ຕອນແລງວັນທີ 26 ທັນວາ 2016 ນີ້ທາງການນໍາແຂວງອຸດົມໄຊ ເຊິ່ງນໍາໂດຍທ່ານ ເພັດສາຄອນ ຫຼວງອາໄພ ກຳມະການສູນກາງພັກ, ເລຂາພັກແຂວງ, ເຈົ້າແຂວງອຸດົມໄຊ ໄດ້ລົງຢ້ຽມຢາມຜູ້ປະກອບການຜະລິດກະສິກຳ ຢູ່ທີ່ບ້ານບໍ່ ເມືອງໄຊ ແຂວງອຸດົມໄຊ. ເຊິ່ງໃຫ້ກຽດຕ້ອນຮັບໂດຍທ່ານນາງ ບຸນມີ ຈະເລີນໄຊ ເຈົ້າຂອງ ຟາມໝູແລະສວນໝາກໄມ້.

  ການລົງຢ້ຽມຢາມຜູ້ປະກອບການຜະລິດກະສິກໍາຂອງບັນດາການນໍາແຂວງອຸດົມໄຊ ໃນຄັ້ງນີ້ ກໍເພື່ອສຶກສາໃນການນຳເອົາຮູບແບບ, ວິທີການຜະລິດ,ການປູກ,ການລ້ຽງ ຈາກສະ ຖານທີ່ດັ່ງກ່າວ ໄປໝູນໃຊ້ແລະຈັດຕັ້ງປະຕິບັດຢູ່ຈຸດອື່ນໆ ໃຫ້ໄດ້ຮັບຜົນ ໂດຍເນັ້ນໃສ່ສຶກສາແລະເກັບກຳຂໍ້ມູນກ່ຽວກັບຄວາມເໝາະສົມຂອງຂອບເຂດ,ສະຖານທີ່,ເນື້ອທີ່ດິນ,ຄຸນນະພາບຂອງດິນ ລວມທັງເຕັກ ນິກວິຊາການ ໃນການປູກ ແລະ ການລ້ຽງ ເຊິ່ງທັງໝົດນັ້ນ ກໍເພື່ອເປັນການວາງແຜນຈັດຕັ້ງປະຕິບັດ ໃນການຊຸກຍູ້ສົ່ງເສີມກ່ຽວກັບການທຳການຜະລິດດ້ານກະສິກຳ ລວມທັງເປັນການສ້າງວຽກເຮັດງານທຳໃຫ້ແກ່ພໍ່ແມ່ປະຊາຊົນ ແລະ ຜະລິດສະບຽງອາຫານເພື່ອຕອບສະໜອງໃຫ້ແກ່ສັງຄົມ ເປົ້າໝາຍອັນຫຼັກໃນໃກ້ໆນີ້ ກໍເພື່ອຕອບສະໜອງດ້ານສະບຽງອາຫານໃຫ້ພຽງພໍແກ່ບັນດາວິຊາການ ແລະ ກຳມະກອນຈາກ ສປຈີນ ທີ່ຈະເຂົ້າມາກໍ່ສ້າງເສັ້ນທາງລົດໄຟ ຢູ່ທີ່ແຂວງອຸດົມໄຊ. ສຳລັບສະຖານທີ່ທຳການຜະລິດກະສິກຳ ຫຼື ຟາມໝູແລະສວນໝາກໄມ້ ຢູ່ທີບ້ານບໍ່ ເມືອງໄຊ ຂອງທ່ານ ນາງບຸນມີ ຈະເລີນໄຊ ນີ້ ແມ່ນໄດ້ດຳເນີນຕັ້ງແຕ່ປີ 2008 ເປັນຕົ້ນມາ ແລະ ສາມາດຕອບສະໜອງດ້ານສະບຽງອາຫານໃຫ້ແກ່ສັງຄົມ ພາຍໃນແຂວງອຸດົມໄຊ ເປັນຕົ້ນແມ່ນ ໝູ,ປາ ລວມທັງ ໝາກໄມ້ ບາງຊະນິດ ເປັນຈຳ ນວນຫຼວງຫຼາຍໃນປີໜຶ່ງໆ ສາມາດພັດທະນາເສດຖະກິດຄອບຄົວໃຫ້ນັບມື້ນັບດີຂຶ້ນເທື່ອລະກ້າວ.

  ພາຍຫຼັງທີ່ທາງການນໍາແຂວງໄດ້ສໍາຫຼວດເບິ່ງບໍລິເວນສວນແລະສະຖານທີ່ທໍາການຜະ ລິດດັ່ງກ່າວແລ້ວ ທ່ານ ເພັດສາຄອນ ຫຼວງອາໄພ ເຈົ້າແຂວງອຸດົມໄຊ ກໍໄດ້ເນັ້ນໃຫ້ຂະ  ແໜງການທີ່ກ່ຽວຂ້ອງເກັບກຳເອົາຂໍ້ມູນທີ່ຈຳເປັນໄປໝູນໃຊ້ແລະຈັດຕັ້ງປະຕິບັດຢູ່ໃນຈຸດອື່ນທີ່ເຫັນວ່າເໝາະສົມ ເພື່ອຂະຫຍາຍຕາໜ່າງກ່ຽວກັບວຽກງານກະສິກຳ ໃຫ້ກວ້າງຂວາງ ແລະ ສາມາດຕອບສະໜອງດ້ານສະບຽງອາຫານໃຫ້ພຽງພໍແກ່ການບໍລິໂພກຂອງສັງຄົມ ລວມທັງເປັນສິນຄ້າຫຼັກຂອງແຂວງ ໃນການສົ່ງອອກຕື່ມອີກ.

 

ຂ່າວ: ຄານມະນີ ຮຽນດໍຈັນ

ຫົວຂໍ້ທີ່ກ່ຽວຂ້ອງ



© 2016 ສະຫງວນລິຂະສິດຫ້ອງວ່າການປົກຄອງແຂວງອຸດົມໄຊ
ຕັ້ງຢູ່ ບ້ານພູຂຽວ ເມືອງໄຊ ແຂວງອຸດົມໄຊ, ໂທ/ແຟັກ: (856-81) 312109,email: odx_gv04@yahoo.com