ແຂວງອຸດົມໄຊ ບໍາເນັດເງິນໃຫ້ຄູຝຶກ ແລະ ນັກກິລາທີ່ມີຜົນງານໃນງານມະຫາກໍາກິລານັກຮຽນມັດທະຍົມສຶກສາທົ່ວປະເທດຄັ້ງທີ VI; ພິທີໄດ້ຈັດຂື້ນທີ່ສະໂມສອນແຂວງ ວັນທີ 22 ມີນາ 2017 ນີ້, ໂດຍການເຂົ້າຮ່ວມຂອງ ທ່ານ ຄຳພຽງ ຢາຈົງວາ ຮອງເລຂາພັກແຂວງ ຮອງເຈົ້າແຂວງອຸດົມໄຊ, ທ່ານ ພອນສະຫວັນ ພັນທະວິຈິດ ຄະນະປະຈຳພັກແຂວງ ຫົວໜ້າພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວແຂວງ, ທ່ານ ສົມດີ ສີລາທອດ ຫົວໜ້າພະແນກສຶກສາທິການ ແລະ ກິລາ ແຂວງ, ມີບັນດາຫົວໜ້າພະແນກ, ອົງການທຽບເທົ່າ ພ້ອມດ້ວຍຄະນະອຳນວຍການ, ຄູອາຈານ ແລະ ນ້ອງນັກຮຽນ ເຂົ້າຮ່ວມເປັນຂະບວນຟົດຟື້ນ.
          ທ່ານ ພວງວິໄລ ອິນທະວົງ ຮອງຫົວໜ້າພະແນກສຶກສາທິການ ແລະ ກິລາ ໄດ້ລາຍງານສະພາບການເຂົ້າຮ່ວມແຂ່ງຂັນກິລາງານມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VI ທີ່ແຂວງບໍລິຄຳໄຊເປັນເຈົ້າພາບ ໃຫ້ຮູ້ວ່າ: ມີການແຂ່ງຂັນທັງໝົດ 12 ປະເພດກິລາ ຄື: ກິລາແລ່ນ-ລານ, ເຕະບານ, ບານບ້ວງ, ບານສົ່ງ, ກະຕໍ້, ດອກປີກໄກ່, ປິ່ງປ່ອງ, ເປຕັງ, ໝາກຂ່າງ, ໜ້າເກັກ, ເທຄວັນໂດ ແລະ ກິລາໝາກເສິກ; ໂດຍມີການຊີງໄຊກັນທັງໝົດ 126 ຫຼຽນຄຳ, 126 ຫຼຽນເງິນ ແລະ 176 ຫຼຽນທອງ.
          ສຳລັບແຂວງອຸດົມໄຊ ແມ່ນໄດ້ສົ່ງເຂົ້າແຂ່ງຂັນໃນ 8 ປະເພດກິລາຄື: ເຕະບານ, ດອກປີກໄກ່, ບານສົ່ງ, ແລ່ນ-ລານ, ໜ້າເກັກ, ໝາກເສິກ, ປິ່ງປ່ອງ ແລະ ເທຄວັນໂດ. ຜ່ານການແຂ່ງຂັນແຂວງອຸດົມໄຊສາມາດຍາດໄດ້ຫຼຽນທັງໝົດ ລວມ 28 ຫຼຽນ ເປັນອັນດັບທີ 5 ຂອງທົ່ວປະເທດ ໃນນີ້ ຫຼຽນຄຳ 10 ຫຼຽນ; ຫຼຽນເງິນ 8 ຫຼຽນ ແລະ 10 ຫຼຽນທອງ. ເຖິງຢ່າງໃດກໍຕາມໄດ້ກາຍເປັນໄຊຊະນະ ແລະ ຜົນງານຂອງແຂວງອຸດົມໄຊ, ເພື່ອເປັນການຊຸກຍູ້ສົ່ງເສີມນັກກິລາພາຍໃນແຂວງ ໃຫ້ມີການພັດທະນານັບມື້ນັບດີຂື້ນໄປເລື້ອຍໆ, ແຂວງອຸດົມໄຊໄດ້ມອບເງິນບຳເນັດ ແລະ ໃບຍ້ອງຍໍປະເພດຕ່າງໆ ໃຫ້ນັກກິລາ ແລະ ຄູຝຶກ ໃນຈຳນວນ 87 ນ້ອງ ແລະ ຄູຝຶກ 14 ທ່ານ ລວມເປັນເງິນທັງໝົດ 100 ກວ່າລ້ານກີບ.

 

ຫົວຂໍ້ທີ່ກ່ຽວຂ້ອງ



© 2016 ສະຫງວນລິຂະສິດຫ້ອງວ່າການປົກຄອງແຂວງອຸດົມໄຊ
ຕັ້ງຢູ່ ບ້ານພູຂຽວ ເມືອງໄຊ ແຂວງອຸດົມໄຊ, ໂທ/ແຟັກ: (856-81) 312109,email: odx_gv04@yahoo.com