ຕິດຕໍ່ສອບຖາມ
Tel/Fax: 081 312109, email: odx_gv04@yahoo.com
 
 

ຂ່າວໃໝ

ຕອນແລງວັນທີ 29 ສິງຫາ 2017 ທ່ານ ວາງ ເວິນທ່ຽນ ເອກອັກຄະລັດຖະທູດ ແຫ່ງ ສາທາລະນະລັດ ປະຊາຊົນຈີນ ປະຈຳ ສປປລາວ ໄດ້ເຂົ້າພົບປະແລະຢ້ຽມຂໍານັບ ທ່ານ ເພັດສາຄອນ ຫຼວງອາໄພ ເຈົ້າແຂວງອຸດົມໄຊ ໃນພິທີມີບັນດາຄະນະນໍາຂອງທັງສອງຝ່າຍເຂົ້າຮ່ວມ.

ການເຂົ້າພົບປະ ແລະ ຢ້ຽມຂຳນັບຂອງທ່ານ  ເອກອັກຄະລັດຖະທູດ ສປຈີນ ໃນຄັ້ງນີ້ ທັງສອງຝ່າຍໄດ້ໂອ້ລົມ ແລະ ປຶກສາຫາລືບາງວຽກງານ ໂດຍສະເພາະແມ່ນສາຍພົວ ພັນການຮ່ວມືເຊິ່ງກັນ ແລະ ກັນລະຫວ່າງສອງຊາດ ລາວ ຈີນ ເວົ້າລວມ, ເວົ້າສະເພາະແມ່ນແຂວງອຸດົມໄຊ ກັບ ສປຈີນ ທີ່ມີມາຍາວນານ, ວຽກງານໂຄງການກໍ່ສ້າງເສັ້ນທາງລົດໄຟ ໜຶ່ງແລວທາງ - ໜຶ່ງເສັ້ນທາງ ເຊິ່ງທ່ານເພັດສາຄອນ ຫຼວງອາໄພ ເຈົ້າແຂວງອຸດົມໄຊ ໄດ້ລາຍງານສະພາບລວມ, ຄວາມຄືບໜ້າ ແລະ ບັນຫາທີ່ເປັນສິ່ງທ້າທາຍ ໃນການຈັດຕັ້ງປະຕິບັດໂຄງການ ພ້ອມທັງສະເໜີໃຫ້ຝ່າຍຈີນ ຊ່ວຍຊຸກຍູ້ ແລະ ແກ້ໄຂ ເປັນຕົ້ນແມ່ນເລື່ອງແຮງງານ, ການຮັບຊື້ ແລະ ບໍລິໂພກສະບຽງອາຫານທີ່ປະຊາຊົນລາວເປັນຜູ້ທຳການຜະລິດ ເພື່ອສ້າງລາຍຮັບໃຫ້ແກ່ປະຊາຊົນ, ການອໍານວຍຄວາມສະດວກໃຫ້ແກ່ອ້າຍນ້ອງປ້ອງກັນຊາດ, ປ້ອງກັນຄວາມສະຫງົບ ທີ່ປະຈໍາຢູ່ໃນແຕ່ລະຈຸດຂອງໂຄງການກໍ່ສ້າງ,ທົດແທ່ນ ແລະ ການຈັດສັນພື້ນທີ່ບ້ານແບບຢ່າງໃຫ້ແກ່ປະຊາຊົນທີ່ໄດ້ຮັບຜົນກະທົບ. ນອກນັ້ນ ຍັງໄດ້ສະເໜີໃຫ້ຝ່າຍຈີນ ຄົ້ນຄວ້າ ແລະ ພິຈາລະນາທຶນການສຶກສາໃຫ້ແກ່ ລູກຫຼານອຳນາດການປົກຄອງບ້ານ ແລະ ປະຊາຊົນ ທີ່ໄດ້ຮັບຜົນກະທົບຈາກໂຄງການເສັ້ນທາງລົດໄຟ ໃນຄັ້ງນີ້ ໄດ້ສຶກສາ ໂດຍສະເພາະແມ່ນດ້ານເຕັກນິກແລະວິຊາການຕ່າງໆ ກ່ຽວກັບການບໍລິການແລະຮັບໃຊ້ໃຫ້ແກ່ສະຖານີລົດໄຟ ເພື່ອຈະໄດ້ຮັບໃຊ້ຕົວຈິງ ພາຍຫຼັງໂຄງການກໍ່ສ້າງສຳເລັດ ແລະ ເຮັດໃຫ້ເຂົາເຈົ້າເຫຼົ່ານັ້ນມີວຽກເຮັດງານທຳ. ສ່ວນຝ່າຍ ເອກອັກຄະລັດຖະທູດ ແຫ່ງສປຈີນ ທ່ານ ວາງ ເວິນທ່ຽນ ໄດ້ຕົກລົງເຫັນດີຕໍ່ການສະເໜີ ຂອງທ່ານເຈົ້າແຂວງອຸດົມໄຊ ພ້ອມທີ່ຈະນໍາໄປພິຈາລະ ນາ ແລະ ຊ່ວຍແກ້ໄຂ ເພື່ອເຮັດໃຫ້ໂຄງການກໍ່ສ້າງເສັ້ນທາງລົດໄຟລາວ ຈີນ ໃນຄັ້ງນີ້ສຳເລັດຕາມລະດັບຄາດໝາຍ ແລະ ເວລາທີ່ກຳນົດໄວ້ ທັງເປັນການເພີ່ມທະວີການພົວ ພັນຮ່ວມມື ລະຫວ່າງສອງຊາດ ໃຫ້ມີຄວາມແໜ້ນແຟ້ນຍິ່ງຂຶ້ນ. ໂອກາດດັ່ງກ່າວ ທ່ານ ວາງ ເວິນທ່ຽນ ໄດ້ກ່າວຂອບໃຈຕໍ່ກັບການນຳແຂວງ ທີ່ໃຫ້ການຕ້ອນຮັບຢ່າງອົບອຸ່ນ ສ່ວນທ່ານ ເຈົ້າແຂວງອຸດົມໄຊ ກໍໄດ້ສະແດງຄວາມຂອບໃຈ ທີ່ທ່ານເອກອັກຄະລັດຖະທູດ ແຫ່ງສປຈີນ ປະຈຳ ສປປລາວ ເດີນທາງມາພົບປະແລະຢ້ຽມຂໍານັບໃນຄັ້ງນີ້ ພ້ອມທັງອວຍພອນໃຫ້ສໍາເລັດການເຄື່ອນໄຫວເຮັດວຽກຢູ່ພາກເໜືອຂອງລາວ ແລະ ເດີນ ທາງກັບສະຖານທີ່ປະຈໍາການດ້ວຍຄວາມສະຫວັດດີພາບ.         

   

ຂ່າວ: ຄານມະນີ ຮຽນດໍຈັນ

 

ແຂວງອຸດົມໄຊ ເມືອງແຫ່ງ ສະເໜ່

ແຫຼງທ່ອງທ່ຽວ

ສະຖິຕິການເຂົ້າຊົມເວັບໄຊ



© 2016 ສະຫງວນລິຂະສິດຫ້ອງວ່າການປົກຄອງແຂວງອຸດົມໄຊ
ຕັ້ງຢູ່ ບ້ານພູຂຽວ ເມືອງໄຊ ແຂວງອຸດົມໄຊ, ໂທ/ແຟັກ: (856-81) 312109,email: odx_gv04@yahoo.com