ກອງປະຊຸມສະຫຼຸບຖອດຖອນບົດຮຽນການລົງກໍ່ສ້າງຮາກຖານການເມືອງ ຕິດພັນກັບວຽກງານສາມສ້າງປະຈຳປີ 2017 ແລະ ວາງທິດທາງແຜນການປະຈໍາປີ 2018 ຂອງແຂວງອຸດົມໄຊ ໄດ້ຈັດຂຶ້ນທີ່ຫ້ອງປະຊຸມຫ້ອງວ່າການປົກຄອງແຂວງອຸດົມໄຊ ໃນຕອນເຊົ້າວັນທີ 28 ທັນວາ 2017 ນີ້ ໂດຍການເປັນປະທານຂອງທ່ານ ເພັດສາຄອນ ຫຼວງອາໄພ ກຳມະການສູນກາງພັກ ເລຂາພັແຂວງ ເຈົ້າແຂວງອຸດົມໄຊ ທັງເປັນຫົວໜ້າຄະນະຊີ້ນຳການຫັນລົງກໍ່ສ້າງຮາກຖານການເມືອງຂອງແຂວງອຸດົມໄຊ,ເຂົ້າຮ່ວມມີຄະນະປະຈຳພັກແຂວງ ກຳມະການພັກແຂວງ ຫົວໜ້າພະແນກການ ອົງການ ສອງກອງບັນຊາການທະຫານ ຕຳຫຼວດ ເລຂາພັກເມືອງ ເຈົ້າເມືອງ ,ພະນັກງານລົງກໍ່ສ້າງຮາກຖານການເມືອງ  ແລະ ພະນັກງານຫຼັກແຫຼ່ງຂອງແຂວງເຂົ້າຮ່ວມນຳ.

       ໃນກອງປະຊຸມຄັ້ງນີ້ຜູ້ເຂົ້າຮ່ວມໄດ້ຮັບຟັງການສະຫຼຸບລາຍງານການລົງກໍ່ສ້າງຮາກຖານການເມືອງ ຕິດພັນກັບການຈັດຕັ້ງປະຕິບັດວຽກງານສາມສ້າງປະຈຳປີ 2017 ແລະ ທິດທາງແຜນການປະຈຳປີ 2018,ຮັບຟັງການຜ່ານແຜນພັດທະນາ 13 ຈຸດສຸມບູລິມະສິດຂອງແຂວງ,ຮັບຟັງການຜ່ານວຽກງານກໍ່ສ້າງພັກ-ພະນັກງານ ແລະ ທິດທາງໃນການຫັນພະນັກງານລົງກໍ່ສ້າງຮາກຖານການເມືອງໃນຕໍ່ໜ້າ,ການຈັດເກັບລາຍຮັບເຂົ້າງົບປະມານ ຕາມການແບ່ງຂັ້ນຄຸ້ມຄອງ ຕິດພັນກັບການແບ່ງຜົນປະໂຫຍດໃຫ້ຂັ້ນເມືອງ ແລະ ຂັ້ນບ້ານຕາມທິດສາມສ້າງ,ການຈັດຕັ້ງປະຕິບັດການແບ່ງຂັ້ນຄຸ້ມຄອງໂຄງການລົງທຶນຂອງລັດ ໃຫ້ເມືອງຕາມທິດສາມສ້າງ,ນະໂຍບາຍສົ່ງເສີ່ມທຸລະກິດຂະໜາດນ້ອຍ ແລະ ຂະໜາດກາງ ທີ່ຕິດພັນກັບການສົ່ງເສີ່ມການຈຳໜ່າຍສິນຄ້າຂອງປະຊາຊົນ ຢູ່ບັນດາເມືອງ ແລະ ຈຸດສຸມພັດທະນາ,ຄວາມສາມາດໃນການກຸ້ມຕົນເອງທາງດ້ານງົບປະມານຂອງເມືອງຮຸນ(ໂດຍສະເພາະແມ່ນທ່າແຮງ ຂໍ້ສະດວກ ຂໍ້ຫຍຸ້ງຍາກ ແລະ ວິທີການໃນຕໍ່ໜ້າ),ຄວາມສາມາດໃນການກຸ້ມຕົນເອງທາງດ້ານງົບປະມານຂອງເມືອງໄຊ(ໂດຍສະເພາະແມ່ນທ່າແຮງ ຂໍສະດວກ ຂໍ້ຫຍຸ້ງຍາກ  ແລະ ວິທີການໃນຕໍ່ໜ້າ),ແຜນໃນການກໍ່ສ້າງ,ປັບປຸງເສັ້ນທາງເຂົ້າຫາຈຸດສຸມບູລິມະສິດຂອງແຂວງ ເພື່ອອຳນວຍຄວາມສະດວກໃນການຂົນສົ່ງສິນຄ້າຂອງປະຊາຊົນ ແລະ ຮັບຟັງການຜ່ານແຜນການປັບປຸງກົງຈັກການຈັດຕັ້ງ,ພາລະບົດບາດ ແລະ ການກຳນົດຕຳແໜ່ງງານ ຕິດພັນກັບການແບ່ງຂັ້ນຄຸ້ມຄອງ ຂອງຂະແໜງການ ຕາມທິດສາມສ້າງ. ໃນນັ້ນຜູ້ເຂົ້າຮ່ວມກອງປະຊຸມແມ່ນໄດ້ພ້ອມກັນສຸມສະຕິປັນຍາຂອງຕົນປະກອບຄຳຄິດຄຳເຫັນກ່ຽວກັບບົດລາຍງານ ແລະ ທິດທາງແຜນການ ດ້ວຍຄວາມຮັບຜິດຊອບສູງ ເພື່ອຖອດຖອນບົດຮຽນນຳກັນ ໃນການແກ້ໄຂບັນຫາ ຂໍ້ຄົງຄ້າງ ແລະ ວາງທິດທາງແຜນການຈັດຕັ້ງປະຕິບັດ ໃນການຫັນລົງກໍ່ສ້າງຮາກຖານການເມືອງ ຕິດພັນກັບວຽກງານສາມສ້າງ ພາຍໃນແຂວງອຸດົມໄຊໃຫ້ເຂົ້າສູ່ລວງເລິກ ແລະ ກວ້າງຂວາງ.

ຫົວຂໍ້ທີ່ກ່ຽວຂ້ອງ



© 2016 ສະຫງວນລິຂະສິດຫ້ອງວ່າການປົກຄອງແຂວງອຸດົມໄຊ
ຕັ້ງຢູ່ ບ້ານພູຂຽວ ເມືອງໄຊ ແຂວງອຸດົມໄຊ, ໂທ/ແຟັກ: (856-81) 312109,email: odx_gv04@yahoo.com