ແຂວງອຸດົມໄຊ ຈັດງານສະເຫລີມສະຫລອງປີທ່ອງທ່ຽວລາວ 2018 ຢ່າງຍິ່ງໃຫຍ່ຕິດພັນກັບງານບຸນປະເພນີປີໃຫມ່ຂອງເຜົ່າກຶມມຸ(ບຸນຣຶນຶມ) ຂຶ້ນຢ່າງເປັນທາງການ ໃນວັນທີ 13 ມັງກອນ 2018 ນີ້ ທີ່ສະຫນາມກິລາຂອງແຂວງ ໂດຍໃຫ້ກຽດເຂົ້າຮ່ວມຂອງທ່ານ ເພັດສາຄອນ ຫລວງອາໄພ  ກຳມະການສູນກາງພັກ ເລຂາພັກແຂວງ ເຈົ້າແຂວງອຸດົມໄຊ ທ່ານ ຄຳໄບ ດຳລັດ ຮອງປະທານສູນກາງແນວລາວສ້າງຊາດ, ທ່ານ ອຸ່ນທວງ ຂາວພັນ ຄະນະພັກກະຊວງ ຮອງລັດຖະມົນຕີກະຊວງ ຖະແຫຼງຂ່າວ ວັດທະນະທຳ ແລະ ທ່ອງທ່ຽວ ມີບັນດາທ່ານຮອງລັດຖະມົນຕີ, ຮອງເຈົ້າແຂວງອ້ອມຂ້າງ, ຫົວໜ້າກົມ, ຮອງກົມ, ການນຳຂັ້ນແຂວງ, ຫົວໜ້າພະແນກການ, ເຈົ້າເມືອງ, ຮອງ ເຈົ້າເມືອງ 7 ຕົວເມືອງ ພ້ອມດ້ວຍແຂກຖືກເຊີນ ຈາກ ສສ ຫວຽດນາມ,  ສປ ຈີນ, ລາຊະອານາຈັກໄທ ແລະ ປະຊາຊົນບັນດາເຜົ່າຊາວແຂວງອຸດົມໄຊ ເຂົ້າຮ່ວມຢ່າງຫຼວງຫຼາຍ. ໃນພິທີໄດ້ຮັບຟັງການ ລາຍງານການກະກຽມງານສະເຫລີມສະຫລອງປີທ່ອງທ່ຽວລາວຈາກທ່ານ ສົມຈິດ ປັນຍາສັກ  ຮອງເຈົ້າແຂວງ ປະທານຄະນະຊີ້ນຳໃນການຈັດງານສະເຫຼີມສະຫຼອງປີທ່ອງທ່ຽວລາວ 2018 ທີ່ແຂວງ ອຸດົມໄຊ ເຊີ່ງທ່ານໄດ້ກ່າວວ່າ: ຈຸດປະສົງການຈັດງານຄັ້ງນີ້ແມ່ນເພື່ອເປັນການອະນຸລັກວັດທະນະທຳທີ່ເປັນເອກະລັກ ແລະ ຮີດຄອງປະເພນີອັນດີງາມຂອງຊາດ, ຂອງແຂວງ ,ຖືເປັນເຫດການທີ່ມີຄວາມໝາຍຄວາມສຳຄັນເປັນຢ່າງຍິ່ງ, ພວກເຮົາມີຄວາມເອກອ້າງທະນົງໃຈ ທີ່ໄດ້ໂຄສະນາເຜີຍແຜ່ ກ່ຽວກັບວັດທະນະທຳ, ຮິດຄອງປະເພນີອັນດີງາມ, ວິຖີການດຳລົງຊີວິດຂອງປະຊາຊົນບັນດາເຜົ່າ ແຂວງອຸດົມໄຊ, ຜະລິດຕະພັນການທ່ອງທ່ຽວ ແລະ ສະຖານທີ່ແຫຼ່ງທ່ອງທ່ຽວອັນໂດດເດັ່ນແຂວງ. ພ້ອມນັ້ນ ການເປີດປີທ່ອງທ່ຽວລາວ 2018 ນີ້ ຍັງເປັນການສ້າງຄວາມເບີກບານມ່ວນຊື່ນ ກະຕຸ້ນເສດຖະກິດທາງກົງ ແລະ ທາງອ້ອມ ໂດຍສະເພາະຫົວໜ່ວຍທຸລະກິດທີ່ປິ່ນອ້ອມໃນຂະແໜງ ການທ່ອງທ່ຽວ. ນອກນັ້ນ ຍັງເປັນການສົ່ງເສີມການທ່ອງທ່ຽວທາງທຳມະຊາດ, ປະຫວັດສາດ ແລະ ວັດທະນະທຳ, ສຸມໃສ່ການພັດທະນາການທ່ອງທ່ຽວ ໃຫ້ສາມາດຮັບຮອງການເພີ່ມຂຶ້ນຂອງນັກທ່ອງທ່ຽວໃນ ປັດຈຸບັນ ແລະ ອະນາຄົດ, ເພື່ອເພີ່ມທະວີຄວາມເຂົ້າໃຈ ແລະ ຮັດແໜ້ນມິດຕະພາບ ຄວາມສາມັກຄີລະຫວ່າງແຂວງ ຕໍ່ແຂວງ, ປະເທດຕໍ່ປະເທດ, ລະຫວ່າງຊາດກັບບັນດາອະນຸ ພາກພື້ນ ແລະ ໃນໂລກ, ທັງເປັນການດຶງດູດນັກທ່ອງທ່ຽວເຂົ້າ ມາທ່ຽວຊົມແຂວງໃຫ້ຫຼາຍຂຶ້ນ. ດັ່ງຄຳຂວັນປີທ່ອງທ່ຽວ 2018 ຂອງແຂວງອຸດົມໄຊວ່າ:ທ່ຽວອຸດົມໄຊ ເມືອງແຫ່ງສະເໜ່ ທະເລພູເຂົາ ຊົນເຜົ່ານ້ຳໃຈດີການຈັດງານບຸນປະເພນີປີໃຫມ່ຂອງຊົນເຜົ່າກຶມມຸ(ຣຶນຶມ)ປີນີ້ ຄຽງຄູ່ກັບການ ເປີດປີທ່ອງທ່ຽວລາວ-ທ່ອງທ່ຽວ ອຸດົມໄຊ 2018 ເພື່ອດຶງດູດ ນັກທ່ອງທ່ຽວທັງພາຍໃນ ແລະ ຕ່າງປະເທດ ກໍຄືປະຊາຊົນ ລາວບັນດາເຜົ່າເຂົ້າມາຮ່ວມ ເພື່ອທ່ຽວຊົມປະເພນີ, ການນຸ່ງຖື, ສິລະປະວັນນະຄະດີ, ວິຖີຊີວິດຂອງຊົນເຜົ່າກຶມມຸ ເຊີ່ງໄດ້ຈັດມາສະແດງໃຫ້ເຫັນໃນງານຄັ້ງນີ້ ເພື່ອເປັນການອະນຸລັກ ແລະ ສົ່ງເສີມຮີດຄອງວັດທະນະທຳອັນດີງາມຂອງພີ່ນ້ອງເຜົ່າກຶມມຸ ແຂວງ ອຸດົມໄຊ. ຈາກນັ້ນ ທ່ານເຈົ້າແຂວງກໍໄດ້ກ່າວເປີດ ພິທີສະເຫຼີມສະຫຼອງປີທ່ອງທ່ຽວລາວ ພ້ອມທັງລັ່ນຄ້ອງ 9 ບາດ, ປ່ອຍປຸ່ມເປົ້າ ເພື່ອເປັນການຢັ້ງຢືນໃນການເປີດພິທີຢ່າງເປັນທາງການ. ໃນພິທີສະເຫລີມສະຫລອງຄັ້ງນີ້ໄດ້ມີການສະແດງສິລະປະວັນນະຄະດີຈາກມວນຊົນຊາວແຂວງ ອຸດົມໄຊຈຳນວນ 5 ລາຍການທີ່ສ່ອງແສງເຖິງເອກະລັກ ວິຖີຊີວິດ ວັດທະນະທຳຂອງຊາວແຂວງອຸດົມໄຊ ປະກອບດ້ວຍ ລາຍການພູຜາສາຍນ້ຳ, ມ່ວນໃຈປີໃຫ່ມລາວສິລະປະວັດທະນະທຳເຜົ່າລື້, ດອກຄາຍສຽງແຄນສີສັນວັດທະນະທຳຂອງເຜົ່າມົ້ງ, ສີສັນບັນດາເຜົ່າຂອງແຂວງ ອຸດົມໄຊ ແລະລາຍການວັດທະນະທຳອັນລ້ຳຄ່າຂອງເຜົ່າກຶມມຸ ເຊີ່ງນຳໃຊ້ນັກສະແດງຈາກໂຮງຮຽນຕ່າງໆໃນເທດສະບານແຂວງຫລາຍກວ່າ 700 ນ້ອງ.

ສຳລັບການຈັດງານສະເຫລີມສະຫລອງປີທ່ອງທ່ຽວລາວທີ່ແຂວງ ອຸດົມໄຊຕິດພັນກັບບຸນປະເພນີປີໃຫມ່ຂອງຊົນເຜົ່າກຶມມຸ ປະກອບດ້ວຍຫລາຍກິດຈະກຳທີ່ສ່ອງແສງໃຫ້ເຫັນແບບແຜນການດຳລົງຊີວິດຂອງຊົນເຜົ່າກຶມມຸເຊີ່ງໄດ້ນຳເອົາມາຈຳລອງໄວ້ໃນງານນີ້ເປັນຕົ້ນແມ່ນເຮືອນຊານ, ເຄື່ອງໃຊ້, ອາຫານ, ເຄື່ອງນຸ່ງຂອງຖື, ສິລະປະວັນນະຄະດີ. ພາຍຫລັງເປີດພິທີປີທ່ອງທ່ຽວສຳເລັດແລ້ວການນຳແຂວງ, ແຂກເຊີນ ແລະ ມວນຊົນໄດ້ເຂົ້າຮ່ວມບຸນປີໃຫມ່ຂອງຊົນເຜົ່າກຶມມຸດ້ວຍບັນຍາກາດເບີກບານມ່ວນຊື່ນ ເຊີ່ງງານຈະດຳເນີນຈົນເຖີງວັນທີ 15 ມັງກອນ 2018 ນີີ້ຈິ່ງຈະໄດ້ອັດລົງ.

ຫົວຂໍ້ທີ່ກ່ຽວຂ້ອງ



© 2016 ສະຫງວນລິຂະສິດຫ້ອງວ່າການປົກຄອງແຂວງອຸດົມໄຊ
ຕັ້ງຢູ່ ບ້ານພູຂຽວ ເມືອງໄຊ ແຂວງອຸດົມໄຊ, ໂທ/ແຟັກ: (856-81) 312109,email: odx_gv04@yahoo.com