່ງ ເສດຖະກິດ ແຂວງ ອຸດົມໄຊ ຂະຫຍາຍຕົວ ຢ່າງຕໍ່ເນື່ອງ

ໃນຕະຫຼອດໄລຍະ 2 ປີເຄິ່ງ ການຈັດຕັ້ງປະຕິບັດແຜນພັດທະນາເສດຖະກິດ ສັງຄົມສະໄຫມທີ 8 ຂອງແຂວງ ອຸດົມໄຊ ເຫັນວ່າ ມີສະຖຽນລະພາບທາງດ້ານການເມືອງ, ມີຄວາມສະຫງົບ, ເປັນລະບຽບຮຽບຮ້ອຍທາງສັງຄົມຢ່າງໜັກແໜ້ນ, ມີການເຊື່ອມໂຍງ ກັບບັນດາແຂວງ ແລະ ປະເທດໃກ້ຄຽງຫຼາຍຂຶ້ນ,ໄດ້ກາຍເປັນປັດໃຈພື້ນຖານທີ່ອຳນວຍຄວາມສະດວກ ໃຫ້ແກ່ການພັດທະນາເສດ ຖະກິດ ສັງຄົມ, ການດຳເນີນທຸລະກິດ ການລົງທຶນ, ການຜະລິດ, ການບໍລິການ, ຄວາມບຸກບືນສ້າງຜົນງານຂອງ ບັນດາສະມາຊິກ ພັກພະນັກງານ ແລະ ຄວາມກະຕືລືລົ້ນຂອງປະຊາຊົນທຸກຊັ້ນຄົນ ເພື່ອສ້າງຜົນງານຂຳນັບຮັບຕ້ອນວັນບຸນສຳ ຄັນຕ່າງໆ ຂອງຊາດ ຂອງແຂວງ, ລວມທັງສຳເລັດການເປີດປີທ່ອງທ່ຽວລາວໃນຕົ້ນປີ 2018 ແລະ ວັນບຸນສໍາຄັນທາງປະຫວັດສາດ ຂອງຊາດ ເຊິ່ງກາຍ ເປັນທ່າແຮງຊຸກດັນໃຫ້ແກ່ການຈັດຕັ້ງປະຕິບັດແຜນພັດທະນາເສດຖະກິດ ສັງຄົມ ຂອງແຂວງສຳເລັດຜົນເປັນກ້າວໆມາ.

ບັນດາເງື່ອນໄຂທັງຫມົດນັ້ນມັນໄດ້ສົ່ງຜົນເຮັດໃຫ້ເສດຖະກິດຂອງແຂວງເຕີບໂຕຢ່າງຕໍ່ເນື່ອງ ເຊິ່ງສະແດງອອກຄືອັດຕາການ ຂະຫຍາຍຕົວຂອງຕົວເລກລວມຍອດພະລິດຕະພັນພາຍໃນ ຫຼື GDP ເພີ່ມຂຶ້ນ 7,60% ໃນປີ 2017 ຕາມແຜນ5 ປີແມ່ນ 8,5% ໃນນັ້ນ ຂະແໜງກະສິກໍາ ປ່າໄມ້ ຂະຫຍາຍ ຕົວ 7,17%, ອຸດສາຫະກຳ 4,95%, ການບໍລິການ 14,82% ແລະ ອາກອນຜະລິດຕະພັນ ຂະຫຍາຍ ຕົວ 8,91%. ສາເຫດທີ່ເຮັດໃຫ້ເສດຖະຖິດ ຂະຫຍາຍຕົວ ແມ່ນຍ້ອນພັກ – ລັດໄດ້ມີກົນໄກ ແລະ ມາດຕະການຄຸ້ມຄອງ ຢ່າງຮັດກຸມ. ຕະຫຼອດໄລຍະຂອງການຈັດຕັ້ງປະຕິບັດວຽກງານຕາມມະຕິກອງປະຊຸມໃຫຍ່ຄັ້ງທີ 8 ນີ້ ໃນສົກປີ 2015 – 2016 ເຫັນ ວ່າ ລວມຍອດຜະລິດຕະພັນພາຍໃນສາມາດຈັດຕັ້ງປະຕິບັດໄດ້ 3,500 ກວ່າຕື້ກີບ. ສະເລ່ຍຕໍ່ຫົວຄົນໄດ້ 1,397 ໂດລາສະຫະ ລັດ, ປີ 2017 ປະຕິບັດໄດ້ 3,690 ກວ່າຕື້ກີບ. ສະເລ່ຍໃສ່ຫົວຄົນໄດ້ 1,393 ກວ່າໂດລາສະຫະລັດ ແລະ ໃນ 6 ເດືອນຕົ້ນປີ 2018 ປະຕິບັດ ບັນລຸ 3,779 ກວ່າຕື້ກີບ ສະເລ່ຍໃສ່ຫົວຄົນໄດ້ 1,417 ໂດລາສະຫະລັດ. ຕາມແຜນການ 5 ປີ GDP ໃຫ້ບັນລຸ 4,770 ຕື້ກວ່າກີບ ສະເລ່ຍຕໍ່ຫົວຄົນໃຫ້ໄດ້ 1,750 ໂດລາສະຫະລັດ.

ໂດຍລວມແລ້ວ ເຫັນວ່າ ເສດຖະກິດ ຂອງແຂວງອຸດົມໄຊ ແມ່ນມີການຂະຫຍາຍຕົວໄປຕາມທິດທາງແຜນການ 5 ທີ່ວາງໄວ້.