ຕອນເຊົ້າວັນທີ 1 ມິຖຸນາ ນີ້ທາງເມືອງໄຊ ແຂວງອຸດົມໄຊ ໄດ້ຈັດພິທີ ປູກຕົ້ນໄມ້ ໃນໂອກາດວັນປູກຕົ້ນໄມ້ ແຫ່ງຊາດ ແລະ ວັນເດັກນ້ອຍສາກົນ ຂຶ້ນຢູ່ທີ່ບ້ານກໍຫນ້ອຍ ເຂດອ່າງໂຕ່ງນ້ຳ ຫ້ວຍໄລ່ ເສັ້ນທາງເລກທີ່ 13 ເຫນືອ ກິໂລແມັດທີ່ 18 ເຊິ່ງໃຫ້ກຽດເຂົ້າຮ່ວມພິທີ ມີທ່ານ ຄຳພຽງ ຢາຈົງວາ ຮອງເຈົ້າແຂວງອຸດົມໄຊ,ທ່ານ ສີວັນຄຳ ອິນທະບຸບຜາ ຮອງເຈົ້າເມືອງໆ ໄຊ,ມີບັນດາການນໍາແຂວງ,ເມືອງ,ພະນັກງານລັດຖະກອນ,ກໍາລັງ ປກຊ ປກສ,ອໍານາດການປົກຄອງບ້ານ,ຄູ ອາຈານ ແລະ ນ້ອງນັກຮຽນ ເຂດດັ່ງກ່າວເຂົ້າຮ່ວມ.

  ການຈັດພິທີປູກຕົ້ນໄມ້ໃນຄັ້ງນີ້ ກໍເພື່ອເປັນການສະເຫຼີມສະຫຼອງ ວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ໃຫ້ມີບັນຍາກາດຟົດຟື້ນ,ມ່ວນຊື່ນ ແລະ ເຕັມໄປດ້ວຍຄວາມຫມາຍຄວາມສຳຄັນ,ເປັນການສ້າງຂະບວນການ,ຈິດສຳນຶກໃຫ້ແກ່ອະນາຄົດຂອງລູກຫຼານທີ່ເກີດໃຫມ່ໃຫຍ່ລຸນ,ເພື່ອເຮັດໃຫ້ປ່າໄມ້ມີຄວາມອຸດົມສົມບູນ ແລະ ຄືນສູ່ສະ ພາບປົກກະຕິ ໂດຍສະເພາະແມ່ນເຂດອ່າງໂຕ່ງນ້ຳ ຫ້ວຍໄລ່ ບ້ານກໍນ້ອຍນີ້ ນອກນັ້ນ ຍັງເປັນການປຸູກຕົ້ນໄມ້ ເພື່ອຫຼຸດຜ່ອນການນຳໃຊ້ໄມ້ ຈາກທໍາມະຊາດ ແລະ ປູກເພື່ອເປັນສິນຄ້າ.

  ສໍາຫຼັບເບ້ຍໄມ້ທີ່ນໍາມາປູກໃນຄັ້ງນີ້ ມີທັງຫມົດ 500 ກວ່າເບ້ຍ ເຊິ່ງປະກອບມີເບ້ຍໄມ້ແຕ້ຄ່າ,ໄມ້ດູ່ ແລະ ໄມ້ຫິ້ງ ແລະ ປູກໃນເນື້ອທີ 18,70 ເຮັກຕາ.

   ນອກຈາກການປູກຕົ້ນໄມ້ ຟື້ນຟູປ່າເຂດອ່າງຫ້ວຍໄລ່ ບ້ານກໍນ້ອຍ ນີ້ແລ້ວ ທາງເມືອງໄຊ ຍັງໄດ້ກຳນົດເປົ້າຫມາຍອື່ນອີກ 3 ເຂດ ໃນເນື້ອທີ່ 340 ເຮັກຕາ ເປັນຕົ້ນແມ່ນ ສາຍນ້ຳພາກ ເຂດໂພນໂຮມ,ສາຍນ້ຳງາ ເຂດນາຮ້ວງ ແລະ ສາຍນ້ຳງາ ເຂດຫົວນ້ຳງາ ໂດຍແນ່ໃສ່ເຮັດເນື້ອທີ່ປ່າຢູ່ແຂວງອຸດົມໄຊ ກວມ 70 %ໃນປີ 2020.

 

ຂ່າວ: ຄານມະນີ ຮຽນດໍຈັນ

ຫົວຂໍ້ທີ່ກ່ຽວຂ້ອງ



© 2016 ສະຫງວນລິຂະສິດຫ້ອງວ່າການປົກຄອງແຂວງອຸດົມໄຊ
ຕັ້ງຢູ່ ບ້ານພູຂຽວ ເມືອງໄຊ ແຂວງອຸດົມໄຊ, ໂທ/ແຟັກ: (856-81) 312109,email: odx_gv04@yahoo.com