ກອງປະຊຸມສະຫຼຸບການຈັດຕັ້ງເຄື່ອນໄຫວວຽກງານພົ້ນເດັ່ນ ປະຈຳເດືອນ 7-8 ແລະ ທິດທາງແຜນການ ປະຈຳເດືອນ 9 ປີ 2024 ຂອງ ອົງການປົກຄອງ ແຂວງອຸດົມໄຊ ໄດ້ຈັດຂຶ້ນ ໃນວັນທີ 28 ສິງຫາ 2024 ນີ້ ທີ່ ຫ້ອງປະຊຸມຫ້ອງວ່າການແຂວງ ໂດຍການເປັນປະທານຂອງ ທ່ານ ບຸນຄົງ ຫຼ້າຈຽມພອນ ເຈົ້າແຂວງອຸດົມໄຊ. ມີຮອງເຈົ້າແຂວງ, ເຈົ້້າເມືອງ 7 ເມືອງ, ຫົວໜ້າພະແນກການ, ສອງກອງບັນຊາການ ປກຊ, ປກສ ເຂົ້້າຮ່ວມ.
ກອງປະຊຸມໄດ້ພ້ອມກັນລົງເລິກ ຕີລາຄາສະພາບການຈັດຕັ້ງວຽກງານທີ່ພົ້ນເດັ່ນຂອງ ອົງການປົກຄອງ ແຂວງ ໃນໄລຍະ 2 ເດືອນທີ່ຜ່ານມາ ແລະ ກໍານົດທິດທາງແຜນວຽກງານຈຸດສຸມ ໃນ 2 ເດືອນຕໍ່ໜ້າ ໂດຍຕີລາຄາ ດ້ານດີ-ຜົນງານ ເພື່ອເສີມຂະຫຍາຍ, ແກ້ໄຂບັນຫາທີ່ຍັງຄົງຄ້າງ, ຊອກຫາສາເຫດ ແລະ ກໍານົດທິດທາງປັບປຸງແກ້ໄຂ.
ທ່ານ ນາງ ອຳໄພວອນ ປັນຍາລັກ ຫົວໜ້າຫ້ອງວ່າການແຂວງ ໄດ້ສະຫຼູບຫຍໍ້ການຈັດຕັ້ງເຄື່ອນໄຫວວຽກງານ ໄລຍະ 2 ເດືອນທີ່ຜ່ານມາ ສາມາດມ້າງຄະດີຢາເສບຕິດໄດ້ 45 ລາຍ, ຍຶດເຄື່ອງຂອງກາງຢາເສບຕິດປະເພດຢາບ້າໄດ້ 6,396 ເມັດ ແລະ ເຄື່ອງຂອງກາງອື່ນໆ ອີກຈຳນວນໜຶ່ງ ສຸມໃສ່ຈັດຕັ້ງປະຕິບັດ 2 ວາລະແຫ່ງຊາດຢ່າງຕັ້ງໜ້າ ເພີ່ມທະວີແກ້ໄຂບັນຫາເຄັ່ງຮ້ອນຂອງເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນ, ລາຄາສິນຄ້າ ແລະ ໜີ້ສິນຕ່າງປະເທດ, ສຸມໃສ່ຈັດຕັ້ງປະຕິບັດໂຄງການລົງທຶນຂອງລັດ ປະຈໍາປີ 2024, ໂຄງການລົງທຶນຂອງພາກເອກະຊົນພາຍໃນ ແລະ ຕ່າງປະເທດ, ໂຄງການຊ່ວຍເຫຼືອທາງການ ເພື່ອການພັດທະນາ ດ້ວຍຄວາມຮັບຜິດຊອບສູງ, ຈັດເກັບລາຍຮັບດ້ວຍລະບົບທັນສະໄໝ ປະຈໍາປີ 2024 ຊຶ່ງມາຮອດປະຈຸບັນ ສາມາດຈັດເກັບລາຍຮັບໄດ້ 171.71 ຕື້ກີບ, ເທົ່າກັບ 73,19% ຂອງແຜນການປີ, ການປູກເຂົ້ານາປີ, ເຂົ້າເນີນສູງ ແລະ ພືດຕ່າງໆ ແມ່ນສໍາເລັດ 100%, ກວດກາ ແລະ ຍຶດຊິ້ນສ່ວນສັດປີກ ທີ່ນຳເຂົ້າບໍ່ຖືກຕ້ອງ ໄດ້ຈຳນວນ 20.5 ໂຕນ, ກວດກາ ແລະ ສ້າງບົດບັນທຶກ ກັບຫົວໜ່ວຍທຸລະກິດທີ່ລັກລອບນໍາເຂົ້າພືດຜັກຈາກຕ່າງປະເທດມາຈຳໜ່າຍຢູ່ແຂວງອຸດົມໄຊ, ກໍານົດລາຄາຂາຍໝູໜ້າຟາມ, ລາຄານໍ້າດື່ມຕຸກໃຫຍ່, ເພື່ອໃຫ້ສອດຄ່ອງກັບສະພາບເສດຖະກິດໃນປະຈຸບັນ, ທຳລາຍສິນຄ້າລອກຮຽນແບບ-ປອມແປງເຄື່ອງໝາຍການຄ້າ (ຊິ້ນສ່ວນ ແລະ ສິ່ງຫຸ້ມຫໍ່ລົດຈັກເວັບ) ຂອງ ບໍລິສັດ ຮອນດາ ລວມມູນຄ່າ 1.45 ຕື້ກວ່າກີບ.
ຄຸ້ມຄອງອັດຕາແລກປ່ຽນ, ຄຸ້ມຄອງເງິນຕາຈາກການສົ່ງອອກ, ການປະຕິບັດໂຄງການປ້ອງກັນຕາຝັ່ງເຈື່ອນເທດສະບານເມືອງໄຊ ໄລຍະ 2 ສຳເລັດ 83.22%, ຕິດຕາມ, ເຝົ້າລະວັງ ແລະ ແກ້ໄຂສຸກເສີນ ເສັ້ນທາງຕ່າງໆທີ່ເປ່ເພ ໃນຊ່ວງໄລຍະລະດູຝົນ ເຮັດໃຫ້ການສັນຈອນໄປມາໄດ້ເປັນປົກກະຕິ, ລົງກວດກາ ແລະ ເກັບກໍາຂໍ້ມູນທີ່ດິນ-ປ່າໄມ້ ໂຄງການພັດທະນາ ພະລັງງານແສງຕາເວັນຂອງ ບໍລິສັດ CGN ແລະ ບໍລິສັດ ຈະເລີນຊັບ; ໂຄງການກໍ່ສ້າງອາຄານຫ້ອງການສະພາປະຊາຊົນແຂວງ, ຫໍຫຼັກເມືອງ ແລະ ສະໜາມຫຼວງ ຢູ່ເທດສະບານເມືອງໄຊ ແລະ ວຽກງານອື່ນໆ.
ກອງປະຊຸມຜູ້ເຂົ້າຮ່ວມໄດ້ພັດປ່ຽນກັນປະກອບຄໍາຄິດຄຳເຫັນ ກຳນົດແຜນຈຸດສຸມສືບຕໍ່ຈັດຕັ້ງປະຕິບັດບັນດາໜ້າວຽກທີ່ຍັງຄົງຄ້າງ ເພື່ອໃຫ້ບັນລຸຕາມຄາດໝາຍ ໃນທ້າຍປີ ຕິດພັນກັບການ ກະກຽມ ແລະ ຊຸກຍູ້ ການດຳເນີນກອງປະຊຸມ 3 ຂັ້ນຂອງພັກ ຢູ່ແຂວງ ໃຫ້ເປັນຂະບວນຟົດຟື້ນ ແລະ ຕໍ່ເນື່ອງ.
ຂ່າວ: ຄຳພັນ ແກ້ວມະນີ
