ການກໍ່ສ້າງເສັ້ນທາງລົດໄຟ ຢູ່ຊ່ວງໄລຍະແຂວງອຸດົມໄຊ ໃນແຕ່ລະຈຸດພວມເລັ່ງດຳເນີນການກໍ່ສ້າງ ດັ່ງນັ້ນ ການນຳແຂວງ ເຊິ່ງນຳໂດຍທ່ານ ເພັດສາຄອນ ຫຼວງອາໄພ ເຈົ້າແຂວງອຸດົມໄຊ ພ້ອມດ້ວຍຄະນະ ຈຶ່ງພ້ອມກັນລົງສໍາຫຼວດກວດກາເບິ່ງໂຄງການກໍ່ສ້າງດັ່ງກ່າວ ຢູ່ຈຸດບ້ານນາຄົກ ເມືອງງາ ແຂວງອຸດົມໄຊ.

 ການລົງເຄື່ອນໄຫວສຳຫຼວດກວດກາເບິ່ງຄວາມຄືບໜ້າຂອງການກໍ່ສ້າງເສັ້ນທາງລົດໄຟ ລາວ-ຈີນ ຢູ່ຈຸດບ້ານນາຄົກ ເມືອງງາ ໃນຄັ້ງນີ້ ກໍເພື່ອຊອກຮູ້,ເກັບກໍາຂໍ້ມູນ,ຄວາມຄືບໜ້າຂອງການກໍ່ສ້າງ,ຂໍ້ສະດວກ,ຂໍ້ຫຍຸ້ງຍາກຂອງການດຳເນີນງານ ເຊິ່ງໂອກາດດັ່ງກ່າວ ທ່ານ ເກິນ ຈິງລີ ຫົວໜ້າຄຸມງານຢູ່ຈຸດເມືອງງາ ໄດ້ລາຍງານສະພາບລວມຂອງການກໍ່ສ້າງ ເຊິ່ງມາຮອດປັດຈຸບັນທາງໂຄງການແມ່ນກໍ່ສ້າງສໍາເລັດບາງໜ້າວຽກແລ້ວ ໂດຍສະເພາະແມ່ນ ແຄັມພັກເຊົ່າ ສ່ວນວຽກຫຼັກທີ່ພວມຈັດຕັ້ງປະຕິບັດໃນຄະນະນີ້ແມ່ນການ ປັບປຸງກໍ່ສ້າງເສັ້ນທາງ,ຂົວ ເພື່ອຮັບໃຊ້ເຂົ້າໃນການຂົນສົ່ງວັດສະດຸແລະອຸປະກອນຮັບໃຊ້ການກໍ່ສ້າງ,ກໍ່ສ້າງຂົວຂອງເສັ້ນທາງລົງໄຟແລະເຈາະອຸໂມງ ເຊິ່ງຢູ່ໃນເມືອງງາ ທີ່ພວມເຈາະແມ່ນມີທັງໝົດ 8 ຈຸດ ລວມທັງລາຍງານກ່ຽວກັບການຍົກຍ້າຍປະຊາຊົນ ບ້ານດັ່ງກ່າວອອກຈາກເຂດທີ່ກຳນົດ ໄປຢູ່ບ່ອນທີ່ກໍານົດໄວ້ ໂດຍສະເພາະແມ່ນຈຸດສະຖານີ ແລະ ເຂດອ້ອມຂ້າງ.

 

 ຈາກນັ້ນ ບັນດາພາກສ່ວນທີ່ກ່ຽວຂ້ອງກໍໄດ້ສະເໜີບາງບັນຫາທີ່ຍັງສົ່ງຜົນກະທົບໃຫ້ແກ່ການກໍ່ສ້າງເສັ້ນທາງ ໃນຄັ້ງນີ້ ທັງຝ່າຍພາກລັດຂອງແຂວງແລະຝ່າຍບໍລິສັດຜູ້ຮັບເຫມົາກໍ່ສ້າງ ເປັນຕົ້ນແມ່ນລະບຽບຫຼັກການຂອງການເຂົ້າມາເຄື່ອນໄຫວເຮັດວຽກຢູ່ພາຍໃນແຂວງອຸດົມໄຊ ຂອງກຳມະການຈີນ,ການນຳໃຊ້ລົດຮັບໃຊ້ໂຄງການ,ການບັນທຸກວັດສະດຸໜັກເກີນກຳນົດ,ການຂາດການພົວພັນປະສານງານລະຫວ່າງການນຳເມືອງແລະບໍລິສັດຜູ້ຮັບເຫມົາ ເພື່ອແກ້ໄຂ ບັນຫາດັ່ງກ່າວແລະເຮັດໃຫ້ການເຄື່ອນໄຫວກໍ່ສ້າງເສັ້ນທາງລົດໄຟລາວຈີນ ສະເພາະຊ່ວງແຂວງອຸດົມໄຊ ດໍາເນີນໄປຕາມທິດທາງແຜນການແລະກຳນົດເວລານັ້ນ ທ່ານ ເພັດສາຄອນ ຫຼວງອາໄພ ເຈົ້າແຂວງອຸດົມໄຊ ໄດ້ມີຄໍາເຫັນ ພ້ອມທັງແນະນຳໃນການແກ້ໄຂບັນຫາ ແລະ ພ້ອມຈະໃຫ້ຄວາມຮ່ວມມື,ອຳນວຍຄວາມສະດວກໃຫ້ແກ່ໂຄງການກໍ່ສ້າງ. ຈາກນັ້ນ ທັງສອງຝ່າຍໄດ້ພ້ອມກັນຢ້ຽມຊົມເບິ່ງການກໍ່ສ້າງຕົວຈິງ ໂດຍສະເພາະແມ່ນການຂຸດເຈາະອຸໂມງ ຕື່ມອີກ.

ຂ່າວ: ຄານມະນີ ຮຽນດໍຈັນ

ຫົວຂໍ້ທີ່ກ່ຽວຂ້ອງ



© 2016 ສະຫງວນລິຂະສິດຫ້ອງວ່າການປົກຄອງແຂວງອຸດົມໄຊ
ຕັ້ງຢູ່ ບ້ານພູຂຽວ ເມືອງໄຊ ແຂວງອຸດົມໄຊ, ໂທ/ແຟັກ: (856-81) 312109,email: odx_gv04@yahoo.com