ອຸດົມໄຊ ຫາລື ວຽກງານປ້ອງກັນ ແລະ ຄວບຄຸມ ໄພພິບັດ

ກອງປະຊຸມປຶກສາຫາລືວຽກງານປ້ອງກັນ ແລະ ຄວບຄຸມໄພພິບັດ ຂັ້ນແຂວງ ໄດ້ຈັດຂຶ້ນໃນວັນທີ 6 ກັນຍາ 2018 ຢູ່ທີ່ຫ້ອງປະຊຸມຫ້ອງວ່າການແຂວງ ໂດຍການເປັນປະທານຂອງທ່ານ ຄຳພຽງ ຢາຈົງວາ ຮອງເລຂາພັກແຂວງ, ຮອງເຈົ້າແຂວງ, ປະທານຄະນະກຳມະການປ້ອງກັນແລະຄວບຄຸມໄພພິບັດຂັ້ນແຂວງ, ມີບັນດາຄະນະກຳມະການ ແລະ ກອງເລຂາປ້ອງກັນແລະຄວບຄຸມ ໄພພິບັດຂັ້ນແຂວງ,ເມືອງເຂົ້າຮ່ວມ.

ການດໍາເນີນກອງປະຊຸມໃນຄັ້ງນີ້ ກໍເພື່ອຫ້າງຫາກະກຽມຄວາມພ້ອມໃນທຸກດ້ານໃນການຮັບມືກັບໄພພິບັດທີ່ຈະເກີດຂຶ້ນໃນຕໍ່ໜ້າ ເນື່ອງຈາກທົ່ວທຸກພາກຂອງປະເທດລາວ ເວົ້າລວມ,ເວົ້າສະເພາະກໍຄືແຂວງອຸດົມໄຊ ແມ່ນໄດ້ຮັບຜົນກະທົບຈາກໄພພິບັດທາງທຳມະຊາດເປັນປະຈຳໃນແຕ່ລະປີ ລວມທັງແລກປ່ຽນບົດຮຽນເຊິ່ງກັນແລະກັນ ກ່ຽວກບຮູບແບບ, ວິທີການໃນການປັບປຸງແກ້ໄຂ,ຟື້ນຟູພື້ນທີ່ທີ່ໄດ້ຮັບຜົນກະທົບ ແລະ ການຊ່ວຍເຫຼືອສຸກເສີນ ແລະ ຍາວນານຕໍ່ປະຊາຊົນທີ່ປະສົບໄພ ໃນນັ້ນ ແມ່ນໄດ້ຮັບຟັງຂໍ້ຕົກລົງວ່າດ້ວຍການແຕ່ງຕັ້ງຄະນະກຳມະການ ແລະ ກອງເລຂາ ປ້ອງກັນ ແລະ ຄວບຄຸມໄພພິບັດ ລວມທັງພາລະບົດບາດ,ສິດແລະ ໜ້າທີ່ຄວາມຮັບຜິດຊອບ ເພື່ອສະດວກໃນການຈັດຕັ້ງປະຕິບັດວຽກງານຕົວຈິງ,ຂໍ້ຕົກລົງວ່າດ້ວຍກອງທຶນແຮຊ່ວຍເຫຼືອສຸກເສີນຜູ້ປະສົບໄພພິບັດ,ຄຳສັ່ງຂອງຄະນະເລຂາທິການສູນກາງພັກ,ວ່າດ້ວຍການເພີ່ມທະວີຄວາມຮັບຜິດຊອບຂອງຄະນະພັກ ໃນການນຳພາ – ຊີ້ນໍາການປ້ອງກັນ ແລະ ຮັບມືໄພພິບັດທໍາມະຊາດ,ຄໍາສັ່ງວ່າດ້ວຍການຈັດຕັ້ງປະຕິບັດ 8 ມາດຕະການຊຸກຍູ້ເສດຖະກິດ,ທິດທາງແຜນການກະກຽມຄວາມພ້ອມຕອບໂຕ້ສຸກເສີນໄພພິບັດ ຂັ້ນແຂວງ ໂດຍແນ່ໃສ່ເຮັດໃຫ້ການເຄື່ອນໄຫວຕອບໂຕ້ສຸກເສີນມີປະສິດທິຜົນ,ເຮັດໃຫ້ຮູ້ກ່ຽວກັບການວາງແຜນແລະການເກັບກຳຂໍ້ມູນຄວາມເສຍຫາຍ ເພື່ອຊ່ວຍເຫຼືອໃຫ້ທັນເວລາ ທັງເປັນການແນະນໍາບັນດາມາດຕະການທີ່ຕ້ອງປະຕິບັດໃນແຕ່ລະໄລຍະຂອງວົງຈອນການຄວບຄຸມຄວາມສ່ຽງຕໍ່ໄພພິບັດ ລວມທັງ ເອກະສານແຈ້ງການທີ່ກ່ຽວຂ້ອງຈຳນວນໜຶ່ງ.