ແຂວງອຸດົມໄຊ ສະເຫຼີມສະຫຼອງວັນແມ່ຍິງສາກົນ ຄົບຮອບ 109 ປີ

ຕອນເຊົ້າວັນທີ 7 ມີນາ 2019 ນີ້ ຢູ່ທີ່ສະໜາມກິລາແຂວງອຸດົມໄຊ ໄດ້ມີພິທີສະ ເຫຼີມສະຫຼອງວັນແມ່ຍິງສາກົນ ຄົບຮອບ 109 ປີຂຶ້ນຢ່າງເປັນທາງການ ໂດຍການເຂົ້າຮ່ວມຂອງທ່ານ ປອ ຄຳພັນ ເຜີຍຍະວົງ ເຈົ້າແຂວງອຸດົມໄຊ,ມີທ່ານ ນາງ ມະນີຈັນ ວິໄລຈິດ ປະທານສະຫະພັນແມ່ຍິງແຂວງ,ປະທານສະຫະພັນແມ່ຍິງເມືອງໄຊ,ການນຳແຂວງ,ເມືອງ ແລະ ເອື້ອຍນ້ອງແມ່ຍິງທົ່ວເທດສະບານແຂວງເຂົ້າຮ່ວມ.

ໃນພິທີໄດ້ຮັບຟັງການເຜີຍແຜ່ມູນເຊື້ອຂອງວັນແມ່ຍິງສາກົນ ໂດຍສະເພາະແມ່ນ ປະ ຫວັດຄວາມເປັນມາ,ການເຕີບໃຫຍ່ຂະຫຍາຍຕົວຂອງວັນແມ່ຍິງສາກົນ,ນະໂຍບາຍ ແລະ ກົນໄກສົ່ງເສີມຄວາມກ້າວໜ້າຂອງແມ່ຍິງ ໃນສປປລາວ,ຄວາມສະເຫມີພາບຍິງ ຊາຍ,ການພົວພັນຮ່ວມມືກັບຕ່າງປະເທດ,ຜົນສຳເລັດໃນການເຄື່ອນໄຫວວຽກງານຂອງເອື້ອຍນ້ອງແມ່ຍິງໃນແຕ່ລະໄລຍະ ແລະ ອື່ນໆ. ນອກນັ້ນ ຍັງໄດ້ພ້ອມກັນອອກກຳລັງ ກາຍ,ຢືດເສັ້ນຢືດສາຍ ດ້ວຍການເຕັ້ນແອຣໂຣບິກ ຢ່າງເປັນຂະບວນການຟົດຟື້ນ ໂດຍແນ່ໃສ່ເຮັດໃຫ້ສຸຂະພາບຂອງຮ່າງກາຍມີຄວາມແຂງແຮງ.

ນອກຈາກຈະເປັນການສະເຫຼີມສະຫຼອງວັນແມ່ຍິງສາກົນ ແລ້ວ ຍັງເປັນການຈັດກິດຈະກຳ ຫຼື ຂະບວນການ ເພື່ອຂໍນັບຮັບຕ້ອນ ກອງປະຊຸມໃຫຍ່ 3 ຂັ້ນ,ກອງປະຊຸມໃຫຍ່ຂອງອົງຄະນະພັກເມືອງໄຊ ແລະ ອົງການຈັດຕັ້ງມຫາຊົນ ຂັ້ນເມືອງ ໂດຍສະເພາະແມ່ນກອງປະຊຸມໃຫຍ່ຄັ້ງທີ 7 ຂອງສະຫະພັນແມ່ຍິງເມືອງໄຊ ຕື່ມອີກ.

ໂອກາດດັ່ງກ່າວ ທ່ານນາງ ມະນີຈັນ ວິໄລຈິດ ປະທານສະຫະພັນແມ່ຍິງແຂວງ ແລະ ທ່ານ ນາງອຳໄພ ແສງດາລາດ ຮັກສາການປະທານສະຫະພັນແມ່ຍິງ ເມືອງໄຊ ແຂວງອຸດົມໄຊ ໄດ້ກ່າວຄຳອວຍພອນ ແກ່ສະມາຊິກແມ່ຍິງ,ແມ່ຍິງບັນດາເຜົ່າທົ່ວແຂວງອຸດົມໄຊ ຈົ່ງມີສຸຂະພາບເຂັ້ມແຂງ,ປະສົບຜົນສຳເລັດຕໍ່ໜ້າທີວຽກງານ ພ້ອມກັນປະຕິບັດຕາມພາລະບົດບາດ,ສິດແລະ ໜ້າທີ່ຂອງແມ່ຍິງ,ປະຕິບັດຕາມຂໍ້ແຂ່ງຂັນ 3 ດີ ໃຫ້ໄດ້ຮັບຜົນສຳເລັດ.