ຕິດຕໍ່ສອບຖາມ
Tel/Fax: 081 312109, email: odx_gv04@yahoo.com
 
 

ຂ່າວໃໝ

ກອງປະຊຸມສະຫຼຸບລາຍງານແລະປຶກສາຫາລື ລະຫວ່າງລັດຖະມົນຕີ ກະຊວງໂຍທາທິການແລະຂົນສົ່ງ ກັບ ການນໍາແຂວງອຸດົມໄຊ ກ່ຽວກັບວຽກງານໄກ່ເກ່ຍສິ່ງກີດຂວາງໂຄງການກໍ່ສ້າງເສັ້ນທາງລົດໄຟລາວ ຈີນ ( ຊ່ວງຜ່ານແຂວງອຸດົມໄຊ ) ຄັ້ງທີ 2 ຈັດຂຶ້ນໃນຕອນເຊົ້າວັນທີ 30 ສິງຫາ 2017 ຢູ່ທີ່ຫ້ອງປະຊຸມຫ້ອງວ່າການປົກຄອງແຂວງ ໂດຍການເປັນປະທານຮ່ວມ ຂອງທ່ານ ປອ ບຸນຈັນ ສິນທະວົງ ລັດຖະ ມົນຕີກະຊວງໂຍທາທິການແລະຂົນສົ່ງ ແລະ ທ່ານ ເພັດສາຄອນ ຫຼວງອາໄພ ເຈົ້າແຂວງອຸດົມໄຊ,ມີບັນຄະນະນຳຂັ້ນສູນກາງ ແລະ ແຂວງອຸດົມໄຊ ເຂົ້າຮ່ວມ.

ການດຳເນີນກອງປະຊຸມປຶກສາຫາລືລະຫວ່າງສອງຝ່າຍໃນຄັ້ງນີ້ ກ່ອນອື່ນແມ່ນໄດ້ຮັບຟັງການສະ ຫຼຸບລາຍງານກ່ຽວກັບການເຄື່ອນໄຫວຈັດຕັ້ງປະຕິບັດວຽກງານຂອງຄະນະຮັບຜິດຊອບໄກ່ເກ່ຍສິ່ງກີດ ຂວາງ ແລະ ເວນຄືນທີ່ດິນ ໃນໄລຍະຜ່ານມາຈົນຮອດປັດຈຸບັນ ໂດຍລວມເຫັນວ່າ ປະຊາຊົນມີຄວາມເຂົ້າໃຈຕໍ່ກັບການລົງທຶນຂອງລັດຖະບານໃນການກໍ່ສ້າງເສັ້ນທາງລົດໄຟ ແຕ່ສິ່ງທີ່ປະຊາຊົນຍັງກັງວົນແມ່ນການຊໍ່າລະສະສາງໃຫ້ຮີບດ່ວນໂດຍສະເພາະແມ່ນເຂດທີ່ບໍ່ໄດ້ທຳການຜະລິດ ແມ່ນຕ້ອງການເງິນຊື້ເຂົ້າກິນ. ສ່ວນການກໍ່ສ້າງແມ່ນໄດ້ສົ່ງຜົນກະທົບຕໍ່ຜົນຜະລິດຂອງປະຊາຊົນຍ້ອນຜູ້ຮັບເໝົາກໍ່ສ້າງປະ ຕິບັດວຽກໃນຊ່ວງລະດູຝົນ ການຄຸ້ມຄອງທາງດ້ານເຕັກນິກບໍ່ໄປຕາມແຜນ ເປັນຕົ້ນແມ່ນບ້ານຫ້ວຍຍຳ ແລະ ກໍນ້ອຍ ເມືອງໄຊ ມີດິນຖົມສູງໄຫລເຈື່ອນຖົມນາແລະຮອງເໝືອງ ປະຊາຊົນ ນອກນັ້ນ ຍັງມີຫຼາຍຈຸດ ຂອງທັງ 3 ເມືອງຄື ເມືອງໄຊ,ເມືອງງາ ແລະ ເມືອງນາໝໍ້ ທີ່ໄດ້ຮັບຜົນກະທົບເຊັ່ນດຽວກັນ. ສໍາຫຼັບການແກ້ໄຂຄຳສະເໜີຂອງປະຊາຊົນ ທາງຄະນະຮັບຜິດຊອບໄດ້ປະສານສົມທົບກັບຄະນະກໍາມະການຂັ້ນເມືອງ,ບໍລິສັດຜູ້ຮັບເໝົາແລະ ປະຊາຊົນທີ່ໄດ້ຮັບຜົນກະທົບໄດ້ພ້ອມກັນໄກ່ເກ່ຍ,ເກັບກຳຜົນເສຍຫາຍ ແລະ ເຮັດບົດບັນທຶກຮ່ວມກັນ ເພື່ອທົດແທນໃຫ້ແກ່ປະຊາຊົນ. ສ່ວນການຄົ້ນຄວ້າລາຄາຫົວໜ່ວຍຊົດເຊີຍສິ່ງກີດຂວາງ ແມ່ນໄດ້ສົມທົບຄະນະກຳມະການປະເມີນທາບທາມລາຄາຫົວໜ່ວຍຂັ້ນແຂວງ,ກວດກາ ທົບທວນຄືນລາຄາທົບແທ່ນຜົນເສຍຫາຍທີ່ເຫັນວ່າຍັງບໍ່ທັນເຫມາະສົມແລະບໍ່ສອດຄອງກັບສະພາບຄວາມເປັນຈິງໃນແຕ່ລະທ້ອງຖິ່ນ. ຈາກນັ້ນ ບັນດາຜູ້ເຂົ້າຮ່ວມກໍໄດ້ພັດປ່ຽນກັນປະ ກອບຄຳເຫັນເຊິ່ງກັນແລະກັນຢ່າງກົງໄປກົງມາໃສ່ບັນຫາທີ່ກອງປະຊຸມໄດ້ຍົກຂຶ້ນ ໂດຍສະເພາະແມ່ນຄຳສະເໜີຂອງປະຊາຊົນ,ລາຄາຫົວໜ່ວຍທີ່ເໝາະສົມ,ການມອບຄວາມຮັບຜິດຊອບໃຫ້ແກ່ບໍລິສັດຜູ້ຮັບ ເໝົາ,ການປ້ອງກັນຄວາມສະຫງົບ ແລະ ແນວທາງໃນການແກ້ໄຂຂໍ້ຫຍຸ້ງຍາກການໃນການປະຕິບັດໂຄງການ ເຊິ່ງທາງຫົວໜ້າຄະນະຊີ້ນຳຂັ້ນສູງກາງ,ແຂວງ ໄດ້ເນັ້ນໜັກໃຫ້ທຸກພາກສ່ວນຈົ່ງພ້ອມກັນເອົາໃຈໃສ່ໃນການສືບຕໍ່ຈັດຕັ້ງປະຕິບັດການໄກ່ເກ່ຍແລະເວນຄືນທີ່ດິນໃຫ້ແກ່ປະຊາຊົນທັນຕາມກຳນົດເວລາ ແລະ ຄວາມເໝາະສົມ ໂດຍມີເປົ້າໝາຍແນ່ໃສ່ເຮັດໃຫ້ປະຊາຊົນໄດ້ຮັບຜົນປະໂຫຍດແລະ ພັດທະນາຊີວິດການເປັນຢູ່ໃຫ້ດີຂຶ້ນກວ່າທີ່ຜ່ານມາ.

  ນອກນັ້ນ ກອງປະຊຸມຍັງໄດ້ຮັບຟັງການຜ່ານແຜນການຈັດຕັ້ງປະຕິບັດວຽກງານໂດຍລວມ ປະຈໍາເດືອນກັນຍາ ປີ2017 ຕື່ມອີກ.

ຂ່າວ: ຄານມະນີ ຮຽນດໍຈັນ

 

 

ຫົວຂໍ້ທີ່ກ່ຽວຂ້ອງ

ແຂວງອຸດົມໄຊ ເມືອງແຫ່ງ ສະເໜ່

ແຫຼງທ່ອງທ່ຽວ

ສະຖິຕິການເຂົ້າຊົມເວັບໄຊ



© 2016 ສະຫງວນລິຂະສິດຫ້ອງວ່າການປົກຄອງແຂວງອຸດົມໄຊ
ຕັ້ງຢູ່ ບ້ານພູຂຽວ ເມືອງໄຊ ແຂວງອຸດົມໄຊ, ໂທ/ແຟັກ: (856-81) 312109,email: odx_gv04@yahoo.com