ທ້າຍອາທິດຜ່ານມາ ທາງຄະນະນໍາຂອງແຂວງເຊິ່ງນໍາໂດຍທ່ານ ເພັດສາຄອນ ຫຼວງອາໄພ ເລຂາພັກແຂວງ,ເຈົ້າແຂວງອຸດົມໄຊ,ທ່ານ ພົນຈັດຕະວາ ຈັນທະວອນ ໄຊຍະຜົງ ຫົວໜ້າກອງບັນຊາການ ທະຫານແຂວງ,ທ່ານ ພອນສະຫວັນພັນທະວິຈິດ ຫົວໜ້າພະແນກ ຖວທ ແຂວງພ້ອມດ້ວຍຫົວໜ້າພະແນກການທີ່ກ່ຽວຂ້ອງແລະວິຊາການໄດ້ພ້ອມກັນລົງສຳຫຼວດພື້ນທີ່ເພື່ອສ້າງເປັນຄ້າຍທະຫານ ກອງຮ້ອຍທີ 2 ແຫ່ງໃຫມ່ຢູ່ທີ່ບ້ານ ມົກກົກ ເມືອງໄຊ. ສາເຫດທີ່ເຮັດໃຫ້ບັນດາການນຳແຂວງພ້ອມດ້ວຍພາກສ່ວນທີ່ກ່ຽວຂ້ອງ ໂດຍສະເພາະແມ່ນທາງກອງບັນຊາການ ທະຫານແຂວງລົງສຳຫຼວດກວດກາເບິ່ງພື້ນທີ່ເພື່ອສ້າງເປັນຄ້າຍທະຫານ ໃຫ້ແກ່ກອງຮ້ອຍ ທີ2ແຫ່ງໃຫມ່ແມ່ນເນື່ອງມາຈາກ ສະຖານທີ່ຄ້າຍແຫ່ງເກົ່າຢູ່ທີ່ບ້ານປຸງລຽນ ເຂດບ້ານ ຫຼັກ 32 ເມືອງໄຊແມ່ນຖືກໂຄງການໃຫມ່ເຊິ່ງແຂວງໄດ້ກຳນົດເອົາສະຖານທີ່ຄ້າຍເກົ່າຂອງກອງຮ້ອຍ 2 ສ້າງເປັນຄ້າຍຄຸມຂັງ ດັ່ງນັ້ນທາງກອງບັນຊາການທະຫານແຂວງອຸດົມໄຊ ຈິ່ງໄດ້ສົມທົບກັບແຂວງເພື່ອຊອບສະຖານທີ່ໃຫມ່ທີ່ເໝາະສົມສ້າງຕັ້ງເປັນຄ້າຍທະຫານ ໃຫ້ແກ່ພາກສ່ວນດັ່ງກ່າວເຊິ່ງຜ່ານການສຳຫຼວດຕົວຈິງແລ້ວທຸກພາກສ່ວນໄດ້ເຫັນດີເປັນເອກະພາບກັນກຳນົດເອົາຈຸດບ້ານ ມົກກົກ ຫ່າງຈາກເທດສະບານແຂວງ ໄປທາງ ຫຼວງພະບາງ 16ກິໂລແມັດ ເປັນຈຸດທີ່ຕັ້ງຄ້າຍເນື່ອງຈາກສະຖານທີ່ດັ່ງກ່າວມີຄວາມເຫມາະສົມທີ່ສຸດ,ມີຄວາມສະດວກສະບາຍທັງການຝຶກແອບການທະຫານແລະການຜະລິດສະບຽງອາຫານຮັບໃຊ້ໃຫ້ແກ່ກົມກອງ ເປັນສະຖານທີ່ພູພຽງ ແລະ ກວ້າງຂວາງລວມເນື້ອທີທັງໝົດ 16 ກວ່າເຮັກຕາ. ສະຖານທີ່ດັ່ງກ່າວນີ້ຜ່ານມາເຄີຍເປັນຈຸດທໍາການຜະລິດ ຂອງ ສ ສ ຫວຽດນາມຈິ່ງເຮັດໃຫ້ພື້ນທີ່ ບໍ່ໄດ້ມີການປັບປຸງຫຍັງຫຼາຍ.ພາຍຫຼັງກໍານົດສະຖານທີ່ຕັ້ງໄດ້ແລ້ວທາງແຂວງຈະໄດ້ມອບໃຫ້ກັບພະແນກການທີ່ກຽວຂ້ອງໄກ່ເກ່ຍກັບປະຊາຊົນອ້ອມຂ້າງທີ່ລະເມີດໃນການນຳໃຊ້ດິນຂອງລັດທຳການຜະລິດແລະຄອບຄອງລວມທັງກຳນົດເຂດຫຼັກຫມາຍແລະຈັດສັນພື້ນທີ່ໃຫ້ລະອຽດເພື່ອສືບຕໍ່ໃນການກໍ່ສ້າງຄ້າຍດັ່ງກ່າວໃຫ້ເລັດຕາມລະດັບຄາດໝາຍ.

ຂ່າວ: ຄານມະນີ ຮຽນດໍຈັນ

ຫົວຂໍ້ທີ່ກ່ຽວຂ້ອງ



© 2016 ສະຫງວນລິຂະສິດຫ້ອງວ່າການປົກຄອງແຂວງອຸດົມໄຊ
ຕັ້ງຢູ່ ບ້ານພູຂຽວ ເມືອງໄຊ ແຂວງອຸດົມໄຊ, ໂທ/ແຟັກ: (856-81) 312109,email: odx_gv04@yahoo.com