ແຂວງອຸດົມໄຊ ເຜີຍແຜ່ ວຽກງານ ສົ່ງເສີມ ຄວາມກ້າວໜ້າ ຂອງແມ່ຍິງ ແລະ ແມ່ – ເດັກ

ກອງປະຊຸມ ເຜີຍແຜ່ເອກະສານ ວຽກງານສົ່ງເສີມຄວາມກ້າວໜ້າ ຂອງແມ່ຍິງ ແລະ ແມ່ – ເດັກ ໄດ້ຈັດຂຶ້ນໃນວັນທີ 25 ຕຸລາ 2018 ຢູ່ທີ່ຫ້ອງປະຊຸມຫ້ອງວ່າການແຂວງອຸດົມໄຊ ໂດຍການເປັນປະທານຂອງ ທ່ານ ຄຳພຽງ ຢາຈົງວາ ຮອງເລຂາພັກແຂວງ, ຮອງເຈົ້າແຂວງອຸດົມໄຊ, ປະທານຄະນະກຳມະທິການ ເພື່ອຄວາມກ້າວໜ້າຂອງແມ່ຍິງແຂວງ, ມີທ່ານ ນາງ ມະນີຈັນ ວິໄລຈິດ ກໍາມະການພັກແຂວງ, ປະທານສະ ຫະພັນແມ່ຍິງແຂວງ, ມີບັນດາປະທານສະຫະພັນແມ່ຍິງເມືອງ, ຄະນະກະມະທິການເພື່ອຄວາມກ້າວໜ້າຂັ້ນແຂວງ, ເມືອງ ແລະ ພາກສ່ວນກ່ຽວຂ້ອງອ້ອມຂ້າງແຂວງເຂົ້າຮ່ວມ.

ການດຳເນີນກອງປະຊຸມໃນຄັ້ງນີ້ ກໍເພື່ອເຮັດໃຫ້ແຕ່ລະພາກສ່ວນຮັບຮູ້ ແລະ ເຂົ້າໃຈແຈ້ງ ຕໍ່ກັບບັນດາເນື້ອນິຕິກຳ ຫຼື ເອກະສານຕ່າງໆທີ່ນຳມາເຜີຍແຜ່ ພ້ອມທັງນໍາໄປເຜີຍແຜ່ຕໍ່ຢູ່ຂົງເຂດຂອງຕົນຮັບຜິດຊອບ ແລະ ຈັດຕັ້ງປະຕິບັດໃຫ້ທົ່ວເຖິງ ເນື່ອງຈາກວ່າວຽກງານສົ່ງເສີມຄວາມກ້າວໜ້າຂອງແມ່ຍິງ ແລະ ແມ່ – ເດັກ ເປັນວຽກງານໜຶ່ງທີ່ສຳຄັນ ທັງເປັນປັດໃຈໜຶ່ງໃນການປະກອບສ່ວນພັດທະນາເສດຖະກິດ ສັງຄົມ ແລະ ຜົນປະໂຫຍດລວມຂອງຊາດ. ນອກນັ້ນ ຍັງເປັນການຍົກລະດັບ ການເຄື່ອນໄຫວຈັດຕັ້ງປະຕິບັດວຽກງານ ສົ່ງເສີມຄວາມກ້າວໜ້າຂອງແມ່ຍິງ ແລະ ແມ່- ເດັກ ໃຫ້ມີປະສິດ ທິພາບ,ໄປຕາມລະບຽບຫຼັກການ ແລະ ທິດທາງແຜນການທີ່ກຳນົດໄວ້.

ສໍາລັບເອກະສານຫຼືນິຕິກໍາທີ່ນໍາມາເຜີຍແຜ່ໃນຄັ້ງນີ້ປະກອບມີຫຼາຍເນື້ອໃນ ເປັນຕົ້ນແມ່ນ ດຳລັດຂອງທ່ານນາຍົກລັດຖະມົນຕີ ວ່າດ້ວຍການຈັດຕັ້ງ ແລະ ເຄື່ອນໄຫວຂອງຄະນະກຳມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ ແລະ ແມ່ – ເດັກ,ຂັ້ນແຂວງ,ເມືອງ ແລະ ບ້ານ,ຂໍ້ຕົກລົງວ່າດ້ວຍການແຕ່ງຕັ້ງຄະນະກຳມາທິການແຫ່ງຊາດ,ຂອງແຂວງ ອຸດົມໄຊ,ວ່າດ້ວຍການແບ່ງໜ້າທີ່ຄວາມຮັບຜິດຊອບຂອງຄະນະຂັ້ນສູນກາງ ແລະຂັ້ນແຂວງ. ນອກນັ້ນ ຍັງໄດ້ຮັບຟັງການສະຫຼຸບຕີລາຄາການເຄື່ອນໄຫວຈັດຕັ້ງປະ ຕິບັດວຽກງານສົ່ງເສີມຄວາມກ້າວໜ້າຂອງແມ່ຍິງ ແລະ ແມ່  – ເດັກໃນໄລຍະກາງສະ ໄຫມ ປີ 2016-2018 ພ້ອມທັງທິດທາງແຜນການ 2018-2020 ຂອງແຂວງອຸດົມໄຊ ຕື່ມອີກ.

ໂອກາດດັ່ງກ່າວ ບັນດາຜູ້ເຂົ້າຮ່ວມ ໄດ້ມີຄໍາຄິດ,ຄິດເຫັນຕໍ່ກັບບັນດານິຕິກໍາ ແລະ ບົດສະຫຼຸບ ທີ່ໄດ້ເຜີຍແຜ່ໃນກອງປະຊຸມຄັ້ງນີ້ ເພື່ອເປັນບ່ອນອີງໃຫ້ແກ່ການເຄື່ອນໄຫວຈັດຕັ້ງປະຕິບັດຕົວຈິງໃນຕໍ່ໜ້າ ໃຫ້ໄດ້ຮັບຜົນຕາມລະດັບຄາດຫມາຍ.