ອຸດົມໄຊ ປະກາດຮັບຮອງເອົາບ້ານດອນໄຊ ເປັນບ້ານພັດທະນາ

ພິທີປະກາດຮັບຮອງເອົາບ້ານດອນໄຊ ເປັນບ້ານພັດທະນາຮອບດ້ານ ໄດ້ຈັດຂຶ້ນໃນຕອນເຊົ້າວັນທີ 30 ຕຸລາ 2018 ຢູ່ທີ່ເດີ່ນໂຮງຮຽນມັດທະຍົມສົມບູນ ດອນໄຊ ໂດຍການເປັນປະທານຂອງທ່ານ ພອນສະຫວັນ ພັນທະວິຈິດ ຄະນະປະຈໍາພັກແຂວງ,ຫົວໜ້າພະແນກ ຖວທ ແຂວງ,ມີທ່ານ ຄຳແພງ ຂັນມະນີ ເຈົ້າເມືອງໆ ໄຊ,ມີບັນດາເລຂາພັກບ້ານ,ນາຍບ້ານ,ເຖົ້າແກ່ແນວໂຮມ,ແຂກເຊີນຈາກພະແນກການ,ຫ້ອງການ ຕະຫຼອດຮອດນັກຮຽນ ແລະ ປະຊາຊົນພາຍໃນບ້ານດັ່ງກ່າວເຂົ້າຮ່ວມ.

ບ້ານດອນໄຊ ເປັນບ້ານໃຫຍ່ໜຶ່ງທີ່ນອນຢູ່ໃນເທດສະບານເມືອງໄຊ ປະກອບມີ 12 ຊົນເຜົ່າ,ມີ830 ຫຼັງຄາເຮືອນ,841 ຄອບຄົວ,ມີພົນລະເມືອງທັງຫມົດ 3,839 ຄົນ, ຍິງ 2,047 ຄົນ, ສ່ວນຫຼາຍແມ່ນປະກອບອາຊີບພະນັກງານ, ຄ້າຂາຍ, ບໍລິການ,ທໍາການຜະລິດ,ລ້ຽງສັດນ້ອຍ ແລະ ອື່ນໆ ເຊິ່ງໃນໄລຍະຜ່ານມາທາງບ້ານດອນໄຊ ກໍໄດ້ເອົາໃຈໃສ່ໃນການຈັດຕັ້ງປະຕິບັດຕາມມະຕິ 03 ຂອງກົມການເມືອງສູນກາງພັກ ກ່ຽວກັບການສ້າງແຂວງເປັນຫົວໜ່ວຍຍຸດທະສາດ,ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ,ດຳລັດ 348 ວ່າດ້ວຍມາດຕະຖານພົ້ນທຸກ ແລະ ມາດຕະຖານພັດທະນາ ພ້ອມທັງປະຕິບັດຕາມ4 ເນື້ອໃນ ແລະ 4 ຄາດຫມາຍ ຢ່າງເອົາຈິງເອົາຈັງໂດຍຕະຫຼອດມາ. ຜ່ານການສຳຫຼວດຕີລາຄາ ແລະ ປະເມີນຜົນການຈັດຕັ້ງປະຕິບັດຕົວຈິງ ຂອງເມືອງ,ຂອງແຂວງ ມາຮອດປັດຈຸບັນເຫັນວ່າ ບ້ານດອນໄຊ ແມ່ນບັນລຸຕາມມາດຖານເງື່ນໄຂ ແລະ ລະດັບຄາດຫມາຍທີ່ໄດ້ກຳນົດໄວ້ ດັ່ງນັ້ນ ແຂວງອຸດົມໄຊ ຈຶ່ງອອກຂໍ້ຕົກລົງໃນການປະກາດຮັບຮອງເອົາບ້ານດອນໄຊ ເມືອງໄຊ ແຂວງອຸດົມໄຊ ເປັນບ້ານພັດທະນາຮອບດ້ານ ບ້ານທີ 28 ຂອງເມືອງໄຊ ແລະ ເປັນບ້ານທີ129 ຂອງແຂວງ. ເຊິ່ງໃຫ້ກຽດມອບໃບຢັ້ງຢືນ ບ້ານພັດທະນາດັ່ງກ່າວ ໂດຍທ່ານ ພອນສະຫວັນ ພັນທະວິຈິດ ຄະນະປະຈໍາພັກແຂວງ, ຫົວໜ້າພະແນກ ຖວທ ແຂວງແລະ ຮັບໂດຍ ທ່ານ ໄລທອງ ດຶງອຸດົມ ເລຂາພັກບ້ານ,ນາຍບ້ານດອນໄຊ.

ນອກນັ້ນ ໃນພິທີຍັງມີຫຼາຍກິດຈະກໍາ ໂດຍສະເພາະແມ່ນຂະບວນແຫ່ຂອງບ້ານ, ການສະຫຼຸບຕີລາຄາຜົນການເຄື່ອນໄຫວ ຈັດຕັ້ງປະຕິບັດວຽກງານ ໃນການສ້າງບ້ານພັດທະນາ,ການມອບໃບຊົມເຊີຍ,ໃບກຽດຕິຄຸນ ໃຫ້ແກ່ຜູ້ມີສ່ວນຮ່ວມ ແລະ ອຸປະຖຳຕ່າງໆ ລວມທັງການຕັດແທບຜ້າ,ປ່ອຍປຸມເປົ້າ ແລະ ລັ່ນຄ້ອງ ຂອງການນຳແຂວງ,ເມືອງ ແລະ ຜູ້ເຂົ້າຮ່ວມໃນພິທີ.