ປະກາດການແຕ່ງຕັ້ງຮອງຫົວໜ້າຫ້ອງວ່າການແຂວງອຸດົມໄຊ

ຕອນບ່າຍວັນທີ 5 ເມສາ 2019 ທີ່ຫ້ອງປະຊຸມຫ້ອງວ່າການແຂວງອຸດົມໄຊ ໄດ້ຈັດພິທີປະກາດການແຕ່ງຕັ້ງ ຮອງຫົວໜ້າຫ້ອງວ່າການແຂວງອຸດົມໄຊ ຕາມມະຕິຕົກລົງຂອງຄະນະປະຈຳພັກແຂວງ ວ່າດ້ວຍການຊັບຊ້ອນບ່ອນປະຈຳການຂອງພະນັກງານຂັ້ນຄະນະປະຈຳພັກແຂວງຄຸ້ມຄອງ ໂດຍໄດ້ຊັບຊ້ອນເອົາສະຫາຍ ຫຸມພັນ ໂກສະດາ ຮອງຫົວໜ້າພະແນກແຜນການ ແລະ ການລົງທຶນ ໄປຮັບໜ້າທີ່ໃໝ່ຢູ່ຫ້ອງວ່າການແຂວງ ແລະ ທ່ານ ສີວັນຄຳ ອິນທະບຸບຜາ ຮອງເລຂາຄະນະບໍລິຫານງານພັກເມືອງໄຊ ໄປຮັບໜ້າທີ່ໃໝ່ຢູ່ແຂວງ ແລະ ຂໍ້ຕົກລົງຂອງທ່ານເຈົ້າແຂວງ ວ່າດ້ວຍການແຕ່ງຕັ້ງຮອງຫົວໜ້າຫ້ອງວ່າການແຂວງອຸດົມໄຊ ທີ່ໄດ້ຕົກລົງແຕ່ງຕັ້ງທ່ານ ຫຸມພັນ ໂກສະດາ ເປັນຮອງຫົວໜ້າຫ້ອງວ່າການແຂວງ,  ທ່ານ ສີວັນຄຳ ອິນທະບຸບຜາ ເປັນຮອງຫົວໜ້າຫ້ອງວ່າການແຂວງ ຮັບຜິດຊອບວຽກງານກໍ່ສ້າງຮາກຖານການເມືອງ ແລະ ທ່ານ ພົມມະສຸກ ມອນຈັນດີ ອາດີດຮອງຫົວໜ້າຫ້ອງວ່າການແຂວງ ເປັນຮອງເລຂາພັກເມືອງໆໄຊ

ໂອກາດນີ້ກໍໄດ້ມີການມອບ-ຮັບໜ້າທີ່ຢ່າງເປັນທາງການ ລະຫ່ວາງ ຮອງຫົວໜ້າຫ້ອງວ່າການຜູ້ເກົ່າ ກັບ ຜູ້ໃໝ່ ໂດຍມີທ່ານ ປອ ຄຳພັນ ເຜີຍຍະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງອຸດົມໄຊ, ເຂົ້າຮ່ວມມີກຳມະການພັກແຂວງ, ຫົວໜ້າ-ຮອງຫົວໜ້າພະແນກການ ອົງການທີ່ກ່ຽວຂ້ອງ ພ້ອມດ້ວຍບັນດາທ່ານທີ່ໄດ້ຮັບການແຕ່ງຕັ້ງ ແລະ ບັນດາຂະແໜງການ ພ້ອມດ້ວຍພະນັກງານວິຊາການພາຍໃນຫ້ອງວ່າການການແຂວງອຸດົມໄຊເຂົ້າຮ່ວມຢ່າງພ້ອມພຽງ.