ປີ 2018 ອົງການປົກຄອງ ແຂວງອຸດົມໄຊ ມີຜົນສຳເລັດ ການຈັດຕັ້ງປະຕິບັດວຽກງານທີ່ພົ້ນເດັ່ນ

ໃນວັນທີ 13 ກຸມພາ 2019 ນີ້ ກອງປະຊຸມສະໄຫມສາມັນເທື່ອທີ 6 ສະພາປະຊາຊົນແຂວງອຸດົມໄຊ ຊຸດທີI ໄດ້ໄຂຂື້ນຢ່າງເປັນທາງການ ທີ່ສະໂມສອນແຂວງ ພາຍໃຕ້ການເປັນປະທານຂອງທ່ານ ບຸນລອດ ອ່ອນພະຈັນ ຮອງເລຂາພັກແຂວງ ປະທານສະພາປະຊາຊົນແຂວງ ໃນໂອກາດນີ້ ທ່ານ ຄໍາພັນ ເຜີຍຍະວົງ ກໍາມະການສູນກາງພັກເລຂາພັກແຂວງ ເຈົ້າແຂວງອຸດົມໄຊ ໄດ້ລາຍງານການຈັດຕັ້ງປະຕິບັດວຽກງານທີ່ພົ້ນເດັ່ນຂອງອົງການປົກຄອງແຂວງ ເປັນຕົ້ນໃນປີ 2018 ອົງການປົກຄອງແຂວງໄດ້ເອົາໃນໃຈໃສ່ ຕໍ່ວຽກງານເຜີຍແຜ່ແນວທາງນະໂຍບາຍ, ມະຕິ, ຄໍາສັ່ງ ຂອງພັກ ແລະ ລັດ, ພິເສດ ແມ່ນແຜນພັດທະນາ ເສດຖະກິດ-ສັງຄົມ ແລະ ແຜນງົບປະມານ ປະຈໍາປີ 2018 ຂອງແຂວງ ແລະ ບັນດາເອກະສານອື່ນໆທີ່ສໍາຄັນ ຂອງພັກ-ລັດຕິດພັນກັບວຽກງານສຶກສາອົບຮົມການເມືອງແນວຄິດ, ໄດ້ປຸກລະດົມວຽກງານຂະບວນການຕ່າງໆໃນທົ່ວແຂວງຢ່າງເນື່ອງນິດລຽນຕິດອັນໄດ້ເຮັດໃຫ້ພະນັກງານ-ສະມາຊິກພັກ ແລະ ປະຊາຊົນ ມີ ຄວາມອຸ່ນອ່ຽນ, ມີຄວາມສາມັກຄີປອງດອງ, ມີຄວາມສະຫງົບ ແລະ ເປັນລະບຽບຮຽບຮ້ອຍໃນທົ່ວແຂວງ, ສ້າງໄດ້ບັນຍາກາດໃນການພັດທະນາແຂວງມີທ່ວງທ່າເພີ່ມຂຶ້ນກ່ວາເກົ່າ. ເຮັດໃຫ້ທົ່ວແຂວງພວກເຮົາ ມີສະຖຽນລະພາບທາງດ້ານການເມືອງ, ມີຄວາມສະຫງົບ ແລະ ຄວາມເປັນລະບຽບ ຮຽບຮ້ອຍທາງດ້ານສັງຄົມໄດ້ເປັນຢ່າງດີ. ໄດ້ສູ້ຊົນເຮັດໃຫ້ເສດຖະກິດຂອງແຂວງ ຍັງສືບຕໍ່ຂະຫຍາຍຕົວຢ່າງຕໍ່ເນື່ອງ, GDP ເຕີບໂຕເຖິງບໍ່ບັນລຸຕາມຄາດຫມາຍທີ່ສະພາຮັບຮອງ ແຕ່ກໍ່ຢູ່ໃນທ່ວງທ່າຂະຫຍາຍຕົວ 7,23%, ລາຍໄດ້ສະເລ່ຍຕໍ່ຫົວຄົນ ບັນລຸ ໄດ້ 1.388 ໂດລາສາຫະລັດຕໍ່ຄົນຕໍ່ປີ
ອົງການປົກຄອງແຂວງໄດ້ມີຄວາມຕັ້ງຫນ້າພະຍາຍາມຊີ້ນໍາໆພາ ບັນດາພະແນກການອ້ອມຂ້າງແຂວງ ກໍ່ຄືບັນດາເມືອງ ແລະ ປະຊາຊົນຊັ້ນຄົນຕ່າງໆ ເຂົ້າຮ່ວມໃນການປົກປັກຮັກສາ ແລະ ສ້າງສາພັດທະນາແຂວງ ດ້ວຍຄວາມບຸກບືນສູ້ຊົນສູງສົມຄວນ, ເຊິ່ງເຮັດໃຫ້ທົ່ວແຂວງ ສືບຕໍ່ມີສະຖຽນ ລະພາບທາງດ້ານການເມືອງຢ່າງຫນັກແຫນ້ນ, ສັງຄົມມີຄວາມສະຫງົບ ແລະ ຄວາມເປັນລະບຽບຮຽບຮ້ອຍໂດຍພື້ນ ຖານ, ເສດຖະກິດໄດ້ສືບຕໍ່ຂະຫຍາຍຕົວຢ່າງຕໍ່ເນື່ອງ, ເຮັດໃຫ້ໂສມຫນ້າຂອງແຂວງນັບມື້ນັບມີການຫັນປ່ຽນໃຫມ່ ຢ່າງຕັ້ງຫນ້າ, ຊີວິດການເປັນຢູ່ຂອງປະຊາຊົນບັນດາເຜົ່າໄດ້ຮັບການປັບປຸງໃຫ້ດີຂຶ້ນຄຽງຄູ່ກັບຜົນສໍາເລັດ ການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມ ແລະ ແຜນງົບປະມານຂອງແຂວງ ຍັງມີຈຸດອ່ອນ ແລະ ຂໍ້ຄົງຄ້າງຈໍານວນຫນຶ່ງທີ່ຈະຕ້ອງໄດ້ສືບຕໍ່ປັບປຸງແກ້ໄຂ, ເປັນຕົ້ນ ແມ່ນການແກ້ໄຂບັນດາປະກົດການຫຍໍ້ທໍ້ໃນສັງຄົມ ເຫັນວ່າຍັງຊັກຊ້າ, ບໍ່ທັນເຂັ້ມງວດ ແລະ ເດັດຂາດ, ການພັດທະນາທາງດ້ານເສດຖະກິດ ບໍ່ທັນບັນລຸຕາມຄາດຫມາຍທີ່ສະພາປະຊາຊົນໄດ້ຮັບຮອງເອົາ, ການຂາດດຸນງົບປະມານຍັງສູງ, ການປະຕິບັດບາງຄາດຫມາຍບໍ່ທັນບັນລຸ, ການແກ້ໄຂ ຄວາມທຸກຍາກຂອງປະຊາຊົນ ທີ່ຢູ່ເຂດພູດອຍ, ຫ່າງໄກສອກຫຼີກ ບໍ່ທັນມີມາດຕະການອັນລະອຽດ, ຄວາມແຕກ ໂຕນ ລະຫວ່າງ ຕົວເມືອງ ແລະ ຊົນນະບົດຍັງຫ່າງໄກກັນຫຼາຍ, ຄວາມກະຕືລືລົ້ນ ແລະ ຄວາມບຸກບືນ ຫ້າວຫັນ,ຄວາມເປັນເຈົ້າການ ຂອງພະນັກງານ-ສະມາຊິກພັກ ກໍ່ຄືປະຊາຊົນຊັ້ນຄົນຕ່າງໆ ເຂົ້າຮ່ວມໃນການປົກປັກຮັກສາ ແລະ ການພັດທະນາແຂວງ ຍັງບໍ່ທັນສູງເທົ່າທີ່ຄວນ.