ຕິດຕໍ່ສອບຖາມ
Tel/Fax: 081 312109, email: odx_gv04@yahoo.com
 
 

ຂ່າວໃໝ

ໃນລະຫວ່າງວັນທີ 15-16 ມີຖຸນາ 2017 ນີ້ ທ່ານ ຫງວຽນ ບ່າ ຮຸ່ງ ເອກອັກຄະລັດສະທູດຜູ້ມີອຳນາດເຕັມແຫ່ງ ສສ ຫວຽດນາມປະຈຳລາວ ພ້ອມດ້ວຍຄະນະໄດ້ເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງອຸດົມໄຊ ພາຍຫຼັງທີ່ໄດ້ເດີນທາງມາເຖີງໃນຕອນທ່ຽງວັນທີ 15 ມີຖຸນາ 2017 ທີ່ໂຮງແຮມມິດຕະພາບແຂວງອຸດົມໄຊ ກໍໄດ້ມີການຮັບຕ້ອນຢ່າງອົບອຸ່ນຈາກການນຳຂອງແຂວງ ເຊີງນຳໂດຍທ່ານ ວັນນາ ແກ້ວສັນຕິ ກຳມະການພັກແຂວງ ຫົວໜ້າຫ້ອງວ່າການປົກຄອງແຂວງອຸດົມໄຊ,ພ້ອມຄະນະພັກແຂວງ,ຫົວໜ້າພະແນກການ,ອົງການ ສອງກອງບັນຊາການທະຫານ ຕຳຫຼວດ ແລະ ພະນັກງານວິຊາການອອກຕ້ອນຮັບ.

  

          ມາໃນຕອນບ່າຍຂອງວັນດຽວກັນທ່ານ ເອກອັກຄະລັດສະທູດ ພ້ອມດ້ວຍຄະນະ ແລະ ການນຳຂອງແຂວງອຸດົມໄຊ ໄດ້ເຂົ້າວາງພວງມາທີ່ອານຸສາວະລີນັກຮົບນິລະນາມລາວ-ຫວຽດນາມ ເພື່ອສະແດງຄວາມຮູ້ບຸນຄຸນຕໍ່ການເສຍສະຫຼະຊີວິດເລືອດເນື້ອຂອງນັກຮົບໃນການຕໍ່ສູ້ຕ້ານຈັກກະພັດຜູ້ຮຸກຮານໃນເມື່ອກ່ອນ. ຫຼັງຈາກນັ້ນກໍໄດ້ເຂົ້າພົບປະກັບທ່ານເຈົ້າແຂວງອຸດົມໄຊ ເພື່ອແຈ້ງຈຸດປະສົງຂອງການລົງມາເຄື່ອນໄຫວ ຢ້ຽມຢາມ ແລະ ເຮັດວຽກຢູ່ແຂວງອຸດົມໄຊຄັ້ງນີ້ ເຊີງໃນນັ້ນກໍໄດ້ມີການສົນທະນາກັນຫຼາຍປະເດັ່ນທີ່ພົວເຖີງການເສີ່ມສ້າງສາຍພົວພັນຮ່ວມມືມິດຕະພາບ ແລະ ການຊ່ວຍເຫຼືອເຊີງກັນ ແລະ ກັນ ໃນການພັດທະນາເສດຖະກິດຂອງສອງປະເທດ ເວົ້າລວມ ເວົ້າສະເພາະກໍແມ່ນການຮ່ວມ ຊ່ວຍເຫຼືອເຊີງກັນ ແລະ ກັນ ລະຫວ່າງແຂວງອຸດົມໄຊ ກັບບັນດາແຂວງພາກເໜືອຂອງ ສສຫວຽດນາມ. ນອກຈາກນີ້ກໍໄດ້ເຄື່ອນໄຫວຢ້ຽວຢາມພົບປະໂອ້ລົມກັບອ້າຍນ້ອງຫວຽດນາມຢູ່ບໍລິສັດ 705 ແລະ ຢ້ຽມຢາມ ພົບປະໂອ້ລົມກັບບັນດາອ້າຍນ້ອງສະມາຄົມຊາວຫວຽດນາມຢູ່ແຂວງອຸດົມໄຊ. ແລະ ມາໃນວັນທີ 16 ມີຖຸນາ 2017 ທ່ານເອກອັກຄະລັດສະທູດ ພ້ອມດ້ວຍຄະນະໄດ້ສືບຕໍ່ເຄື່ອນໄຫວຢ້ຽມຢາມສະຖານທີ່ທ່ອງທ່ຽວວັດພະເຈົ້າສິງຄຳເມືອງຫຼາ,ສະຖານທີ່ທ່ອງທ່ຽວບໍນ້ຳອຸ່ນເມືອງຫຼາ ແລະ ຢ້ຽມຢາມສູນບໍລິການຮ່ວມມືເຕັກນິກ ແລະ ຂະຫຍາຍແນວພັນກະສິກຳປ່າໄມ້. ພໍມາເຖີງຕອນບ່າຍຂອງວັນທີ 16 ມີຖຸນາ ທີ່ສະໜາມບິນແຂວງອຸດົມໄຊ ທ່ານເອກອັກຄະລັດສະທູດ ພ້ອມດ້ວຍຄະນະກໍໄດ້ອອກເດີນທາງກັບຄືນສູ່ນະຄອນຫຼວງວຽງຈັນ ໂດຍມີຄະນະນຳຂອງແຂວງອຸດົມໄຊ ພ້ອມດ້ວຍພະນັກງານຂະແໜງການອອກສົ່ງດ້ວຍຄວາມສະຫວັດດີພາບ.

 

ຂ່າວ:  ສີຈັນ ເກດວົງສາ

ແຂວງອຸດົມໄຊ ເມືອງແຫ່ງ ສະເໜ່

ແຫຼງທ່ອງທ່ຽວ

ສະຖິຕິການເຂົ້າຊົມເວັບໄຊ



© 2016 ສະຫງວນລິຂະສິດຫ້ອງວ່າການປົກຄອງແຂວງອຸດົມໄຊ
ຕັ້ງຢູ່ ບ້ານພູຂຽວ ເມືອງໄຊ ແຂວງອຸດົມໄຊ, ໂທ/ແຟັກ: (856-81) 312109,email: odx_gv04@yahoo.com