ການນຳ ແຂວງອຸດົມໄຊ ພົບປະໂອ້ລົມ ຕໍ່ອົງການ ປົກຄອງ ເມືອງຮຸນ ແລະ ເມືອງປາກແບງ

ໃນວັນທີ 4 ຕຸລາ 2018 ທ່ານ ປອ ຄຳພັນ ເຜີຍຍະວົງ ກຳມະການສູນກາງພັກ, ເລຂາພັກແຂວງ ເຈົ້າແຂວງໆ ອຸດົມໄຊ ໄດ້ລົງເຮັດວຽກກັບອົງການປົກຄອງ 2 ເມືອງໃຕ້ຄື: ເມືອງຮຸນ ແລະ ເມືອງປາກແບງ ກ່ອນອື່ນ ທ່ານໄດ້ຮັບຟັງ ການລາຍງານສະຫຼູບຕີລາຄາ ການຈັດຕັ້ງປະຕິບັດວຽກງານໃນໄລຍະຜ່ານມາຂອງ 2 ເມືອງ ແລະ 2 ເມືອງໄດ້ມີການສະເໜີບາງບັນຫາທີ່ເຫັນວ່າ 2 ເມືອງຍັງມີຄວາມຫຍຸ້ງຍາກຕໍ່ທ່ານ ເລຂາພັກແຂວງ, ເຈົ້າແຂວງໆອຸດົມໄຊ

ຫຼັງຈາກນັ້ນ ທ່ານ ເຈົ້າແຂວງໆ ອຸດົມໄຊ ໄດ້ມີຄຳເຫັນ ແລະ ເນັ້ນອົງການປົກຄອງຂັ້ນເມືອງ 2 ເມືອງ ໃຫ້ສືບຕໍ່ຈັດຕັ້ງປະຕິບັດ ວຽກງານໜ້າທີ່ການເມືອງ ທີ່ຕົນເອງຮັບຜິດຊອບ ໃຫ້ໜັກແໜ້ນ ແລະດີທີ່ສຸດ, ພ້ອມກັນກວດກາຄືນແຜນວຽກ ແຜນງານ ທີ່ໄດ້ຈັດຕັ້ງປະຕິບັດຜ່ານມາ ແລະ ພ້ອມກັນປັບປຸງແບບແຜນວິທີເຮັດວຽກ ໃຫ້ມີລັກສະນະທັນສະໄໝວ່ອງໄວ, ກວດກາເບິ່ງຄືນການຈັດຕັ້ງປະຕິບັດມະຕິ ກອງປະຊຸມໃຫຍ່ ຄັ້ງທີ X ຂອງພັກ, ກອງປະຊຸມໃຫຍ່ຄັ້ງທີ VIII ຂອງຄະນະບໍລິຫານງານພັກແຂວງ ແລະ ຂອງເມືອງ  ໂດຍສະເພາະແມ່ນ ການແກ້ໄຂຄວາມທຸກຍາກ ຂອງພໍ່ແມ່ ປະຊາຊົນບັນດາເຜົ່າ ແລະ ການແກ້ໄຂປະກົດການຫຍໍ້ທໍ້ໃນສັງຄົມ ແລະ  ສືບຕໍ່ພ້ອມກັນ ເຮັດວຽກກ່ຽວກັບ ການປັບປຸງລະບົບການເມືອງ ແນວຄິດກໍ່ສ້າງຮາກຖານການເມືອງ ໃຫ້ມີຄວາມໜັກແໜ້ນເຂັ້ມແຂງ ແລະ ວຽກງານອື່ນໆ.

ຫຼັງຈາກສີ້ນສຸດກອງປະຊຸມ ທ່ານເລຂາພັກແຂວງ,  ເຈົ້າແຂວງໆອຸດົມໄຊ ໄດ້ມອບເຄື່ອງບໍລິໂພກຈຳນວນໜຶ່ງໃຫ້ 2 ເມືອງ ແລະເງິນສົດໃຫ້ເມືອງລະ 10.000.000 ກີບ (ສີບລ້ານກີບ).

ອົງການປົກຄອງເມືອງຮຸນ

ອົງການປົກຄອງເມືອງປາກແບງ