ວັນທີ 19 ພຶດສະພາ 2017 ບັນດາການນໍາແຂວງອຸດົມໄຊ ເຊິ່ງນໍາໂດຍທ່ານ ເພັດສາຄອນ ຫຼວງອາໄພ ເຈົ້າແຂວງອຸດົມໄຊ ໄດ້ພ້ອມກັນລົງເຄື່ອນໄຫວເຮັດວຽກຢູ່ທີ່ີເມືອງປາກແບງ ເຊິ່ງໃຫ້ການຕ້ອນຮັບໂດຍທ່ານ ຄຳເຜີຍ ງອນວັນຄຳ ເຈົ້າເມືອງປາກແບງ ພ້ອມຄະນະ.

 ການລົງເຄື່ອນໄຫວເຮັດວຽກຂອງບັນດາການນໍາແຂວງອຸດົມໄຊ ໃນຄັ້ງນີ້ ກ່ອນອື່ນແມ່ນ ໄດ້ພົບປະໂອ້ລົມກັບປະຊາຊົນບ້ານໄຊຊະນະເພື່ອຮັບຟັງການລາຍງານສະພາບລວມ,ຂໍ້ສະດວກ,ຂໍ້ຫຍຸ້ງຍາກຂອງການດຳລົງຊີວິດ ພ້ອມທັງນໍາເອົາຂໍ້ສະເໜີຕ່າງໆຂອງປະຊາຊົນແລະອຳນາດການປົກຄອງບ້ານໄປພິຈາລະນາແກ້ໄຂໂດຍມອບໃຫ້ກັບບັນດາພະແນກການທີ່ກ່ຽວຂ້ອງເປັນຜູ້ຮັບຜິດຊອບໃນການຈັດຕັ້ງປະຕິບັດຕົວຈິງໂດຍສະເພາະແມ່ນການກໍານົດອາຊີບທີ່ເໝາະສົມ,ແກ້ໄຂສະພາບແວດລ້ອມພາຍໃນບ້ານ,ກໍ່ສ້າງລະບົບນ້ຳລິນສະອາດ ແລະ ສະຖານທີ່ເຮັດວຽກຂອງອໍານາດການປົກຄອງບ້ານ ແນ່ໃສ່ເຮັດໃຫ້ຊິວິດການເປັນຢູ່ຂອງປະຊາຊົນດີຂຶ້ນ. ຈາກນັ້ນ ບັນດາທິມງານດັ່ງກ່າວ ໄດ້ເດີນທາງໄປສະຫຼວດກວດກາເບິ່ງທ່າເຮືອ ເພື່ອເກັບກໍາສະພາບຂອງນັກທ່ອງທ່ຽວທີ່ເດີນທາງເຂົ້າ ອອກ ລວມທັງວາງແຜນກຳນົດການກໍ່ສ້າງທາເຮືອແຫ່ງໃຫມ່ ແນ່ໃສ່ຮອງຮັບໃຫ້ແກ່ນັກທ່ອງທ່ຽວ ແລະ ເຮືອຂົນສົ່ງສິນຄ້າ ທີ່ເຫັນວ່າມີທ່າອ່ຽງເພີ່ມຂຶ້ນ.

 ນອກນັ້ນ ຍັງໄດ້ເດີນທາງໄປຢ້ຽມຢາມເບິ່ງໂຄງການກໍ່ສ້າງໂຮງຮຽນຫຼັງໃຫມ່ ຂອງໂຮງຮຽນ ມັດທະຍົມສົມບູນ ປາກແບງ ທີ່ໄດ້ຮັບທຶນຊ່ວຍເຫຼືອຈາກ ສສຫວຽດນາມ. ພາຍຫຼັງສຳເລັດການເຄື່ອນໄຫວເຮັດວຽກຢ່າງເປັນທາງການແລ້ວ ບັນດາການນຳແຂວງ ໄດ້ໄປຢ້ຽມຊົມສະຖານທີ່ທ່ອງທ່ຽວທີ່ສຳຄັນຂອງແຂວງ ໂດຍສະເພາະແມ່ນ ວັດຈອມແຈ້ງ ເຊິ່ງເປັນວັດທີ່ເກົ່າແກ່ ທີ່ຢູ່ຄູ່ກັບປະຊາຊົນຊາວເມືອງປາກແບງ ມາເປັນເວລາຫຼາຍຮ້ອຍປີ ແລະ ຫຼາຍຊົ່ວອາຍຸຄົນ ລວມທັງຢ້ຽມຢາມເບິ່ງສະຖານທີ່ບໍລິການແຫ່ງໃຫມ່ຂອງເມືອງປາກແບງ ກໍຄື ເຮືອນພັກປາກແບງ ຣີສອດ ຫຼື ປາກແບງຣອດ ເຊິ່ງເຮືອນພັກດັ່ງກ່າວ ເປັນເຮືອນພັກທີ່ມີຄວາມສວຍງາມແລະທັນສະໄໝ ສ້າງຂຶ້ນເພື່ອຮອງຮັບໃຫ້ແກ່ນັກທ່ອງທ່ຽວຕ່າງປະເທດໂດຍສເພາະ.

  ສະຫຼຸບລວມແລ້ວ ການເຄື່ອນໄຫວເຮັດວຽກຢູ່ທີ່ເມືອງປາກແບງ ຂອງການນໍາແຂວງອຸດົມໄຊ ໃນຄັ້ງນີ້ ກໍເພື່ອລົງສຳຫຼວດເບິ່ງບັນດາທ່າແຮງຂອງເມືອງທີ່ຈະພັດທະນາ ໃນຕໍ່ໜ້າ ທັງເປັນການຢ້ຽມຢາມຖາມຂ່າວ ແລະ ຊຸກຍູ້ໃຫ້ກຳລັງໃຈພໍ່ແມ່ປະຊາຊົນຕື່ມອີກ.

ຂ່າວ: ຄານມະນີ ຮຽນດໍຈັນ

ຫົວຂໍ້ທີ່ກ່ຽວຂ້ອງ



© 2016 ສະຫງວນລິຂະສິດຫ້ອງວ່າການປົກຄອງແຂວງອຸດົມໄຊ
ຕັ້ງຢູ່ ບ້ານພູຂຽວ ເມືອງໄຊ ແຂວງອຸດົມໄຊ, ໂທ/ແຟັກ: (856-81) 312109,email: odx_gv04@yahoo.com