ພິທີເປີດງານແຂ່ງຂັນກິລາ ມິດຕະພາບ ແລະ ແລກປ່ຽນສິລະປະ ວັນນະຄະດີ ຂອງນັກຮຽນມັດ ທະຍົມສົມບູນຄັ້ງທີ 5 ແຂວງພາກເໜືອຂອງ ສປປລາວ ກັບ 1 ແຂວງດຽນບຽນຟຸູ ແຫ່ງສສຫວຽດ ນາມ ຄັ້ງທີ 11 ໄດ້ຈັດຂຶ້ນໃນຕອນເຊົ້າວັນທີ 23 ມັງກອນ 2018 ຢູ່ທີ່ສະໜາມກິລາໃຫຍ່ຂອງແຂວງ ອຸດົມໄຊ. ໂດຍການເປັນປະທານຂອງທ່ານ ຄຳພຽງ ຢາຈົງວາ ຮອງເຈົ້າແຂວງອຸດົມໄຊ,ປະທານຈັດງານແຂ່ງຂັນກິລານັກຮຽນມັດທະຍົມສົມບູນໃນຄັ້ງນີ້,ທ່ານ ສົມດີ ສີລາທອດ ຫົວໜ້າພະແນກສຶກສາທິການແລະກິລາແຂວງ, ມີການນຳຈາກແຂວງດຽນບຽນຟູ ສສຫວຽດນາມ,ຄະນະພະແນກ ສຶກສາທິການແລະກິລາ 5 ແຂວງພາກເໜືອລາວ,ຄະນະນໍາແຂວງອຸດົມໄຊ,ຄະນະນໍາ,ຄູ່ຝຶກ,ນັກກິລາ ແລະ ມວນຊົນພາຍໃນເທດສະບານແຂວງອຸດົມໄຊ ເຂົ້າຮ່ວມຢ່າງພ້ອມພຽງ.

  ການຈັດງານແຂ່ງຂັນກິລານັກຮຽນມັດທະຍົມ ໃນຄັ້ງນີ້ ແມ່ນເພື່ອສ້າງຄວາມສາມັກຄີ,ໄມຕີຈິດມິດ ຕະພາບ ລະຫວ່າງລາວ ຫວຽດນາມ,ເພື່ອສ້າງຄວາມເຂັ້ມແຂງທັງດ້ານການຮຽນ ການສອນ ຫຼັກສູດວິຊາ ພາລະ ແລະ ສິລະປະສຶກສາ ທັງເປັນການຫຼິ້ນກິລາເພື່ອສຸຂະພາບ,ມິດຕະພາບ,ຄວາມສາມັກຄີ ແລະ ຫ່າງໄກຈາກຢາເສບຕິດ ເຊິ່ງການແຂ່ງຂັນທາງເຈົ້າພາບອຸດົມໄຊ ໄດ້ກຳນົດເອົາ 4 ປະເພດກິລາ ຄື ກິລາບານເຕະຊາຍ,ກິລາກະຕໍ້ ຍິງ ຊາຍ,ກິລາດອກປີກໄກ່ ຍິງ ຊາຍ ແລະ ກິລາໜ້າເກັກ ຍິງ ຊາຍ ໂດຍມີຄະນະນຳ,ຄູ່ຝຶກແລະນັກກິລາ ເຂົ້າຮ່ວມທັງໝົດ 300ກວ່າຄົນ,ຍິງ 104ຄົນ ໃນຈຳ ນວນ 5 ແຂວງພາກເໜືອລາວ ຄື ແຂວງຜົ້ງສາລີ,ບໍ່ແກ້ວ,ຫຼວງນ້ຳທາ,ຫຼວງພະບາງ ແລະ ແຂວງອຸດົມໄຊ ພ້ອມກັບ 1 ແຂວງດຽນບຽນຟູ ຈາກ ສສຫວຽດນາມ. ການແຂ່ງຂັນຕົວຈິງແມ່ນກຳນົດ 4 ວັນ ຕັ້ງແຕ່ວັນທີ 23-26 ມັງກອນ 2018 ນີ້. ການແຂ່ງຂັນກິລາດັ່ງກ່າວ ແມ່ນເລີ່ມຕົ້ນຈັດຂຶ້ນຕັ້ງແຕ່ປີ 2007 ເປັນຕົ້ນມາ ໂດຍພັດປ່ຽນກັນເປັນເຈົ້າພາບ ສະເພາະແຂວງອຸດົມໄຊ ແມ່ນໄດ້ຮັບກຽດເປັນເຈົ້າພາບ ເປັນຄັ້ງທີ 2 ພາຍຫຼັງທີ່ໄດ້ຈັດແລ້ວຄັ້ງທຳອິດໃນປີ 2012. ສໍາລັບພິທີເປີດການແຂ່ງຂັນໃນຄັ້ງນີ້ ໄດ້ການເດີນສວນສະໜາມຈາກບັນດາກ້ອນກຳລັງ ຂອງເຍົາວະຊົນ,ຊາວໜຸ່ມ,ຄູ ອາຈາ,ນັກກິລາ ແຕ່ລະແຂວງ ແລະ ກ້ອນກຳລັງຂອງຄະນະກຳມະການ ລວມທັງ ຮັບຊົມສິລະປະການສະແດງຈາກນ້ອງນັກ ຮຽນພາຍໃນເທດສະບານແຂວງ ຈຳນວນໜຶ່ງ.

  ໂອກາດດັ່ງກ່າວ ທ່ານ ຄຳພຽງ ຢາຈົງວາ ຮອງເຈົ້າແຂວງອຸດົມໄຊ ທັງເປັນປະທານຈັດງານແຂ່ງຂັນໃນຄັ້ງນີ້ ໄດ້ມີຄໍາເຫັນພ້ອມທັງກ່າວເປີດງານແຂ່ງຂັນຢ່າງເປັນທາງການ.

ຂ່າວ: ຄານມະນີ ຮຽນດໍຈັນ

 

ຫົວຂໍ້ທີ່ກ່ຽວຂ້ອງ



© 2016 ສະຫງວນລິຂະສິດຫ້ອງວ່າການປົກຄອງແຂວງອຸດົມໄຊ
ຕັ້ງຢູ່ ບ້ານພູຂຽວ ເມືອງໄຊ ແຂວງອຸດົມໄຊ, ໂທ/ແຟັກ: (856-81) 312109,email: odx_gv04@yahoo.com