ໃນໂອກາດ ຄະນະຜູ້ແທນ ຂັ້ນສູງ ແຂວງອຸດົມໄຊ ແຫ່ງ ສປປ ລາວ ເຄື່ອນໄຫວ ຢ້ຽມຢາມ ແລະ ເຮັດວຽກ ຢູ່ ກອງບັນຊາການທະຫານເຂດ 2, ກະຊວງປ້ອງກັນປະເທດ ສສ ຫວຽດນາມ ແລະ ແຂວງຟູເຖາະ ແຫ່ງ ສສ ຫວຽດນາມ ຕອນເຊົ້າວັນທີ 19 ມີຖຸນາ 2024 ນີ້ ຄະນະຜູ້ແທນຂັ້ນສູງ ແຂວງອຸດົມໄຊ ນຳໂດຍ ສະຫາຍ ຄຳພຽງ ຢາຈົງວາ ຮອງເລຂາພັກ ແຂວງອຸດົມໄຊ ພ້ອມດ້ວຍຄະນະ ກໍ່ໄດ້ເດີນທາງໄປຢ້ຽມຢາມ ນັກສຶກສາລາວ ໂຮງຮຽນແພດສາດ ຊັ້ນສູງ ແຂວງຟູເຖາະ ແຫ່ງ ສສ ຫວຽດນາມ
ພາຍຫລັງ ຄະນະຜູ້ແທນ ຂັ້ນສູງ ແຂວງອຸດົມໄຊ ໄປຮອດ ກໍ່ໄດ້ຮັບການຕ້ອນຮັບ ຈາກ ສະຫາຍ ຢື ວັນ ກວ້າງ ຫົວໜ້າພະແນກການຕ່າງປະເທດ ແຂວງຟູເຖາະ ແລະ ສະຫາຍ ປອ.ດຣ ຫງວຽນ ກວ່າງ ເອິ່ນ ອຳນວຍການ ໂຮງຮຽນແພດສາດ ຊັ້ນສູງ ແຂວງຟູເຖາະ , ຄູ-ອາຈານ ແລະ ນັກສຶກສາພາຍໃນໂຮງຮຽນ
ຄະນະ ຜູ້ແທນຂັ້ນສູງ ແຂວງອຸດົມໄຊ ໄດ້ຮັບຟັງການລາຍງານ ສະພາບລວມ , ວຽກງານ ການຮຽນ – ການສອນ ແລະ ການເຄື່ອນໄຫວ ກິດຈະກຳຕ່າງ ຂອງນັກສຶກສາລາວ ຈາກນັ້ນ ສະຫາຍ ຄຳພຽງ ຢາຈົງວາ ຮອງເລຂາພັກ ແຂວງອຸດົມໄຊ ໄດ້ເປັນກຽດໂອ້ລົມ ນັກສຶກສາລາວ ເວົ້າລວມ , ເວົ້າສະເພາະ ແມ່ນນັກສຶກສາ ແຂວງອຸດົມໄຊ ຈົ່ງພ້ອມກັນເອົາໃຈໃສ່ ສຶກສາຮ່ຳຮຽນ , ສະແຫວງຫາຄວາມຮູ້ ເພື່ອພັດທະນາຕົນເອງ , ເພີ່ມທະວີຄວາມສາມັກຄີ ພາຍໃນ ນັກສຶກສາລາວ ດ້ວຍກັນ , ສາມັກຄີກັບນັກສຶກສາຫວຽດນາມ , ການປະຕິບັດກົດລະບຽບຂອງ ໂຮງຮຽນ , ຫໍພັກ ແລະ ອື່ນໆ ພ້ອມທັງ ນຳເອົາຂອງຂັວນ ມອບໃຫ້ ໂຮງຮຽນແພດສາດ ຊັ້ນສູງ ແຂວງຟູເຖາະ ຕື່ມອີກ.
