ບ້ານສີບຸນເຮືອງ ເມືອງຮຸນ ແຂວງອຸດົມໄຊ ແມ່ນຍົກຍ້າຍມາຈາກ ບ້ານຖິ່ນ, ປາກນ້ຳແຮງ ມາຕັ້ງເປັນບ້ານກໍຫົກ ເພາະແຕ່ກ່ອນມີ ກໍໄມ້ຫົກໃຫຍ່ ຕໍ່ມາໄລຍະໜຶ່ງ ມີພໍ່ເຖົ້າສີ ເປັນຜູ້ນຳພາປະຊາຊົນ ສ້າງສາພັດທະນາບ້ານ ເຮັດໃຫ້ບ້ານມີຄວາມຈະເລີນຮຸ່ງເຮືອງ ແລະ ທ່ານເຈົ້າເມືອງ ຫຼື ທີ່ຊາວບ້ານເອີ້ນກັນວ່າ ພະຍາເຈົ້າເມືອງໃນເວລານັ້ນ ໄດ້ປ່ຽນຊື່ ບ້ານມາເປັນ ບ້ານສີບຸນເຮືອງ ໃນປະຈຸບັນ.
ມາຮອດປີ 2005 ຫາ 2013 ໄດ້ເຕົ້າໂຮມເອົາ ບ້ານ ດອນແກ້ວ, ບ້ານ ຫ້ວຍເຮຍ ແລະ ບ້ານ ດອນເມືອງ ເຂົ້າມາເປັນ ບ້ານສີບຸນເຮືອງ ແລະ ມາທ້າຍປີ 2013 ເປັນຕົ້ນມາກໍ່ໄດ້ເລີ່ມເຮັດທົດລອງເປັນ ບ້ານ 3 ສ້າງ ຈົນມາຮອດປີ 2015 ໄດ້ມີການປະເມີນຄືນວຽກງານດັ່ງກ່າວ ເຊິ່ງກໍ່ໄດ້ຮັບນາມມະຍົດເປັນບ້ານພັດທະນາດີເດັ່ນແຫ່ງຊາດ.
ບ້ານ ສີບຸນເຮືອງ ເມືອງຮຸນ ຈັດເຂົ້າເປັນບ້ານເອກະລາດ ໃນປີ 2015 ແລະ ເປັນບ້ານໃຈກາງ ຂອງຈຸດສຸມ: ສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍ ໃນຊົນນະບົດ ຂຶ້ນກັບ ເມືອງຮຸນ, ແຂວງອຸດົມໄຊ, ຊຶ່ງຕັ້ງຢູ່ຫ່າງຈາກ ເທດສະບານເມືອງ ໄປທາງທິດຕາເວັນຕົກ 20 ກິໂລແມັດ ມີເນື້ອທີ່ທັງໝົດ 3,556 ເຮັກຕາ ແລະ ແບ່ງເປັນ 8 ປະເພດການນຳໃຊ້, ພື້ນທີ່ສ່ວນໃຫຍ່ເປັນເຂດພູດອຍ ກວມ 75% ຂອງເນື້ອທີ່ທັງໝົດ. ບ້ານສີບຸນເຮືອງ ມີ 807 ຫຼັງຄາເຮືອນ, ມີ 1,196 ຄອບຄົວ, ມີພົນລະເມືອງທັງໝົດ 4,799 ຄົນ, ຍິງ 2,403 ຄົນ, ໃນນັ້ນ ມີພົນລະເມືອງທຸກ 348 ຄົນ, ຍິງ 179 ຄົນ, ກວມ 7.14% ຂອງພົນລະເມືອງທັງໝົດ, ມີຄົວເຮືອນທຸກ 59 ຄົວເຮືອນ ກວມ 7.24% ຂອງຄົວເຮືອນທັງໝົດ, ພາຍໃນບ້ານ ປະກອບມີ 3 ຊົນເຜົ່າ, ຄື: ເຜົ່າລາວລຸ່ມ ກວມ 32%, ເຜົ່າກືມມຸ 49,5%, ເຜົ່າມົ້ງ 18,5%, ບ້ານສີບຸນເຮືອງ ແບ່ງອອກເປັນ 3 ຄຸ້ມໃຫ່ຍ, ມີ 45 ໜ່ວຍ ໃນການບໍລິຫານຄຸ້ມຄອງ, ປະຊາຊົນສ່ວນໃຫ່ຍແມ່ນ ຍຶດຖືອາຊີບການເຮັດການກະສິກຳ ເຊັ່ນ: ການປູກພືດເປັນສິນຄ້າ ແລະ ເຮັດນາເປັນອາຊີບຕົ້ນຕໍ, ສ່ວນອາຊີບສຳຮອງແມ່ນ ການລ້ຽງສັດ, ຄ້າຂາຍ ແລະ ບໍລິການຈຳນວນໜຶ່ງ.
ຜົນສໍາເລັດຂອງການປະເມີນ ຕາມມາດຕະຖານສ້າງບ້ານໃຫຍ່ ເປັນຕົວເມືອງນ້ອຍໃນຊົນນະບົດຂອງ ບ້ານ ສີບຸນເຮືອງ ຕາມດໍາລັດ 348/ລບ, ບົນພື້ນຖານແມ່ນໄດ້ປະເມີນຜ່ານ ຕາມ 16 ມາດຕະຖານສ້າງບ້ານໃຫ່ຍ ກາຍເປັນຕົວເມືອງນ້ອຍໃນຊົນນະບົດ ຕາມດໍາ ລັດ 348/ລບ ແລະ ບົດແນະນໍາ 0830/ກປ ຜ່ານການຈັດຕັ້ງປະຕິບັດເຫັນວ່າ ແຕ່ລະມາດຖານ ແມ່ນຜ່ານຕາມມາດຖານທີ່ກຳນົດໄວ້ ເປັນຕົ້ນແມ່ນ ບ້ານສີບຸນເຮືອງ ເປັນບ້ານພັດທະນາຊົນນະບົດ ບ້ານມີຫົວຫນ່ວຍຜະລິດເປັນສິນຄ້າ, ການບໍລິການ, ສະຫະກອນ ຫຼື ກຸ່ມຜະລິດມີປະສິດທິຜົນ, ບ້ານເປັນໃຈກາງທາງດ້ານເສດຖະກິດ, ວັດທະນາທໍາ-ສັງຄົມ ຢູ່ຊົນນະບົດ, ອໍານວຍຄວາມສະດວກໃນການສ້າງບ້ານພັດທະນາ ໃຫ້ບັບດາບ້ານອ້ອມຂ້າງ, ມີເສັ້ນທາງຄົມມະນາຄົມເຊື່ອມຈອດ ບັນດາບ້ານອອ້ມຂ້າງ, ເມືອງ, ເທດສະບານ ສະດວກ, ມີພື້ນຖານການຜະລິດ ແລະ ການປຸງແຕ່ງເປັນສິນຄ້າທີ່ຫມັ້ນຄົງ, ມີຕະຫຼາດຖາວອນທີ່ມີການ ຊື້-ຂາຍ ເປັນປະຈໍາ, ມີສູນບໍລິການໄປສະນີ ໂທລະຄົມມະນາຄົມ, ມີສະຖານີບໍລິການເຕັກນິກກະສິກໍາ ແລະ ປ່າໄມ້ ຫຼື ຫ້ອງຮຽນຮູ້ຊົນນະບົດ, ມີຫນ່ວຍບໍລິການທະນາຄານ, ຫນ່ວຍບໍລິການການເງິນຈຸລະພາກ, ມີສຸກສາລາ ຫຼື ໂຮງຫມໍນ້ອຍ, ມີລະບົບນໍ້າປະປາຊຸມຊົນ, ມີຕາຂ່າຍໄຟຟ້າໃນລະບົບ, ມີໂຮງຮຽນປະຖົມສົມບູນ, ມັດທະຍົມຕອນຕົ້ນ, ມັດທະຍົມຕອນປາຍ, ມີການຄຸ້ມຄອງ, ປົກປັກຮັກສາ ແລະ ນໍາໃຊ້ຊັບພະຍາກອນທໍາມະຊາດ ແລະ ສິ່ງແວດລ້ອມຢ່າງມີປະສິດຕິຜົນ ແລະ ຢືນຢົງ, ມີລາຍໄດ້ສະເລ່ຍ 7,2 ລ້ານກີບ ຕໍ່ຄົນຕໍ່ປີຂື້ນໄປ, ມີພົນລະເມືອງ 1,000 ຄົນ ຂຶ້ນໄປ, ສໍາລັບບ້ານຢູ່ເຂດຊົນນະບົດພູດອຍ ຫຼື ມີພົນລະເມືອງ 3,000 ຄົນຂຶ້ນໄປ ສໍາລັບເຂດຊົນນະບົດທົ່ງພຽງ.
ນອກນີ້ ຍັງໄດ້ມີທິດທາງແຜນການ ເພື່ອສືບຕໍ່ຈັດຕັ້ງປະຕິບັດຄາດໝາຍ ສູ້ຊົນໃນການປະກາດ ແລະ ຮັບຮອງ ບ້ານສີບຸນ ເມືອງ ເມືອງຮຸນ ເປັນຕົວເມືອງໃນຊົນນະບົດ ຕ້ອງສືບຕໍ່ສຸມໃສ່ຈັດຕັ້ງປະຕິບັດລາຍລະອຽດ ມີບັນດາໜ້າວຽກຕ່າງໆ. ເພື່ອໃຫ້ທິດທາງແຜນການ ແລະ ແຜນຂໍ້ແຂ່ງຂັນຍ້ອງຍໍ ໃຫ້ປະກົດຜົນເປັນຈີງ. ທ່ານ ອ່ອນແກ້ວ ອຸ່ນອາລົມ ຮອງເຈົ້າແຂວງອຸດົມໄຊ ກໍ່ໄດ້ເນັ້ນໃຫ້ ຄະນະຮັບຜິດຊອບຂັ້ນຕ່າງໆ ຈົ່ງເອົາໃຈໃສ່ເຂົ້າໃນໜ້າວຽກງານທີ່ໄດ້ກຳນົດໄວ້ໃນ 15 ກິດຈະກຳ ໃຫ້ປະກົດຜົນເປັນຈີງ ແລະ ມີປະສິດທິພາບ. ພິທີພາຍຫຼັງຜ່ານແຜນດຳເນີນງານກິດຈະກຳແລ້ວ ຄະນະຮັບຜິດຊອບກໍ່ໄດ້ຂື້ນຈັບມືແຂ່ງຂັນ ຕາມ 4 ກຸ່ມວຽກ 15 ກິດຈະກຳ ພ້ອມທັງເປີດປ້າຍພິທີ ຂໍ້ແຂ່ງຂັນ ຕາມ 4 ກຸ່ມວຽກ ບ້ານສີບຸນເມືອງ ເມືອງຮຸນ ແຂວງອຸດົມໄຊ ຢ່າງເປັນທາງການ.
ພິທີດັ່ງກ່າວ ແມ່ນໄດ້ຈັດຂື້ນ ໃນວັນທີ 6 ພຶດສະພາ 2024 ທີ່ສະໂມສອນຂອງ ບ້ານສີບຸນເມືອງ ເມືອງຮຸນ ໂດຍການເປັນປະທານຂອງ ທ່ານ ອ່ອນແກ້ວ ອຸ່ນອາລົມ ຮອງເຈົ້າແຂວງອຸດົມໄຊ, ມີ ທ່ານ ນາງ ຄຳໝັ້ນ ແກ້ວບຸນຫວນ ກຳມະການພັກແຂວງ, ເລຂາພັກເມືອງ, ເຈົ້າເມືອງໆຮຸນ, ມີຄະນະຮັບຜິດຊອບເປີດບັ້ນຂໍ້ແຂ່ງຂັ້ນ ຂັ້ນແຂວງ, ຂັ້ນເມືອງ ຕະຫລວດຮອດຄະນະພັກເຂດ, ຄະນະພັກບ້ານ, ເຖົ້າແກ່ແນວໂຮມ ປະຊາຊົນບັນດາເຜົ່າ ແລະ ພະນັກງານຮັບຜິດຊອບວຽກງານດັ່ງກ່າວ ເຂົ້າຮ່ວມຢ່າງພ້ອມພຽງ.
ນັກຂ່າວ: ແສງອາທິດ
