ລະຫວ່າງວັນທີ 27 – 28 ມີນາ 2018 ນີ້ ທາງຄະນະນຳຂັ້ນສູງ ນະຄອນລາວກ່າຍ ແຂວງລາວກ່າຍ ແຫ່ງສສຫວຽດນາມ ໄດ້ເດີນທາງເຂົ້າມາພົບປະຢ້ຽມຢາມແລະເຮັດວຽກຢູ່ເມືອງໄຊ ແຂວງອຸດົມໄຊ ເຊິ່ງນຳໂດຍທ່ານ ມ່າຍ ດິ່ງດິ້ງ ຄະນະປະຈໍາພັກແຂວງ,ເລຂາພັກ,ປະທານສະພາປະຊາຊົນ ນະຄອນລາວກ່າຍ ໂອກາດດັ່ງກ່າວ ໄດ້ມີບັນດາການນຳເມືອງໄຊ ເຊິ່ງນຳໂດຍທ່ານ ຄຳແພງ ຂັນມະນີ ກໍາມະການພັກແຂວງ,ເລຂາພັກເມືອງ ເຈົ້າເມືອງໆ ໄຊ.

  ການພົບປະຢ້ຽມຢາມ ເຊິ່ງກັນແລະກັນ ລະຫວ່າງ ສອງຝ່າຍໃນຄັ້ງນີ້ ກໍເພື່ອປະຕິ ບັດຕາມບົດບັນທຶກຊ່ວຍຈຳລະຫວ່າງ ນະຄອນລາວກ່າຍ ກັບ ເມືອງໄຊ ກ່ຽວກັບ ການແລກປ່ຽນບົດຮຽນ ຮ່ວມກັນ ທັງເປັນການເພີ່ມທະວີການພົວພັນຮ່ວມມືຮອບດ້ານ ແລະ ຄວາມສາມັກຄີແບບພິເສດ ໃຫ້ນັບມື້ນັບແໜ້ນແຟ້ນຍິ່ງຂຶ້ນກວ່າເກົ່າ. ໃນນັ້ນ ທັງສອງຝ່າຍໄດ້ເຂົ້າຮ່ວມກອງປະຊຸມ ໂດຍຮັບຟັງການລາຍງານສະພາບລວມໃນການພັດທະ ນາເສດຖະກິດ ສັງຄົມ ໃນໄລຍະຜ່ານມາ ເປັນຕົ້ນແມ່ນໄດ້ຍົກໃຫ້ເຫັນເຖິງວຽກງານ ສາມສ້າງ,ການທ່ອງທ່ຽວ,ອຸດສາຫະກຳ ການຄ້າ,ຄົມມະນາຄົມຂົນສົ່ງ,ວຽກງານປ້ອງກັນຊາດ ປ້ອງກັນຄວາມສະຫງົບ ແລະ ການພົວພັນຮ່ວມມື ທັງພາຍໃນແລະຕ່າງປະ ເທດ ຈາກນັ້ນ ທັງສອງຝ່າຍໄດ້ມີພິທີເຊັບບົດບັນທຶກການຮ່ວມມື ເຊິ່ງກັນແລະກັນລະ ຫວ່າງ ນະຄອນລາວກ່າຍ ກັບ ເມືອງ ໄຊແຂວງອຸດົມໄຊ ໂດຍຝ່າຍ ລາວ ແມ່ນທ່ານ ຄຳແພງ ຂັນມະນີ ເຈົ້າເມືອງໆ ໄຊ ສ່ວນຝ່າຍ ຫວຽດນາມ ແມ່ນທ່ານ ມ່າຍ ດິ່ງດິ້ງ ປະທານສະພາປະຊາຊົນ ນະຄອນລາວກ່າວ ເຊິ່ງມີຄະນະນໍາທັງສອງຝ່າຍເປັນສັກຂີພິຍານ ສຳຫຼັບເນື້ອໃນບົດບັນທຶກ ການຮ່ວມມື ແລະ ແລກປ່ຽນບົດຮຽນດັ່ງກ່າວ ປະ ກອບມີວຽກງານດ້ານການເມືອງ,ເສດຖະກິດ,ວັດທະນາທຳ ສັງຄົມ ແລະ ວຽກງານປກຊ ປກສ.

  ສ່ວນຕອນເຊົ້າຂອງວັນທີ 28 ມີນາ 2018 ທາງຄະນະນໍາ ນະຄອນລາວກ່າຍ ແລະ ເມືອງໄຊ ໄດ້ເຂົ້າພົບທ່ານ ສົມຈິດ ປັນຍາສັກ ຮອງເຈົ້າແຂວງ ອຸດົມໄຊ ເພື່ອລາຍງານຈຸດປະສົງຂອງການເຄື່ອນໄຫວພົບປະ,ຢ້ຽມຢາມແລະເຮັດວຽກຢູ່ແຂວງອຸດົມໄຊ ໃຫ້ການນຳແຂວງຮັບຊາບ. ຈາກນັ້ນ ຄະນະນຳ ນະຄອນລາວກ່າຍ ກໍໄດ້ສືບຕໍ່ເດີນ ທາງອອກຈາກແຂວງອຸດົມໄຊ ເພື່ອເຄື່ອນໄຫວວຽກງານຂອງຕົນຕາມວາລະ ເຊິ່ງມີເປົ້າຫມາຍຢູ່ທີ່ແຂວງຫຼວງພະບາງ.



© 2016 ສະຫງວນລິຂະສິດຫ້ອງວ່າການປົກຄອງແຂວງອຸດົມໄຊ
ຕັ້ງຢູ່ ບ້ານພູຂຽວ ເມືອງໄຊ ແຂວງອຸດົມໄຊ, ໂທ/ແຟັກ: (856-81) 312109,email: odx_gv04@yahoo.com