ຕິດຕໍ່ສອບຖາມ
Tel/Fax: 081 312109, email: odx_gv04@yahoo.com
 
 

ຂ່າວໃໝ

ກອງປະຊຸມປຶກສາຫາລື ຄວາມເປັນໄປໄດ້ໃນການຮ່ວມມືໂຄງການສາທິດການປູກພືດ ແລະ ລ້ຽງສັດ ເພື່ອທົດແທນການປູກຝິ່ນ ລະຫວ່າງ ແຂວງອຸດົມໄຊ ກັບ ແຂວງຢູນານ ສປຈີນ ຈັດຂຶ້ນໃນຕອນເຊົ້າວັນທີ 7 ກໍລະກົດ 2017 ຢູ່ທີ່ຫ້ອງປະຊຸມ ຂອງພະແນກແຜນການແລະການລົງທຶນແຂວງ ຕາງໜ້າການນຳຝ່າຍແຂວງອຸດົມໄຊ ໂດຍແມ່ນທ່ານ ສົມຈິດ ປັນຍາສັກ ຮອງເຈົ້າແຂວງ ຫົວໜ້າພະແນກການເງິນແຂວງ, ຝ່າຍຈີນ ແມ່ນທ່ານ ຫມາຈືມິງ ຮອງຫົວໜ້າການຄ້າ ເມືອງຄຸນມິງ ແຂວງຢູນານ ມີບັນດາຄະນະນໍາແລະຂະແໜງການທີ່ກ່ຽວຂ້ອງ ທັງສອງຝ່າຍເຂົ້າຮ່ວມ.

 ການປຶກສາຫາລືລະຫວ່າງ 2 ແຂວງອຸດົມໄຊ - ຢູນານ ໃນຄັ້ງນີ້ ກໍເພື່ອຮ່ວມມື ເຊິ່ງກັນແລະກັນໃນການຊອກຫາຊ່ອງທາງໃນການປັບປຸງແກ້ໄຂ ຊີວິດການເປັນຢູ່ຂອງປະຊາຊົນ ເຂດຫ່າງໄກຊອກຫຼີກ ທີ່ຢຶດຖືເອົາການປູກຝິ່ນ ເປັນອາຊີບ ໃຫ້ຫັນມາປະ ກອບອາຊີບທີ່ຖືກຕ້ອງແລະຫມັ້ນຄົງດ້ວຍການປູກພືດ ແລະ ລ້ຽງສັດ ທັງເປັນການແກ້ໄຂບັນຫາຢາເສບຕິດຢູ່ພາຍໃນແຂວງອຸດົມໄຊໃຫ້ຫຼຸດຫນ້ອຍ ຖອຍລົງ ແລະ ຍົກລະດັບຊີວິດການເປັນຢູ່ຂອງປະຊາຊົນໃຫ້ນັບມື້ນັບດີຂຶ້ນ. ເຊິ່ງການປຶກສາຫາລືທັງສອງຝ່າຍແມ່ນໄດ້ມີການສະເໜີ ແລກປ່ຽນບົດຮຽນເຊິ່ງກັນແລະກັນ ເພື່ອໃຫ້ມີຄວາມຈະແຈ້ງແລະມີຄວາມເຂົ້າໃຈລະອຽດຕໍ່ກັບບັນຫາທີ່ຈະຮ່ວມມືເຊິ່ງກັນແລະກັນໃນຕໍ່ໜ້າ ເປັນຕົ້ນແມ່ນ ຮູບແບບ,ເປົ້າໝາຍ,ຜົນທີ່ຈະໄດ້ຮັບແລະລາຍລະອຽດຂອງຂັ້ນຕອນຕ່າງໆ ໃນການ ເຄື່ອນໄຫວຈັດຕັ້ງປະຕິບັດ ໂຄງການສາທິດການປູກພືດ ແລະ ລ້ຽງສັດ.

 

 ໂອກາດດຽວກັນນີ້ ທັງສອງຝ່າຍກໍໄດ້ລົງນາມເຊັນບົດບັນທຶກ ກອງປະຊຸມປຶກສາຫາລືກັນໃນຄັ້ງນີ້ ເພື່ອເປັນບ່ອນອີງໃຫ້ແກ່ການລົງນາມເຊັນບົດບັນທຶກຮ່ວມມືເຊິ່ງກັນແລະກັນ ໃນໂຄງການສາທິດການປູກພືດ ແລະ ລ້ຽງສັດ ເພື່ອທົດແທນການປູກຝິ່ນໃນຂັ້ນຕອນຕໍ່ໄປ ທັງເປັນຂໍ້ມູນສຳຄັນໃນການນຳໄປສະເໜີຕໍ່ຂັ້ນເທິງ ຂອງທັງສອງຝ່າຍເພື່ອພິຈາລະນາ ລາຍລະອຽດ ຕື່ມອີກ.

ຂ່າວ: ຄານມະນີ ຮຽນດໍຈັນ

 

ແຂວງອຸດົມໄຊ ເມືອງແຫ່ງ ສະເໜ່

ແຫຼງທ່ອງທ່ຽວ

ສະຖິຕິການເຂົ້າຊົມເວັບໄຊ



© 2016 ສະຫງວນລິຂະສິດຫ້ອງວ່າການປົກຄອງແຂວງອຸດົມໄຊ
ຕັ້ງຢູ່ ບ້ານພູຂຽວ ເມືອງໄຊ ແຂວງອຸດົມໄຊ, ໂທ/ແຟັກ: (856-81) 312109,email: odx_gv04@yahoo.com