ຕິດຕໍ່ສອບຖາມ
Tel/Fax: 081 312109, email: odx_gv04@yahoo.com
 
 

ໃນການພົວພັນຮ່ວມມືວຽກງານຮອບດ້ານລະຫວ່າງແຂວງອຸດົມໄຊ ສປປ ລາວ ກັບ ບັນດາແຂວງຂອງ ສສ ຫວຽດນາມ ອັນໄດ້ເຮັດໃຫ້ເສດຖະກິດມີການຂະຫຍາຍຕົວຍ່າງຕໍ່ເນື່ອງ ລະດັບຊີວິດການເປັນຢູ່ຂອງປະຊາຊົນບັນດາເຜົ່າໄດ້ຮັບການຍົກລະດັບສູງຂຶ້ນ. ໃນນັ້ນການພົວພັນຮ່ວມມືທາງດ້ານເສດຖະກິດ-ການຄ້າ ແຂວງອຸດົມໄຊ ກັບ ບັນດາແຂວງແຮກສ່ຽວ ໃນການດຳເນີນການຄ້າ-ຂາຍຮ່ວມກັນ,ໄປມາຫາສູ່ແລກປ່ຽນບົດຮຽນເຊີງກັນ ແລະ ກັນ ເພື່ອປຶກສາຫາລືກ່ຽວກັບການຮ່ວມມື ແລະ ອຳນວຍຄວາມສະດວກໃຫ້ແກ່ພາກສ່ວນທຸລະກິດ ຫຼື ຜູ້ປະກອບການ ໄດ້ມີການພົວພັນແລກປ່ຽນຊື້-ຂາຍນຳກັນ. ທ່ານ ຄຳເພົ້າ ສີລິສຸກ ກຳມະການພັກແຂວງ ຫົວໜ້າພະແນກອຸດສາຫະກຳ ແລະ ການຄ້າ ແຂວງອຸດົມໄຊໄດ້ໃຫ້ສຳພາດວ່າ: ຜ່ານການຈັດຕັ້ງປະຕິບັດການຄ້າລະຫວ່າງແຂວງອຸດົມໄຊ ກັບ ບັນດາແຂວງຂອງ ສສ ຫວຽດນາມ ໃນໄລຍະ 4 ຫາ 5 ປີ ຜ່ານມາມີມູນຄ່າການຄ້າ 143 ຕື້ 794 ລ້ານກວ່າກີບ ຫຼືເທົ່າກັບ 17 ລ້ານກວ່າໂດລາສະຫະລັດ ກວມເອົາ5,26% ຂອງມູນຄ່າການຄ້າກັບຕ່າງປະເທດຂອງແຂວງ ໃນນີ້ ການສົ່ງອອກຂອງແຂວງອຸດົມໄຊ ມີມູນຄ່າ 6 ລ້ານກວ່າໂດລາສະຫະລັດ ແລະ ນຳເຂົ້າ 11 ລ້ານກວ່າໂດລາສະຫະລັດ ສິນຄ້າທີ່ສົ່ງອອກສ່ວນໃຫຍ່ແມ່ນເຄື່ອງກະສິກຳ,ເຄື່ອງປ່າຂອງດົງ ສ່ວນສິນຄ້ານຳເຂົ້າແມ່ນປະເພດແນວພັນສາລີ ຝຸ່ນປຸຍສຳລັບການປູກຝັງ ແລະ ວັດສະດຸກໍ່ສ້າງ ຄຽງຄູ່ກັນນີ້ ກໍໄດ້ອຳນວຍຄວາມສະດວກ ໃຫ້ແກ່ນັກທຸລະກິດຫວຽດນາມເຂົ້າມາລົງທຶນເປັນຕົ້ນແມ່ນ ການຜະລິດ,ການກໍ່ສ້າງ,ການຄ້າ ແລະ ການບໍລິການຢູ່ແຂວງອຸດົມໄຊ ເຊີງມີຫຼາຍກວ່າ 10 ຫົວໜ່ວຍ ມີມູນຄ່າການລົງທຶນທັງໝົດ 103 ຕື້ກວ່າກີບ.

ທ່ານກ່າວຕື່ມອີກວ່າ: ເນື່ອງໃນໂອກາດການສະເຫຼີ່ມສະຫຼອງສອງວັນປະຫວັດສາດຂອງ ສອງຊາດ ລາວ-ຫວຽດນາມ ຈຶ່ງຮຽກຮ້ອງເຖີງພາກສ່ວນທຸລະກິດຂອງແຂວງອຸດົມໄຊ ຈົ່ງເພີ່ມທະວີໃນການພົວພັນຊື້-ຂາຍ ກັບນັກທຸລະກິດຫວຽດນາມໃຫ້ຫຼາຍຂຶ້ນ ແລະ ໃຫ້ມີປະສິດທິຜົນສູງຂຶ້ນກວ່າເກົ່າ, ຮຽກຮ້ອງໃຫ້ນັກທຸລະກິດຫວຽດນາມຈົ່ງເພີ່ມທະວີຄວາມສາມັກຄີ ຮ່ວມມືກັບພາກສ່ວນທຸລະກິດຂອງແຂວງ ກັບພາກສ່ວນຕ່າງໆ ລວມທັງປະຊາຊົນບັນດາເຜົ່າຂອງແຂວງອຸດົມໄຊ ເພື່ອສືບຕໍ່ເສີ່ມສ້າງສາຍພົວພັກຮ່ວມມືມິດຕະພາບ ແລະ ຮັກສາມູນເຊື້ອຄວາມສາມັກຄີອັນດີງາມທີ່ ສອງພັກ,ສອງລັດ ແລະ ປະຊາຊົນສອງຊາດທີ່ໄດ້ເພີ່ມພູນຄູນສ້າງຕະຫຼອດມາ.

ໂດຍ: ສີຈັນ ເກດວົງສາ

 

ແຂວງອຸດົມໄຊ ເມືອງແຫ່ງ ສະເໜ່

ແຫຼງທ່ອງທ່ຽວ

ສະຖິຕິການເຂົ້າຊົມເວັບໄຊ



© 2016 ສະຫງວນລິຂະສິດຫ້ອງວ່າການປົກຄອງແຂວງອຸດົມໄຊ
ຕັ້ງຢູ່ ບ້ານພູຂຽວ ເມືອງໄຊ ແຂວງອຸດົມໄຊ, ໂທ/ແຟັກ: (856-81) 312109,email: odx_gv04@yahoo.com