ພາຍຫຼັງດໍາເນີນມາເປັນເວລາ 2 ວັນນັບຕັ້ງແຕ່ ວັນທີ 1 ກຸມພາ ເປັນຕົ້ນມາ ກອງປະຊຸມຄົບຄະນະບໍລິຫານງານພັກແຂວງອຸດົມໄຊ ຄັ້ງທີ7 ສະໄຫມທີVIII ກໍໄດ້ອັດລົງດ້ວຍຜົນສໍາເລັດຢ່າງຈົບງາມ. ໂດຍພາຍໃຕ້ການເປັນປະທານຂອງທ່ານ ເພັດສາຄອນ ຫຼອງອາໄພ ກຳມະການສູນກາງພັກ,ເລຂາພັກແຂວງ,ເຈົ້າແຂວງອຸດົມໄຊ, ມີບັນດາຄະນະປະຈຳພັກແຂວງ,ກຳມະການພັກແຂວງ ເຂົ້າຮ່ວມ.

  ຕະຫຼອດໄລຍະ 2 ວັນຂອງການດຳເນີນກອງປະຊຸມ ດັ່ງກ່າວ ແມ່ນໄດ້ຮັບຟັງການສະຫຼຸບຕີລາຄາຄືນຜົນການຊີ້ນຳນຳພາຂອງຄະນະບໍລິຫານງານພັກແຂວງອຸດົມໄຊ ໃນການຈັດຕັ້ງຜັນຂະຫຍາຍມະຕິ 5ແລະ 6 ໄລຍະ 1 ປີທີ່ຜ່ານມາ,ການຈັດຕັ້ງປະຕິບັດແຜນພັດທະນາເສດຖະກິດ ສັງຄົມ, ແຜນງົບປະມານ ຂອງແຂວງ ປະຈໍາປີ2017 ແລະ ທິດທາງແຜນການ ປະຈຳປີ 2018. ລວມທັງການສະຫຼຸບລາຍງານການ ຈັດຕັ້ງປະຕິບັດບັນດາຄາດຫມາຍສູ້ຊົນ ກ່ຽວກັບວຽກງານໃນບາງຂະແໜງການ ເປັນຕົ້ນແມ່ນ 15ຄາດໝາຍຂອງຂະແໜງສຶກສາ, 10ຄາດຫມາຍຂອງສາທາລະນະສຸກ, 4ຄາດໝາຍຂອງແຮງງານແລະສະຫວັດດີການສັງຄົມ,3ຄາດໝາຍຂອງຂະແໜງ ຖວທ ແລະ ບັນດາຄາດໝາຍຕົ້ນຕໍຂອງຂະແໜງກະສິກຳ - ປ່າ ໄມ້ ເຊັ່ນ ການປູກເຂົ້າ,ປູກພືດ,ລ້ຽງສັດເປັນສິນຄ້າ,ຜະລິດເບ້ຍໄມ້,ຟື້ນຟູປ່າ,ການພັດທະນາຊົນນະບົດແລະລຶບລ້າງຄວາມທຸກຍາກ ແລະ ການສະຫຼຸບຕີລາຄາຄືນການຈັດຕັ້ງປະຕິບັດວຽກງານປ້ອງກັນຊາດ - ປ້ອງກັນຄວາມສະຫງົບ.

  ນອກນັ້ນ ກໍໄດ້ຮັບຟັງການສະຫຼຸບລາຍງານກ່ຽວກັບການຈັດຕັ້ງປະຕິບັດຄ່າຊົນເຊີຍຜົນກະທົບຈາກໂຄງ ການກໍ່ສ້າງເສັ້ນທາງລົດໄຟ ລາວ ຈີນ ຊ່ວງແຂວງອຸດົມໄຊ ແລະ ປະກອບຄຳເຫັນໃສ່ວຽກງານແຕ່ລະດ້ານທີ່ຍົກຂຶ້ນມາໃນກອງປະຊຸມ ລວມທັງວຽກງານໃຫມ່ທີ່ຈະເລີ່ມຕົ້ນຈັດຕັ້ງປະຕິບັດເປັນຕົ້ນແມ່ນ ວຽກງານກອງທຶນໄພພິບັດຂອງແຂວງ.

  ໂດຍລວມແລ້ວ ການດໍາເນີນກອງປະຊຸມໃນຄັ້ງນີ້ ແມ່ນເພື່ອສະຫຼຸບລາຍງານ ແລະ ຊີ້ແຈງຜົນການ ເຄື່ອນໄຫວຈັດຕັ້ງປະຕິບັດບັນດາວຽກງານໃນແຕ່ລະຂະແໜງການ ໃຫ້ແຕ່ລະພາກສ່ວນຮັບຮູ້ ແລະ ພ້ອມກັນປຶກສາຫາລື ຊອກຫາແນວທາງແກ້ໄຂບັນຫາທີ່ຍັງຄົງຄ້າ ແລະ ແກ້ໄຂບໍ່ທັນໄດ້ດີ ໃນໄລຍະຜ່ານມາ ເພື່ອເປັນບ່ອນອີງໃຫ້ແກ່ການຊີ້ນຳ ນຳພາ ຂອງອົງຄະນະພັກແຂວງ ແລະ ການຈັດຕັ້ງປະຕິບັດວຽກງານໃນປີຕໍ່ໄປ ໃຫ້ໄດ້ຮັບຜົນສຳເລັດຕາມລະດັບຄາດໝາຍ.

  ພາຍຫຼັງທີ ບັນດາຜູ້ແທນກອງປະຊຸມ ໄດ້ພັດປ່ຽນກັນສະຫຼຸບຕີລາຄາ ຜົນການຈັດຕັ້ງປະຕິບັດວຽກງານ ແລະ ປະກອບຄຳເຫັນ ໃສ່ແຕ່ລະບັນຫາ ພ້ອມທັງກຳນົດແຜນດຳເນີນງານໃນຕໍ່ໜ້າຢ່າງລະອຽດແລ້ວ ທ່ານ ເພັດສາຄອນ ຫຼວງອາໄພ ປະທານກອງປະຊຸມ ໄດ້ມີຄຳເຫັນສະຫຼຸບລວມ ແລະ ກ່າວປິດກອງປະ ຊຸມຢ່າງເປັນທາງການ.

ຂ່າວ: ຄານມະນີ ຮຽນດໍຈັນ

ຫົວຂໍ້ທີ່ກ່ຽວຂ້ອງ



© 2016 ສະຫງວນລິຂະສິດຫ້ອງວ່າການປົກຄອງແຂວງອຸດົມໄຊ
ຕັ້ງຢູ່ ບ້ານພູຂຽວ ເມືອງໄຊ ແຂວງອຸດົມໄຊ, ໂທ/ແຟັກ: (856-81) 312109,email: odx_gv04@yahoo.com