ກອງປະຊຸມອົງການປົກຄອງແຂວງ ອຸດົມໄຊ ຄັ້ງທີ 7 ສະໄຫມທີ VIII ໄດ້ຈັດຂຶ້ນໃນວັນທີ 29 ພະຈິກ 2017 ຢູ່ທີ່ຫ້ອງປະຊຸມຫ້ອງວ່າການແຂວງ ໂດຍການເປັນປະທານຂອງທ່ານ ເພັດສາຄອນ ຫຼວງອາໄພ ເຈົ້າແຂວງອຸດົມໄຊ. ມີບັນດາຄະນະນຳຂອງແຂວງ,ເຈົ້າເມືອງ 7 ເມືອງ,ຫົວໜ້າພະແນກການ,ອົງການຈັດຕັ້ງ ແລະ ພາກ ສ່ວນທີ່ກ່ຽວຂ້ອງເຂົ້າຮ່ວມ.

  ການດໍາເນີນກອງປະຊຸມໃນຄັ້ງນີ້ ກໍເພື່ອສະຫຼຸບຕີລາຄາຄືນໃນການຈັດຕັ້ງປະຕິບັດວຽກງານ ບາງຂະແໜງການ ພ້ອມທັງຮ່ວມກັນປະກອບຄຳຄິດຄຳເຫັນ ເພື່ອຊອກຫາແນວທາງໃນການແກ້ໄຂບັນຫາທີ່ເຫັນວ່າ ຍັງຄ້າງຄາ ເປັນຫາງສຽງຈາກສັງຄົມ ໂດຍສະເພາະແມ່ນການກຳນົດລາຄາຫົວໜ່ວຍທົດແທນຄ່າເສຍຫາຍ ແລະ ຈັດສັນຍົກຍ້າຍປະຊາຊົນຈາກໂຄງການກໍ່ສ້າງເສັ້ນທາງລົດໄຟ ລາວ ຈີນ ຊ່ວງແຂວງອຸດົມໄຊ ໃຫ້ຖືກຕ້ອງຕາມລະບຽບຫຼັກການ ແລະ ຄວາມເຫມາະສົມ ແນ່ໃສ່ເຮັດໃຫ້ປະຊາຊົນທີ່ໄດ້ຮັບຜົນກະທົບດັ່ງກ່າວ ມີຊີວິດການເປັນຢູ່ທີ່ດີຂຶ້ນກວ່າເກົ່າ,ການຂໍ ດັດແກ້ມູນຄ່າໂຄງ ການລົງທຶນຂອງລັດໃນໄລຍະຜ່ານມາ ທີ່ມີມູນຄ່າຕ່ຳກວ່າ 5 ຕື້ກີບລົງມາ ແລະ ແຜນຈັດສັນການລົງທຶນຂອງລັດປະຈຳປີ 2018 ແລະ ທິດທາງແຜນການກະກຽມເປີດປີທ່ອງທ່ຽວ 2018 ຢູ່ແຂວງອຸດົມໄຊ ລວມທັງ ການຜ່ານເອກະສານສຳຄັນຈຳນວນໜຶ່ງ ເປັນຕົ້ນແມ່ນຮ່າງຂໍ້ກໍານົດວ່າດ້ວຍການປະຕິບັດນະໂຍບາຍໃຫ້ແກ່ພະນັກງານພາຍໃນແຂວງ ທີ່ໄປບຳລຸງ,ຍົກລະດັບ ທັງພາຍໃນແລະຕ່າງປະເທດ,ຂໍ້ຕົກລົງ ວ່າດ້ວຍການສ້າງຕັ້ງກອງທຶນແຮຊ່ວຍເຫຼືອສຸກເສີນ ໃຫ້ແກ່ຜູ້ປະສົບເຄາະຮ້າຍ ຈາກໄພພິບັດ,ຮ່າງຂໍ້ຕົກລົງວ່າດ້ວຍການພັດທະນາຕົວເມືອງໄຊ ຕາມທິດ 4 ສໍ ແລະ ຄຳສັ່ງແນະນຳ ເຖິງການນຳເມືອງ 7 ເມືອງ ກ່ຽວກັບການເພີ່ມທະວີຄວາມເອົາໃຈໃສ່ຕໍ່ການຊີ້ນຳ ນຳພາ ຂອງບັນດາຮາກຖານບ້ານ,ກຸ່ມບ້ານ ປີ2017 – 2020 ໃນທົ່ວແຂວງອຸດົມໄຊ.

  ພາຍຫຼັງຄະນະຮັບຜິດຊອບແຕ່ລະວຽກງານໄດ້ນໍາສະເໜີວຽກງານຂອງຕົນເອງຮັບ ຜິດຊອບຕໍ່ກອງປະຊຸມແລ້ວ ຜູ້ເຂົ້າຮ່ວມໄດ້ມີຄຳເຫັນແລກປ່ຽນ ເຊິ່ງກັນແລະກັນໂດຍແນ່ໃສ່ເຮັດໃຫ້ການດຳເນີນວຽກງານໄປຕາມລະບຽບຫຼັກການ,ທິດທາງແຜນການ ລວມຂອງແຂວງ ແລະ ໄດ້ຮັບຜົນສຳເລັດຕາມລະດັບຄາດໝາຍ ສຸດທ້າຍ ທ່ານ ເພັດສາ ຄອນ ຫຼວງອາໄພ ເຈົ້າແຂວງອຸດົມໄຊ ໄດ້ມີຄຳເຫັນສະຫຼຸບ ແລະ ເຫນັ້ນໜັກໃຫ້ແກ່ແຕ່ລະພາກສ່ວນ ເອົາໃຈໃສ່ໃນການຈັດຕັ້ງປະຕິບັດວຽກງານຕາມພາລະບົດບາດ,ສິດແລະໜ້າທີ່ຮັບຜິດຊອບຂອງຕົນຢ່າງຕັ້ງໜ້າ ເຮັດໃຫ້ແຂວງອຸດົມໄຊ ໄດ້ຮັບການພັດທະນາຢ່າງເປັນລະບົບແລະຕໍ່ເນື່ອງ.

 

ຂ່າວ: ຄານມະນີ ຮຽນດໍຈັນ

 

ຫົວຂໍ້ທີ່ກ່ຽວຂ້ອງ



© 2016 ສະຫງວນລິຂະສິດຫ້ອງວ່າການປົກຄອງແຂວງອຸດົມໄຊ
ຕັ້ງຢູ່ ບ້ານພູຂຽວ ເມືອງໄຊ ແຂວງອຸດົມໄຊ, ໂທ/ແຟັກ: (856-81) 312109,email: odx_gv04@yahoo.com