ແຂວງ ອຸດົມໄຊ ແມ່ນແຂວງໜື່ງທີ່ຕັ້ງຢູ່ພາກເໜືອຂອງ ສາທາລະນະລັດປະຊາທິໄຕ ປະຊາຊົນລາວ ມີເນື້ອທີ່ 15,370 ກິໂລຕາແມັດ ເນື້ອທີ່ພູດອຍກວມ 80% ເປັນແຂວງທີ່ມີທ່າແຮງດ້ານການທ່ອງທ່ຽວບໍ່່ວ່າຈະເປັນທາງທໍາມະຊາດ ປະຫວັດສາດ ແລະ ວັດທະນະທຳ ເຊີ່ງຍັງຄົງອຸດົມສົມບູນ ໃນປີ 2018 ນີ້ໂດຍປະຕິບັດຕາມແຜນນະໂຍບາຍຂອງລັດທະບານໃນການສົ່ງເສີມໂຄສະນາດຶງດູດນັກທ່ອງທ່ຽວເຂົ້າມາທ່ອງທຽວໃຫ້ຫລາຍຂື້ນ,

ແຂວງອຸດົມໄຊຈິ່ງໄດ້ຈັດ ງານເປີດປີທ່ອງທ່ຽວລາວ, ທ່ຽວແຂວງ ອຸດົມໄຊຂື້ນເພື່ອເປັນການສົ່ງເສີມການທ່ອງທ່ຽວ, ເພື່ອອະນຸລັກວັດທະນະທຳທີ່ມີເອກະລັກ ທັງເປັນການສ້າງບັນຍາກາດກະຕຸ້ນເສດຖະກິດທາງກົງແລະທາງອ້ອມເຊີ່ງພິທີຢ່າງເປັນທາງການໄດ້ເປີດຂື້ນໃນວັນທີ 13/1/2018 ໃນໂອກາດດັ່ງກ່າວ ທ່ານ ສົມຈິດ ປັນຍາສັກ ຮອງເຈົ້າແຂວງ ປະທານຄະນະຊີ້ນຳໃນການຈັດງານສະເຫຼີມສະຫຼອງປີທ່ອງທ່ຽວລາວ 2018 ທີ່ແຂວງ ອຸດົມໄຊ ເຊີ່ງທ່ານໄດ້ກ່າວວ່າ: ການທ່ອງທ່ຽວ ເປັນຂະແໜງ ເສດຖະກິດໜື່ງທີ່ມີການຂະຫຍາຍຕົວຢ່າງວ່ອງໄວ ແລະ ກວ້າງຂວາງ ໃນຊຸມປີຜ່ານມາການນຳແຂວງ ອຸດົມໄຊ ກໍ່ໄດ້ຖືເອົາການທ່ອງທ່ຽວເປັນຂະແໜງການບຸລິມະສິດເພື່ອຊຸກຍູ້ການພັດທະນາເສດຖະກິດ-ສັງຄົມ, ສ້າງວຽກເຮັດງານທຳໃຫ້ປະຊາຊົນບັນດາເຜົ່າມີລາຍໄດ້ ແລະ ນຳເງິນຕາຕ່າງປະເທດເຂົ້າມາແຂວງເປັນຕົ້ນແມ່ນການບໍລິການ,ຜະລິດຕະພັນກະສິກຳ,ຫັດຖະກຳ, ເຄື່ອງທີ່ລະນຶກ ໂດຍຖືເປັນຜະລິດ ແລະ ສົ່ງອອກກັບທີ່ ແລະ ກະຈາຍໄປສູ່ທ້ອງຖິ່ນເຂດຫ່າງໄກສອກຫລີກເທື່ອລະກ້າວ.   ພ້ອມດຽວກັນນັ້ນການນຳແຂວງ ອຸດົມໄຊຍັງຖືເອົາການພັດທະນາ ແລະ ສົ່ງເສີມການທ່ອງທ່ຽວເປັນການຂະຫຍາຍຕົວແລະເປີດກວ້າງການຮ່ວມມືກັບພາຍນອກ ແລະ ວາງແຜນການປົກປັກຮັກສາແຫຼ່ງທ່ອງທ່ຽວທຳມະຊາດ, ປະຫວັດສາດແລະວັດທະນະທຳ ແລະ ສຸມໃສ່ລົງທຶນໃນການພັດທະນາພື້ນຖານໂຄງລ່າງເຊັ່ນ: ປູຢ່າງເສັ້ນທາງແຕ່ ບ້ານດອນແກ້ວ ຫາສະຖານທີ່ທ່ອງທ່ຽວຕາດນ້ຳກັດ ພ້ອມເປີດການພັດທະນາທ່ອງທ່ຽວທຳມະຊາດ ນ້ຳກັດເຢາະລະປາ, ສ້າງທາງປູຢາງເຂົ້າຫາສະຖາທີ່ທ່ອງທ່ຽວຖ້ຳຈອມອັອງ ໂດຍໄດ້ຮັບທຶນສະໜັບສະໜູນຈາກ ທະນາຄານພັດທະນາ ອາຊີ (ADB) ພັດທະນາເຂດຕ້ານແລ້ງຕ້ານຖ້ວມໃນເທດສະບານເມືອງໄຊ, ສ້າງສວນສາທາລະນະ, ຍົກລະດັບວັດພະເຈົ້າສິງຄຳເມືອງຫລາຂື້ນເປັນມໍລະດົກຂອງແຂວງ ແລະ ວຽກງານອື່ນໆ. ອັນໄດ້ເຮັດໃຫ້ການທ່ອງທ່ຽວພາຍໃນແຂວງມີການຂະຫຍາຍຕົວ ແລະຈຳນວນນັກທ່ອງທ່ຽວເຂົ້າມາທ່ຽວແຂວງ ອຸດົມໄຊນັບມື້ນັບເພີ່ມຂື້ນ ສະແດງອອກໃນປີ 2000 ມີນັກທ່່ອງທ່ຽວເຂົ້າມາທ່ຽວແຂວງ ອຸດົມໄຊ 34 ພັນກວ່າຄົນ ສ້າງລາຍຮັບໄດ້ 775,000 ວ່າໂດລາສະຫະລັດ ແລະໃນປີ 2017 ມີນັກທ່ອງທ່ຽວມາທ່ຽວແຂວງ ອຸດົມໄຊເຖີງ 250 ພັນກວ່າຄົນ ສາມາດສ້າງລາຍຮັບໄດ້ 11 ລ້ານກວ່າໂດລາສະຫະລັດ. ເພື່ອຮອງຮັບນັກທ່ອງທ່ຽວໃນປະຈຸບັນແລະອະນາຄົດ ແຂວງ ອຸດົມໄຊ ຈະໄດ້ສຸມໃສ່ການຄຸ້ມຄອງການພັດທະນາ ແລະ ສົ່ງເສີມການທ່ອງທ່ຽວທາງທຳມະຊາດ ປະຫວັດສາດ ແລະ ວັດທະນະທຳ, ສຸມໃສ່ພັດທະນາການທ່ອງທ່ຽວພາຍໃນແຂວງ, ປູກຈິດສຳນຶກ ແລະ ຍົກສູງຄວາມຮັບຮູ້ທົ່ວສັງຄົມກໍ່ຄືປະຊາຊົນບັນດາເຜົ່າກ່ຽວກັບຄວາມສຳຄັນວຽກງານການທ່ອງທ່ຽວ ແລະ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງແຂວງ, ເມືອງ ແລະ ຮາກຖານບ້ານ, ສົ່ງເສີມພາກທຸລະກິດກະສິກຳ, ຫັດຖະກຳ, ການບໍລິການ ແລະ ຂະແໜງການຕ່າງໆໃຫ້ໄດ້ຮັບການພັດທະນາໃຫ້ດີຂື້ນ, ຍາດແຍ່ງໂອກາດ ແລະ ທ່າອ່ຽງຂອງການທ່ອງທ່ຽວຂອງພາກພື້ນ, ອະນຸພາກພື້ນເຂົ້າມາພັດທະນາແລະສົ່ງເສີມການທ່ອງທ່ຽວໃຫ້ແຂງແຮງເປັນການຮ່ວມມື ການເຊື່ອມໂຍງກັບບັນດາແຂວງປະເທດເພື່ອນບ້ານ, ສ້າງກິດຈະກຳປີທ່ອງທ່ຽວ 2018 ໂດຍການສືບຕໍ່ຈັດຢູ່ບັນດາເມືອງທີ່ມີເງື່ອນໄຂ ສະທ້ອນໃຫ້ເຫັນທ່າແຮງທາງດ້ານທຳມະຊາດ, ປະຫວັດສາດ, ວັດທະນະທຳ ແລະ ງານປະເພນີວິຖີຊີວິດຂອງບັນດາເຜົ່າ ເຊີ່ງນັກທ່ອງທ່ຍວສາມາດເຂົ້າມາທ່ຽວຊົມໄດ້ຕະຫລອດປີ.

ຂ່າວ: ຄຳພູສະຫວັນ ເພັນສະຫວັດ

ຫົວຂໍ້ທີ່ກ່ຽວຂ້ອງ



© 2016 ສະຫງວນລິຂະສິດຫ້ອງວ່າການປົກຄອງແຂວງອຸດົມໄຊ
ຕັ້ງຢູ່ ບ້ານພູຂຽວ ເມືອງໄຊ ແຂວງອຸດົມໄຊ, ໂທ/ແຟັກ: (856-81) 312109,email: odx_gv04@yahoo.com