ພິທີເປີດຮັບການບໍລິຈາກເງິນ ແລະ ວັດຖຸປັດໃຈຕ່າງໆ ຢ່າງເປັນທາງການຂອງແຂວງອຸດົມໄຊ ໄດ້ຈັດຂຶ້ນໃນຕອນເຊົ້າວັນທີ 1 ສິຫາ 2018 ຢູ່ທີ່ສະໂມສອນ ໃຫຍ່ຂອງແຂວງ ໂດຍການເປັນປະທານຂອງທ່ານ ຄຳພຽງ ຢາຈົງວາ ຮອງເລຂາພັກແຂວງ,ຮອງເຈົ້າແຂວງ ຜູ້ປະຈໍາການ,ມີບັນດາການນໍາຂັ້ນແຂວງ,ເມືອງ, ຕະຫຼອດຮອດບັນດາພະແນກການ,ອົງການຈັດຕັ້ງ,2 ກອງບັນຊາການ,ລັດວິສາຫະກິດ,ນັກທຸລະກິດ,ຜູ້ປະ ກອບການຕ່າງໆ ພາຍໃນແຂວງເຂົ້າຮ່ວມຢ່າງພ້ອມພຽງ.

  ການຈັດຕັ້ງ ຮັບບໍລິຈາກ ໃນຄັ້ງນີ້ ກໍເພື່ອປະກອບສ່ວນເຂົ້າໃນການຊຸກຍູ້ຊ່ວຍເຫຼືອ ປະຊາຊົນ ຜູ້ທີ່ປະສົບໄພນ້ຳຖ້ວມ ກໍຄື ຜູ້ທີ່ໄດ້ຮັບຜົນກະທົບຈາກໄພນ້ໍາຖ້ວມ,ດິນເຊາະເຈື່ອນ ໃນໄລຍະເດືອນ ກໍລະກົດ ຜ່ານມາ ເປັນຕົ້ນແມ່ນ ແຂວງອຸດົມໄຊ,ແຂວງອັດຕະປື ແລະ ບັນດາແຂວງ ໃນສສ ຫວຽດນາມ. ພາຍຫຼັງທີ່ສຳເລັດການຮັບບໍລິຈາກແລ້ວ ທາງແຂວງຈະໄດ້ນໍາເອົາວັດຖຸສິ່ງຂອງ ແລະ ເງິນທີ່ໄດ້ຈາກການບໍລິຈາກ ດັ່ງກ່າວ ຈັດແບ່ງ ແລະ ມອບໃຫ້ກັບບັນດາແຂວງທີ່ໄດ້ຮັບຜົນກະທົບ ຕາມຄວາມເຫມາະສົມ. ເຊິ່ງການບໍລິຈາກໃນຄັ້ງນີ້ ກໍປະກອບມີຫຼາຍພາກສ່ວນ ນັບທັງການນໍາຂັ້ນແຂວງ,ເມືອງ,ພະ ແນກການ,ອົງການຈັດຕັ້ງ,2 ກອງບັນຊາການ ປກຊ ປກສ,ລັດວິສາຫະກິດ,ບັນດານັກທຸ ລະກິດ,ຜູ້ປະກອບການ,ຫ້າງຮ້ານ ຕະຫຼອດຮອດ ມວນຊົນຊາວແຂວງອຸດົມໄຊ. ໃຫ້ກຽດຮັບ ມອບເຄື່ອງບໍລິຈາກໂດຍທ່ານ ໂອວາດ ຈັນທະວົງ ຄະນະປະຈໍາພັກແຂວງ,ປະທານອົງການແນວລາວສ້າງຊາດແຂວງ,ຫົວໜ້າຄະນະຮັບຜິດຊອບຮັບ ການບໍລິຈາກ ເພື່ອຊ່ວຍເຫຼືອຜູ້ປະສົບໄພນ້ຳຖ້ວມ. ສໍາຫຼັບສິ່ງຂອງທີ່ທຸກພາກສ່ວນນໍາມາບໍລິຈາກໃນມື້ທຳອິດນີ້ ສ່ວນໃຫຍ່ຈະເປັນເງິນສົດ ລວມທັງຫມົດ 196 ລ້ານກີບ ກັບ 1000 ຢວນແລະ ເຄື່ອງອຸປະໂພກ,ບໍລິໂພກ ຈຳນວນໜຶ່ງ ເປັນຕົ້ນແມ່ນ ເຄື່ອງນຸ່ງຫົ່ມ,ອາຫານສຳເລັດຮູບ ແລະ ເຄື່ອງປຸງແຕ່ງອາຫານຕ່າງໆ ເປັນເງິນຈຳນວນ 43 ກວ່າລ້ານກີບ. ລວມເປັນມູນຄ່າທັງຫມົດ ປະມານ 240 ກວ່າລ້ານກີບ (01-08-2018).

  ໂອກາດດັ່ງກ່າວ ທ່ານ ຄໍາພຽງ ຢາຈົງວາ ຮອງເລຂາພັກແຂວງ,ຮອງເຈົ້າແຂວງອຸດົມໄຊ ໄດ້ກ່າວຂອບໃຈເປັນຢ່າງຍິ່ງຕໍ່ກັບທຸກພາກສ່ວນໃຫ້ສົນໃຈ ແລະ ໃຫ້ຄວາມສໍາຄັນໃນການປະກອບສ່ວນສົມທົບທຶນ ໃນການບໍລິຈາກ ເພື່ອຊ່ວຍເຫຼືອຜູ້ທີ່ໄດ້ຮັບຜົນກະທົບຈາກໄພນ້ໍາຖ້ວມ.

   ສຳລັບການບໍລິຈາກໃນຄັ້ງນີ້ ແມ່ນເປັນພຽງມື້ທຳອິດເທົ່ານັ້ນ ແລະ ຍັງຈະໄດ້ສືບຕໍ່ເຄື່ອນໄຫວຮັບບໍລິຈາກຕື່ມອີກ ຈົນຮອດວັນທີ 25 ສິງຫາ 2018 ເຊິ່ງຈຸດຮັບບໍລິຈາກຈະມີ 2 ຈຸດຄື ໜ້າຫ້ອງວ່າ ການປົກຄອງແຂວງ ແລະ ພະແນກແຮງງານ ແລະ ສະຫວັດດີການສັງຄົມແຂວງ ທ່ານໃດຢາກຮ່ວມບໍລິຈາກສາມາດເຂົ້າມາໄດ້ ເຊິ່ງຈະມີຄະນະຮັບຜິດຊອບຄ່ອຍຮັບການບໍລິຈາກຢູ່ຈຸດດັ່ງກ່າວ.

ຫົວຂໍ້ທີ່ກ່ຽວຂ້ອງ



© 2016 ສະຫງວນລິຂະສິດຫ້ອງວ່າການປົກຄອງແຂວງອຸດົມໄຊ
ຕັ້ງຢູ່ ບ້ານພູຂຽວ ເມືອງໄຊ ແຂວງອຸດົມໄຊ, ໂທ/ແຟັກ: (856-81) 312109,email: odx_gv04@yahoo.com