ຄະນະນຳຂັ້ນສູງແຂວງເຊີນລາ ສສ ຫວຽດນາມ ຢ້ຽມຢາມ ແລະ ເຮັດວຽກຢູ່ ແຂວງອຸດົມໄຊ

ວັນທີ 4 ພະຈິກ 2018 ຄະນະນໍາຂັ້ນສູງແຂວງເຊີນລາ ສສ ຫວຽດນາມ ນໍາໂດຍທ່ານ ຮວາງ ວັນເຈີດ ເລຂາພັກແຂວງ ປະທານສະພາປະຊາຊົນແຂວງເຊິນລາ ສສ ຫວຽດນາມ ພ້ອມຄະນະ ໄດ້ເດີນທາງມາຢ້ຽມຢາມ ແລະ ພົບປະກັບຄະນະນຳຂັ້ນສູງແຂວງອຸດົມໄຊ. ພິທີຕ້ອນຮັບ ໄດ້ຈັດຂຶ້ນທີ່ຫ້ອງວ່າການແຂວງ ໂດຍມີ ທ່ານ ປອ ຄຳພັນ ເຜີຍຍະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງອຸດົມໄຊ ພ້ອມດ້ວຍການນຳຂອງແຂວງ.
ຈາກນັ້ນ ຄະນະຜູ້ແທນທັງສອງຝ່າຍ ກໍໄດ້ເຂົ້າພົບປະຢ່າງເປັນທາງການຢູ່ທີ່ຫ້ອງປະຊຸມຫ້ອງວ່າການແຂວງອຸດົມໄຊ.

ໂອກາດດັ່ງກ່າວ ທັງສອງຝ່າຍກໍໄດ້ລາຍງານສະພາບຈຸດພິເສດ, ການພັດທະນາເສດຖະກິດ-ສັງຄົມ ແລະ ການຮ່ວມມືໃນໄລຍະທີ່ຜ່ານມາ ໃຫ້ກັນຊາບ,
ການພົບປະຂອງຄະນະນຳແຂວງເຊີນລາ ສສ ຫວຽດນາມ ແລະ ແຂວງອຸດົມໄຊຄັ້ງນີ້ ຖືເປັນນິມິດ ໝາຍສຳຄັນ ເພື່ອເສີມຂະຫຍາຍທາງດ້ານໄມຕີຈິດມິດຕະພາບ ແລະ ຄວາມສາມັກຄີແບບພິເສດຂອງສອງພັກ-ສອງລັດ ເວົ້າສະເພາະແມ່ນສອງແຂວງ ອຸດົມໄຊ-ເຊີນລາ ທີ່ມີມູນເຊື້ອມາແຕ່ດົນນານ ແຂວງອຸດົມໄຊ ແລະ ແຂວງເຊີນລາ ເປັນແຂວງມິດຕະພາບ ເຄີຍມີມູນເຊື້ອໃນການໄປມາຫາສູ່ ແລະ ໃຫ້ການຊ່ວຍເຫຼືອເຊິ່ງກັນ ຫຼາຍດ້ານເຊັ່ນ: ຂົງເຂດການເມືອງ ສອງແຂວງໄດ້ແຕ່ງຕັ້ງຄະນະຜູ້ແທນຂັ້ນສູງ, ຂັ້ນເມືອງ, ຂັ້ນພະແນກການຕ່າງໆ ພັດປ່ຽນກັນໄປມາຢ້ຽມຢາມ ແລະ ແລກປ່ຽນຖອດຖອນບົດຮຽນນຳກັນຢ່າງເປັນປົກກະຕິ, ວຽກງານສຶກສາ ແລະ ກໍ່ສ້າງຊັບພະຍາກອນມະນຸດ ແຂວງເຊີນລາ ໄດ້ໃຫ້ທຶນຮຽນວິຊາສະເພາະແກ່ນ້ອງນັກຮຽນຂອງແຂວງອຸດົມໄຊໄປຮຽນຕໍ່ທີ່ແຂວງເຊີນລາ ໄລຍະຜ່ານມາ ລວມທັງໝົດ 219 ຄົນ ແລະ ແຂວງອຸດົມໄຊ ໄດ້ຊວ່ຍກໍ່ສ້າງນັກສຶກສາລະດັບປະລິນຍາຕີໃຫ້ແຂວງເຊີນລາຈຳນວນ 5 ຄົນ. ນອກຈາກນັ້ນແຂວງເຊີນລາ ຍັງຊ່ວຍເຝິກອົບຮົມວິຊາສະເພາະ, ພາສາຫວຽດນາມໃນໄລຍະສັ້ນ ແລະ ໄລຍະຍາວ ໃຫ້ແກ່ພະນັກງານ, ທະຫານ, ຕຳຫຼວດ ຂອງແຂວງອຸດົມໄຊ ຈຳນວນ 65 ຄົນ, ດ້ານພື້ນຖານໂຄງລ່າງ. ແຂວງອຸດົມໄຊ ໄດ້ຮັບທືນຊວ່ຍເຫຼືອຈາກແຂວງເຊີນລາກໍ່ສ້າງອາຄານໂຮງຮຽນປະຖົມນາແມດ ເມືອງແບງມູນຄ່າ 3 ຕື້ດົງ; ໂຮງຮຽນ ມັດທະຍົມ ນາຊຽງດີເມືອງຮຸນມູນຄ່າ 3.3ຕື້ດົງ, ໂຮງຮຽນ ມັດທະຍົມສົມບູນ ເມືອງຫຼາ ມູນຄ່າ 5 ຕື້ດົງ, ໂຮງຮຽນ ມັດທະຍົມສົມບູນ ເມືອງປາກແບງມູນຄ່າ 05 ຕື້ດົງ, ກໍ່ສ້າງເຮືອນວັດທະນາທຳ ບ້ານສາມກາງ ເມືອງແບງ, ໃຫ້ທຶນສົມທົບຊວ່ຍສະມາຄົມຊາວຫວຽດນາມທີ່ແຂວງອຸດົມໄຊ ກໍ່ສ້າງໂຮງຮຽນຫວຽດນາມ 2,1 ຕື້ ດົງ, ວຽກງານກະສິກຳ ແລະ ພັດທະນາຊົນນະບົດ ແຂວງເຊີນລາໄດ້ໃຫ້ການຊ່ວຍເຫຼືອແຂວງອຸດົມໄຊເປັນຕົ້ນ ແນວພັນພືດ, ແນວພັນຫຍ້າ, ຕົ້ນໄມ້ໃຫ້ໝາກ, ແນວພັນງົວ ແລະ ອຸປະກອນຮັບໃຊ້ເຂົ້າໃນການລ້ຽງ ແລະ ປູກທົດລອງຢູ່ເມືອງເມືອງຮຸນ ແລະ ເມືອງຫຼາ ເປັນຈໍານວນຫຼາຍ, ດ້ານອຸດສະຫະກຳ, ການຄ້າການລົງທຶນ ແລະ ເນື່ອງໃນໂອກາດທີ່ສອງແຂວງໄດ້ຈັດຕະຫຼາດວ່າງສະແດງສິນຄ້າ ສອງແຂວງກໍ່ໄດ້ແຕ່ງຕັ້ງ ນັກທຸລະກິດ, ຜູ້ປະກອບການ ນຳເອົາສິນຄ້າຂອງແຕ່ລະຝ່າຍ ໄປວ່າງສະແດງຢ່າງເປັນປົກກະຕິ.
ສຳຫຼັບທິດທາງການຮ່ວມມືຂອງສອງແຂວງໃນຕໍ່ໜ້າ ທັງສອງແຂວງ ແມ່ນຈະສືບຕໍ່ຮັກສາການແລກ ປ່ຽນບັນດາຄະນະຜູ້ແທນຂັ້ນສູງ, ບັນດາພະແນກການ, ເມືອງ ແລະ ຂະແໜງການຕ່າງໆ ໃນການໄປມາຢ້ຽມຢາມເຮັດວຽກ ແລະ ແລກປ່ຽນບົດຮຽນ ເຊິ່ງກັນ ແລະ ກັນຢ່າງເປັນປົກກະຕິ. ສືບຕໍ່ເພີ່ມທະວີການຮ່ວມມືມິດຕະພາບ, ຊຸກຍູ້ດ້ານການຄ້າ,ການລົງທຶນ, ການໄປມາຫາສູ່ກັນຂອງປະຊາຊົນສອງແຂວງ ແລະພ້ອມທັງສ້າງເງື່ອນໄຂໃຫ້ບັນດາທຸລະກິດຂອງສອງແຂວງ ໄດ້ມີການຮ່ວມມື ຫຼື ແລກປ່ຽນສິນຄ້ານໍາກັນຫຼາຍຂຶ້ນ  ເຊິ່ງຈະເປັນບ່ອນອີງໃຫ້ສອງແຂວງ ໄດ້ສືບຕໍ່ເພີ່ມທະວີການພົວພັນຮ່ວມມືແລກປ່ຽນ ແລະ ຊ່ວຍເຫຼືອເຊິ່ງກັນ ແລະ ກັນໃນອະນາຄົດ, ເຊິ່ງຈະນໍາເອົາຜົນປະໂຫຍດລວມມາສູ່ປະຊາຊົນຂອງສອງແຂວງ.