ກອງປະຊຸມທົບທວນຄືນກ່ຽວກັບການທົດແທນຄືນຄ່າເສຍຫາຍໃຫ້ແກ່ປະຊົນທີ່ໄດ້ຮັບຜົນກະທົບຈາກໂຄງການກໍ່ສ້າງເສັ້ນທາງລົດໄຟ ລາວ-ຈີນ ຊ່ວງຜ່ານແຂວງອຸດົມໄຊຈັດຂຶ້ນໃນທ້າຍອາທິດທີ່ຜ່ານມາຢູ່ທີ່ຫ້ອງປະຊຸມພະແນກ ຍທຂ. ໂດຍການເປັນປະທານຂອງທ່ານ ຄຳພຽງ ຢາຈົງວາ ຮອງເລຂາພັກແຂວງ,ຮອງເຈົ້າແຂວງອຸດົມໄຊ,ມີບັນດາຄະນະປະຈຳພັກແຂວງ,ກຳມະການພັກແຂວງ,ເລຂາພັກເມືອງ,ເຈົ້າເມືອງແລະພະແນກການກ່ຽວຂ້ອງເຂົ້າຮ່ວມ.

ການດໍາເນີນກອງປະຊຸມໃນຄັ້ງນີ້ແມ່ນເພື່ອທົບທວນຄືນກ່ຽວກັບລາຄາ,ຫົວໜ່ວຍທີ່ເໝາະສົມໃຫ້ແກ່ປະຊາຊົນທີ່ໄດ້ຮັບຜົນກະທົບຈາກໂຄງການກໍ່ສ້າງເສັ້ນທາງລົດໄຟ ລາວ-ຈີນລະຫວ່າງຊ່ວງແຂວງອຸດົມໄຊພາຍຫຼັງທີ່ຄະນະຮັບຜິດຊອບໄກ່ເກ່ຍໄດ້ລົງເຄື່ອນໄຫວເກັບກຳຂໍ້ມູນຜູ້ທີ່ໄດ້ຮັບຜົນກະທົບຕົວຈິງ,ເປັນຕົ້ນແມ່ນເນື້ອທີ່ດິນ,ນາ,ອາຄານບ້ານເຮືອນແລະຕົ້ນໄມ້ຕ່າງໆລວມທັງກຳນົດອັດຕາຄ່າເສຍຫາຍເປັນຕົວເລກແລ້ວໃນການດຳເນີນກອງປະຊຸມຄັ້ງທີ່ຜ່ານມາເຊິ່ງການທົບທວນແລະກໍານົດຄ່າທົດແທນໃນຄັ້ງນີ້ແມ່ນອີງໃສ່ລະບຽບຫຼັກການ,ບັນດາແຂວງທີ່ຖືກເສັ້ນທາງດັ່ງກ່າວເປັນຕົ້ນແມ່ນນະຄອນຫຼວງ,ຫຼວງນ້ຳທາແລະແຂວງຫຼວງພະບາງ ທັງໝົດນີ້ກໍເພື່ອເຮັດໃຫ້ເຫມາະສົມແລະຍຸຕິທຳລະຫວ່າງພາກລັດ ກັບ ປະຊາຊົນແຕ່ຢ່າງໃດກໍຕາມການທົດແທນຄ່າເສຍຫາຍຄືນໃຫ້ແກ່ປະຊາຊົນແມ່ນຕ້ອງເຮັດໃຫ້ເສດຖະກິດຂອງຄອບຄົວຂອງເຂົາເຈົ້າເຫຼົ່ານັ້ນດີຂຶ້ນກວ່າເກົ່າ.

 

ສະເພາະຜູ້ທີ່ໄດ້ຮັບຜົນກະທົບຈາກເສັ້ນທາງລົດໄ ລາວ-ຈີນ ຢູ່ທົ່ວແຂວງອຸດົມໄຊ ແມ່ນມີທັງໝົດ 3 ເມືອງຄືເມືອງໄຊ,ເມືອງງາແລະເມືອງນາຫມໍ້ ລວມມີ 41 ບ້ານເມືອງໄຊ 16 ບ້ານ 396 ຄອບຄົວ,ເມືອງງາ 13 ບ້ານ,296ຄອບຄົວແລະເມືອງນາຫມໍ້ 12 ບ້ານ,261 ຄອບຄົວ ລວມທັງໝົດ953 ຄອບຄົວ ໃນນ້ນ ມີດິນທີ່ຖືກຜົນກະທົບຈຳນວນ609,32 ເຮັກຕາ,ສິ່ງປຸກສ້າງ 417 ຫຼັງລວມທັງຕົ້ນໄມ້ອຸດສາຫະກຳແລະຕົ້ນໄມ້ໃຫ້ຫມາກຈຳນວນ 2 ແສນ 3 ຫມື່ນກວ່າຕົ້ນ. ມາຮອດປັດຈຸບັນນີ້ການຄິດໄລ່ອັດຕາຄ່າທົດແທນໃຫ້ແກ່ປະຊາຊົນແມ່ນຢູ່ໃນລະຫວ່າງການຕົກລົງເຫັນດີເປັນເອກະພາບກັນຂອງຄະນະກຳມະການຊີ້ນຳໂຄງການກໍ່ສ້າງທາງລົດໄຟ ຂັ້ນແຂວງເນື່ອງຈາກການລົງເກັບກຳຂໍ້ມູນຂອງຄະນະຮັບຜິດຊອບຍັງບໍ່ທັນລະອຽດຈະແຈ້ງ ລວມທັງປະຊາຊົນບາງຄອບຄົວຮຽກຮ້ອງເອົາຄ່າຕອບແທນຕາມຄວາມພໍໃຈຂອງຕົນເອງ. ເພື່ອຊອກຫາແນວທາງໃນການແກ້ໄຂບັນຫາໃນຄັ້ງນີ້ໃຫ້ສຳເລັດໄປໄດ້ດ້ວຍດີນັ້ນບັນດາຜູ້ເຂົ້າຮ່ວມໄດ້ສະເໜີແລະມີຄຳເຫັນແລກປ່ຽນບົດຮຽນເຊິ່ງກັນແລະກັນ.

ຂ່າວ: ຄານມະນີ ຮຽນດໍຈັນ

ຫົວຂໍ້ທີ່ກ່ຽວຂ້ອງ



© 2016 ສະຫງວນລິຂະສິດຫ້ອງວ່າການປົກຄອງແຂວງອຸດົມໄຊ
ຕັ້ງຢູ່ ບ້ານພູຂຽວ ເມືອງໄຊ ແຂວງອຸດົມໄຊ, ໂທ/ແຟັກ: (856-81) 312109,email: odx_gv04@yahoo.com