ກອງປະຊຸມ ຄົບ ຄະນະບໍລິຫານງານພັກ ແຂວງອຸດົມໄຊ ເປີດກວ້າງ ຄັ້ງທີ 10 ສະໄໝທີ IX
ໄດ້ໄຂຂຶ້ນຢ່າງເປັນທາງການໃນຕອນເຊົ້າວັນທີ 10 ກໍລະກົດ ນີ້ ທີ່ຫ້ອງປະຊຸມ ຫ້ອງວ່າການ ແຂວງອຸດົມໄຊ ໂດຍການເປັນປະທານຂອງ ສະຫາຍ ບຸນຄົງ ຫຼ້າຈຽມພອນ ກໍາມະການສໍາຮອງສູນກາງພັກ, ເລຂາພັກແຂວງ ເຈົ້າແຂວງ, ມີຮອງເລຂາພັກແຂວງ, ຄະນະປະຈຳພັກແຂວງ, ກໍາມະການພັກແຂວງ, ເລຂາພັກເມືອງ, ເລຂາຄະນະພັກຮາກຖານ – ໜ່ວຍພັກຮາກຖານ ອ້ອມຂ້າງແຂວງເຂົ້າຮ່ວມ.
ກອງປະຊຸມ ໄດ້ຕີລາຄາສະພາບການເຄື່ອນໄຫວນໍາພາ – ຊີ້ນໍາ ຈັດຕັ້ງປະຕິບັດວຽກງານຮອບດ້ານຂອງ ຄະນະບໍລິຫານງານພັກ ແຂວງ ສະໄໝທີ IX ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024 ໂດຍຊີ້ໃຫ້ຮູ້ວ່າ ຕະຫຼອດໄລຍະ 6 ເດືອນ ທີ່ຜ່ານມາ, ຄະນະບໍລິຫານງານພັກແຂວງ ໄດ້ນໍາພາ – ຊີ້ນໍາ ຈັດຕັ້ງປະຕິບັດວຽກງານຮອບດ້ານຂອງແຂວງ ປະຈໍາປີ 2024 ດ້ວຍຄວາມຮັບຜິດຊອບການເມືອງ, ຄວາມຕັດສິນໃຈ ສຸມທຸກກໍາລັງແຮງຂອງບັນດາຄະນະບໍລິຫານງານພັກແຂວງ ເຂົ້າໃນການນໍາພາ – ຊີ້ນໍາ ວຽກງານຢູ່ໃນຄວາມຮັບຜິດຊອບຂອງຕົນ ເຫັນວ່າ ມີຫຼາຍວຽກສາມາດຈັດຕັ້ງປະຕິບັດມີຄວາມຄືບໜ້າ ແລະ ມີຜົນສໍາເລັດດີ.
ອັນພົ້ນເດັ່ນ ແມ່ນເຮັດໃຫ້ທົ່ວແຂວງ ສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມຍັງຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍໄດ້ໂດຍພື້ນຖານ, ແຜນພັດທະນາເສດຖະກິດ – ສັງຄົມ ຕິດພັນກັບການຈັດຕັ້ງປະຕິບັດ ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ – ການເງິນ ແລະ ແກ້ໄຂບັນຫາເຄັ່ງຮ້ອນຂອງລັດຖະບານ ໄດ້ຮັບການຈັດຕັ້ງປະຕິບັດດ້ວຍຄວາມເອົາໃຈໃສ່ ເຮັດໃຫ້ລວມຍອດຜະລິດຕະພັນພາຍໃນ ( GDP ) ຂະຫຍາຍຕົວໃນລະດັບ 3.18%, ສ້າງມູນຄ່າເພີ່ມໃນປີໄດ້ 9,048.44 ຕື້ກີບ, ສະເລ່ຍລາຍຮັບຕໍ່ຫົວຄົນ ເທົ່າກັບ 1,172 ໂດລາສະຫະລັດ.
ກອງປະຊຸມຄັ້ງນີ້ ຍັງໄດ້ຮັບຟັງລາຍງານການຈັດຕັ້ງປະຕິບັດ ວຽກງານຂອງພະແນກການ, ອົງການ ຈໍານວນໜຶ່ງ, ຮັບຟັງການລາຍງານຄວາມຄືບໜ້າ ຂອງການດໍາເນີນກອງປະຊຸມໃຫຍ່ ປັບປຸງຮາກຖານພັກຂັ້ນບ້ານ, ສໍານັກງານ – ອົງການ ອ້ອມຂ້າງເມືອງ ແລະ ແຜນການກະກຽມ – ດຳເນີນກອງປະຊຸມໃຫຍ່ອົງຄະນະພັກເມືອງ; ຮັບຟັງການລາຍງານແຜນການ ການກະກຽມ ແລະ ດໍາເນີນກອງປະຊຸມໃຫຍ່ອົງຄະນະພັກແຂວງ ຄັ້ງທີ X; ຄົ້ນຄວ້າພິຈາລະນາຮັບຮອງເອົາໂຄງຮ່າງລາຍງານການເມືອງ ແລະ ຮ່າງແຜນພັດທະນາເສດຖະກິດ – ສັງຄົມ ຄັ້ງທີ X ຂອງແຂວງ; ຮັບຟັງການເຜີຍແຜ່ເຊື່ອມຊຶມບັນດານິຕິກໍາຂອງສູນກາງພັກ ເປັນຕົ້ນ ແມ່ນມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 8, ມະຕິ ຂອງກົມການເມືອງສູນກາງພັກ ສະບັບເລກທີ 04/ກມສພ ວ່າດ້ວຍການສ້າງເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່ ແລະ ນິຕິກໍາຕ່າງໆຈໍານວນໜຶ່ງ ກອງປະຊຸມຈະດຳເນີນເປັນເວລາ 2 ວັນຈິ່ງສຳເລັດ
