ຕິດຕໍ່ສອບຖາມ
Tel/Fax: 081 312109, email: odx_gv04@yahoo.com
 
 

ກອງປະຊຸມຄົບຄະນະບໍລິຫານງານພັກແຂວງ  ຄັ້ງທີ 4 ສະໄໝທີ VIII ໄດ້ດໍາເນີນເປັນເວລາ 3 ວັນເຕັມ ແຕ່ວັນທີ 26 28 ທັນວາ 2016 ທີ່ຫ້ອງປະຊຸມຊັ້ນ 3 ຫ້ອງວ່າການປົກຄອງແຂວງອຸດົມໄຊ. ພາຍໃຕ້ການເປັນປະທານຂອງ ທ່ານ ເພັດສາຄອນ ຫຼວງອາໄພ ກໍາມະການສູນກາງພັກ, ເລຂາພັກແຂວງ, ເຈົ້າແຂວງ-ແຂວງອຸດົມໄຊ ຊຶ່ງມີບັນດາສະຫາຍຄະນະປະຈໍາພັກແຂວງ, ກໍາມະການພັກແຂວງ, ເລຂາພັກເມືອງ  ຜູ່ແທນກອງປະຊຸມເຂົ້າຮ່ວມທັງໝົດຈໍານວນ 29 ສະຫາຍ, ຍິງ 3 ສະຫາຍ.

ກອງປະຊຸມ  ໄດ້ດໍາເນີນພາຍໃຕ້ບັນຍາກາດຟົດຟື້ນ, ສ້າງສັນ ແລະ ເຕັມປ່ຽມໄປດ້ວຍຄວາມຮັບຜິດຊອບສູງຂອງບັນດາຜູ່ແທນທີ່ເຂົ້າຮ່ວມ. ກອງປະຊຸມໄດ້ຮັບຟັງການຜ່ານບົດສະຫຼຸບຕິລາຄາ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງສົກປີ 2015-2016, ການຈັດ ຕັ້ງປະຕິບັດແຜນພັດທະນາເສດຖະກິດ - ສັງຄົມໃນໄລຍະ 1 ປີຜ່ານມາ ໃນສົກປີ 2015-2016 ແລະ ທິດທາງແຜນການປະຈໍາປີ 2017 ຂອງແຂວງອຸດົມໄຊ, ຜ່ານແຜນການຈັດຕັ້ງປະຕິບັດ​​ແຈ້ງການແນະນໍາເລກທີ 1018/ກປ, ລົງວັນທີ 12 ຕຸລາ 2016 ວ່າດ້ວຍການຜັນຂະຫຍາຍຈຸດສຸມພັດທະນາທີ່ເປັນບູລິມະສິດໄລຍະ 2016-2020, ຜ່ານບົດສຳຫຼວດການຊີ້ນໍາ-ນໍາພາລວມຂອງຄະນະບໍລິຫານງານພັກແຂວງໃນໄລຍະ 1 ປີ ຜ່ານມາ ແລະ ແຕ່ລະສະຫາຍຄະນະບໍລິຫານງານພັກແຂວງຜ່ານບົດສຳຫຼວດຕົນເອງ. ຈາກນັ້ນຜູ່ແທນກອງປະຊຸມໄດ້ພ້ອມກັນຄົ້ນຄ້ວາປະກອບຄໍາຄິດ ຄໍາເຫັນໃສ່ເນື້ອໃນກອງປະຊຸມຢ່າງກົງໄປກົງມາເຊິ່ງ  ຍົກໃຫ້ເຫັນດ້ານດີຜົນງານ, ດ້ານອ່ອນ-ຂໍ້ຄົງ ຄ້າງໃນການຊີ້ນໍາ-ນໍາພາ ແລະ ພ້ອມກັນດໍາເນີນການປັບປຸງແກ້ໄຂໃນຕໍ່ໜ້າຢ່າງຖືກຕ້ອງ. ກອງປະ ຊຸມໄດ້ຕີລາຄາເອກະພາບ ແລະ ຮັບຮອງເອົາເນື້ອໃນບັນຫາສໍາຄັນດັ່ງນີ້:

1.     ໂດຍລວມແລ້ວແຂວງອຸດົມໄຊມີສະຖຽນລະພາບທາງດ້ານການເມືອງ, ມີຄວາມ ສະຫງົບປອດໄພ ແລະ ຄວາມເປັນລະບຽບຮຽບຮ້ອຍທາງດ້ານສັງຄົມໂດຍພື້ນຖານ.

2.     ດ້ານເສດຖະກິດມະຫາພາກສົກປີ 2015-2016 ອັດຕາການເຕີບໂຕເສດຖະກິດ 7,5%, ລວມຍອດມູນຄ່າຜະລິດຕະພັນພາຍໃນ (GDP) ບັນລຸໄດ້ 3,503,07 ຕື້ກີບ ຫຼື ປະມານ 436,24 ລ້ານໂດລາ ສະເລັ່ຍຕໍ່ຫົວຄົນໄດ້ 1.397 ໂດລາ ຕໍ່ຄົນຕໍ່ປີ ລື່ນແຜນການປີ 1,38%.

- ຂະແໜງ ກະສີກໍາ-ປ່າໄມ້ ເພີ່ມຂຶ້ນ     5,3%     ກວມເອົາ 41,32 % ຂອງ GDP.    

- ຂະແໜງ ອຸດສະຫະກໍາ ເພີ່ມຂຶ້ນ       3,97%   ກວມເອົາ 33,56% ຂອງ GDP.     

- ຂະແໜງ ການບໍລິການ ເພີ່ມຂຶ້ນ      14,23%   ກວມເອົາ 23,20% ຂອງ GDP.

 

ກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 4 ສະໄໝທີ VIII ມີຄວາມເຊື້ອໝັ້ນວ່າ: ດ້ວຍຄວາມບຸກບືນຂອງບັນດາສະຫາຍຄະນະບໍລິຫານງານພັກແຂວງ. ນໍາເອົາເນື້ອໃນມະ ຕິກອງປະຊຸມຄັ້ງນີ້ຫັນເປັນໂຄງການ, ແຜນການອັນລະອຽດເພື່ອຈັດຕັ້ງຜັນຂະຫຍາຍຕາມຂອບເຂດຄວາມຮັບຜິດຊອບຂອງຕົນຢ່າງຈະແຈ້ງ ແລະ ທັນ​​ເວລາ.

ຫົວຂໍ້ທີ່ກ່ຽວຂ້ອງ

ແຂວງອຸດົມໄຊ ເມືອງແຫ່ງ ສະເໜ່

ແຫຼງທ່ອງທ່ຽວ

ສະຖິຕິການເຂົ້າຊົມເວັບໄຊ



© 2016 ສະຫງວນລິຂະສິດຫ້ອງວ່າການປົກຄອງແຂວງອຸດົມໄຊ
ຕັ້ງຢູ່ ບ້ານພູຂຽວ ເມືອງໄຊ ແຂວງອຸດົມໄຊ, ໂທ/ແຟັກ: (856-81) 312109,email: odx_gv04@yahoo.com