ກອງປະຊຸມອົງການປົກຄອງແຂວງອຸດົມໄຊຄັ້ງທີ 8 ສະໄໝທີ 8 ໄດ້ໄຂຂຶ້ນຢ່າງເປັນທາງການໃນຕອນເຊົ້າວັນທີ 30 ມັງກອນ 2018 ນີ້ ທີ່ຫ້ອງວ່າການແຂວງອຸດົມໄຊ ໂດຍການເປັນປະທານຂອງທ່ານ ເພັດສາຄອນ ຫຼວງອາໄພ ເຈົ້າແຂວງ ແຂວງອຸດົມໄຊ, ເຂົ້າຮ່ວມມີຮອງເຈົ້າແຂວງ, ຫົວໜ້າ ຮອງຫົວໜ້າພະແນກການອົງການ ສອງກອງບັນຊາການທະຫານຕຳຫຼວດແລະ ຂະແໜງການທີ່ກ່ຽວຂ້ອງເຂົ້າຮ່ວມ.

ໃນກອງປະຊຸມຄັ້ງນີ້ຜູ້ແທນກອງປະຊຸມແມ່ນຈະໄດ້ຕີລາຄາຄືນການຈັດຕັ້ງປະຕິບັດບັນດາວຽກງານຂອງແຂວງໃນໄລຍະໜື່ງປີຜ່ານມາ ແລະ ສັງເກດຕີລາຄາແລກປ່ຽນຄຳຄິດຄຳເຫັນໃສ່ທິດທາງແຜນການຈຸດສຸມປີ 2018 ເປັນຕົ້ນແມ່ນບົດສະຫຼຸບແຜນພັດທະນາເສດຖະກິດ-ສັງຄົມຂອງແຂວງປະຈຳປີ 2017 ແລະ ທິດທາງແຜນການການປີ 2018 ,ຮັບຟັງການຜ່ານບົດສະຫຼຸບການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2017 ແລະ ທິດທາງແຜນການປະຈຳປີ 2018,ການຈັດຕັ້ງປະຕິບັດການແກ້ໄຂຜົນການກວດສອບງົບປະມານແຫ່ງລັດປະຈຳສົກປີ 2015-2016,ຮັບຟັງການສະຫຼຸບວຽກງານ ປກຊ- ປກສ ປະຈໍາປີ 2017 ແລະ ທິດທາງແຜນການປະຈຳປີ 2018, ຮັບຟັງບົດສະຫຼຸບການຈັດຕັ້ງປະຕິບັດວຽກງານການຮ່ວມມືກັບຕ່າງປະເທດປະຈຳປີ 2017 ແລະ ທິດທາງແຜນການປະຈຳປີ 2018,ການຈັດຕັ້ງປະຕິບັດຄາດໝາຍຂຶ້ນທະບຽນທີ່ດິນ 4.000 ຕອນປະຈຳປີ 2017 ແລະ ທິດທາງແຜນການປະຈຳປີ 2018. ນອກຈາກນີ້ກໍໄດ້ຮັບຟັງການຜ່ານຮ່າງນິຕິກຳຈຳນວນໜື່ງເປັນຕົ້ນແມ່ນ ຮ່າງຂໍ້ກຳນົດວ່າດ້ວຍການຈັດງຕັ້ງປະຕິບັດນະໂຍບາຍໃຫ້ແກ່ພະນັກງານພາຍໃນແຂວງອຸດົມໄຊ ທີ່ໄປບຳລຸງ ຍົກລະດັບາຍໃນ ແລະ ຕ່າງປະເທດ,ຮ່າງຂໍ້ຕົກລົງວ່າດ້ວຍການຄຸ້ມຄອງ ແລະ ນຳໃຊ້ປ່າຊາ ຢູ່ແຂວງອຸດົມໄຊ,ຜ່ານການຈັດຕັ້ງປະຕິບັດຄຳສັ່ງເລກທີ 15/ນຍ,ຜ່ານຮ່າງຄຳສັ່ງແນະນຳຂອງທ່ານເຈົ້າແຂວງ ວ່າດ້ວຍການເພີ່ມທະວີຄວາມເອົາໃຈໃສ່ຕໍ່ການຊີ້ນຳ-ນຳພາ ບັນດາຮາກຖານບ້ານ ກຸ່ມບ້ານແຕ່ປີ 2017-2020 ໃນທົ່ວແຂວງອຸດົມໄຊ,ຜ່ານຮ່າງຄຳສັ່ງຂອງທ່ານເຈົ້າແຂວງ ວ່າດ້ວຍການເອົາໃຈໃສ່ຕິດຕາມກວດກາການສ້າງຕັ້ງໂຮງຈັກ ໂຮງງານຕ່າງໆ ແລະ ປ້ຳນ້ຳມັນທີ່ນອນຢູ່ໃນຄວາມຮັບຜິດຊອບຂອງຕົນ. ໃນນັ້ນສະມາຊິກອົງການປົກຄອງແຂວງ ແລະ ບັນດາແຂກເຊີນຈະໄດ້ພ້ອມກັນປະກອບຄຳຄິດຄຳເຫັນໃສ່ບັນດາເນື້ອໃນເອກະສານທີ່ໄດ້ຜ່ານກັນຢູ່ໃນກອງປະຊຸມ. ກອງປະຊຸມຈະໄດ້ດຳເນີນໄປເປັນເວລາ 2 ວັນຈິ່ງຈະສຳເລັດ.

 

ຂ່າວ: ສີຈັນ ເກດວົງສາ

 

 

ຫົວຂໍ້ທີ່ກ່ຽວຂ້ອງ



© 2016 ສະຫງວນລິຂະສິດຫ້ອງວ່າການປົກຄອງແຂວງອຸດົມໄຊ
ຕັ້ງຢູ່ ບ້ານພູຂຽວ ເມືອງໄຊ ແຂວງອຸດົມໄຊ, ໂທ/ແຟັກ: (856-81) 312109,email: odx_gv04@yahoo.com