ອຸດົມໄຊ ປັບປຸງລະບົບການຈັດຕັ້ງ ຂອງພະແນກການເງິນແຂວງ,ສ່ວຍສາອາກອນ ແລະ ຄັງເງິນແຫ່ງຊາດ

ພິທີປະກາດການຈັດຕັ້ງ ພາຍໃນພະແນກການເງິນແຂວງ, ສ່ວຍສາອາກອນ ແລະ ຄັງເງິນແຫ່ງຊາດປະຈຳແຂວງອຸດົມໄຊ ໄດ້ຈັດຂຶ້ນໃນຕອນບ່າຍ ວັນທີ 6 ພະຈິກ 2018 ຢູ່ທີ່ຫ້ອງວ່າການແຂວງ ໂດຍການເປັນປະທານຮ່ວມຂອງ ທ່ານ ປອ ຄຳພັນ ເຜີຍຍະວົງ ເຈົ້າແຂວງອຸດົມໄຊ ແລະ ທ່ານ ບຸນໂຈມ ອຸບົນປະເສີດ ຮອງລັດຖະມົນຕີິກະຊວງການເງິນ, ມີບັນດາການນຳຂັ້ນກະຊວງ, ແຂວງ ແລະ ພະນັກງານລັດຖະກອນຈາກພະແນກດັ່ງກ່າວເຂົ້າຮ່ວມ.

ການປັບປຸງລະບົບການຈັດຕັ້ງ ໃນຄັ້ງນີ້ ກໍເພື່ອປະຕິບັດຕາມຄວາມຮຽກຮ້ອງຕ້ອງການຂອງໜ້າວຽກ ໂດຍມີການຍົກຍ້າຍ, ສັບຊ້ອນ ພະນັກງານບາງຕຳແໜງ ໄປຮັບຜິດຊອບໜ້າທີ່ໃຫມ່ ແນ່ໃສ່ເຮັດໃຫ້ການເຄື່ອນໄຫວວຽກງານມີປະສິດທິພາບ,ປະສິດທິຜົນສູງ ແລະ ບັນລຸຕາມລະດັບຄາດຫມາຍທີ່ກຳນົດໄວ້ ໃນນີ້ ແຂວງອຸດົມໄຊ ໄດ້ອອກຂໍ້ຕົກລົງ ແຕ່ງຕັ້ງ ທ່ານ ອິນທາ ລືນາມມະຈັກ ກໍາມະການພັກແຂວງ,ຫົວໜ້າພະແນກສ່ວຍສາອາກອນແຂວງ ເປັນວ່າການຫົວໜ້າພະແນກການເງິນແຂວງອຸດົມໄຊ ຄົນໃຫມ່, ແຕ່ງຕັ້ງທ່ານ ບຸນໄສ ພົມມະວົງ ຫົວໜ້າຫ້ອງງົບປະມານ ພະແນກການເງິນແຂວງ ຂຶ້ນເປັນຮອງຫົວໜ້າພະແນກ, ສ່ວນທ່ານ ສົມຈິດ ປັນຍາສັກ ຮອງເຈົ້າແຂວງອຸດົມໄຊ, ຫົວໜ້າພະແນກການເງິນແຂວງຄົນເກົ່າ ທາງກະຊວງການເງິນໄດ້ອອກຂໍ້ຕົກລົງ ຍົກຍ້າຍ ໄປຮັບໜ້າທີ່ໃຫມ່ຢູ່ຫ້ອງວ່າການແຂວງ. ນອກນັ້ນ ຍັງໄດ້ມີການສັບຊ້ອນ,ຍົກຍ້າຍ ບາງຕຳແໜ່ງງານຕື່ມອີກ ໂດຍກະຊວງການເງິນເປັນຜູ້ອອກຂໍ້ຕົກລົງ ເປັນຕົ້ນແມ່ນ ຍົກຍ້າຍ ແລະ ແຕ່ງຕັ້ງ ທ່ານ ນິເວດ ຟອງແສງແກ້ວ ຮອງຫົວໜ້າພະແນກບັນຊີສັງລວມ ຄັງເງິນແຫ່ງຊາດ ມາເປັນຫົວໜ້າຄັງເງິນແຫ່ງຊາດ ປະຈໍາແຂວງອຸດົມໄຊ, ແຕ່ງຕັ້ງທ່ານ ນາງ ພາວັນ ສຸພອນສີ ຫົວໜ້າຫ້ອງການບໍລິຫານ ເປັນຮອງຫົວໜ້າຄັງເງິນແຫ່ງຊາດ ປະຈຳແຂວງອຸດົມໄຊ, ຍົກຍ້າຍ ແລະ ແຕ່ງຕັ້ງທ່ານ ທຳມະລິດ ຣາຊະພົນ ຫົວໜ້າພະແນກຈັດຕັ້ງ, ບໍລິຫານແລະ ການເງິນ ກົມສ່ວຍສາອາກອນ ເປັນຫົວໜ້າສ່ວຍສາອາກອນ ປະຈໍາແຂວງອຸດົມໄຊ. ບັນດາຜູ້ທີມີລາຍຊື່ຍົກຍ້າຍ ແລະ ແຕ່ງຕັ້ງດັ່ງກ່າວ ແມ່ນຈະເລີ່ມເຄື່ອນໄຫວວຽກງານໃຫມ່ຂອງຕົນເອງ ພາຍຫຼັງທີ່ມີການມອບ-ຮັບ ວຽກງານເຊິ່ງກັນ ແລະ ກັນເປັນທີ່ຮຽບຮ້ອຍແລ້ວ.

 

ໂອກາດດັ່ງກ່າວ ທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນ ໄດ້ມີຄໍາເຫັນໂອ້ລົມ ໂດຍສະເພາະແມ່ນເນັ້ນໃຫ້ຜູ້ທີ່ຖືກແຕ່ງຕັ້ງ,ຍົກຍ້າຍ ຈົ່ງເອົາໃຈໃສ່ປະຕິບັດໜ້າທີ່ທີ່ໄດ້ຮັບມອບຫມາຍໃຫ້ສຳເລັດ ພ້ອມທັງຮຽກຮ້ອງໃຫ້ພະນັກງານທຸກຄົນຈົ່ງໃຫ້ການຊ່ວຍເຫຼືອ ແລະຊຸກຍູ້ ຜູ້ທີ່ຮັບໜ້າທີ່ໃຫມ່ ແນ່ໃສ່ເຮັດໃຫ້ການເຄື່ອນໄຫວວຽກງານມີຄວາມຄ່ອງຕົວ ແລະ ສຳເລັດຜົນ.