ກອງປະຊຸມ ສະຫຼຸບການຈັດຕັ້ງເຄື່ອນໄຫວ ຂອງ ອົງການປົກຄອງແຂວງ ປະຈຳເດືອນ 9-10 ປີ 2024 ໄດ້ຈັດຂຶ້ນໃນວັນທີ 24 ຕຸລາ 2024ທີ່ຫ້ອງປະຊຸມຫ້ອງວ່າການແຂວງ ໂດຍການເປັນປະທານຂອງ ທ່ານ ບຸນຄົງ ຫຼ້າຈຽມພອນ ເຈົ້າແຂວງອຸດົມໄຊ, ມີຮອງເຈົ້າແຂວງ, ຫົວຫນ້າພະແນກການ, ສອງກອງບັນຊາການ ປກຊ-ປກສ ແລະ ແຂກເຊີນ ຈາກພາກສ່ວນທີ່ກ່ຽວຂ້ອງ ເຂົ້າຮ່ວມ.
ທ່ານເຈົ້້າແຂວງມີຄຳເຫັນວ່າ: ກອງປະຊຸມຄັ້ງນີ້ ເປັນການສະຫຼຸບທົບທວນຄືນການຈັດຕັ້ງປະຕິບັດວຽກງານຮອບດ້ານ ໃນໄລຍະ 2 ເດືອນຜ່ານມາ ຍົກໃຫ້ເຫັນດ້ານດີຜົນງານ ດ້ານອ່ອນຂໍ້ຄົງຄ້າງ ແລະ ທິດທາງແຜນການແກ້ໄຂໃນຕໍ່ໜ້າ,ຮຽກຮ້ອງໃຫ້ພ້ອມຈົ່ງຍົກສູງຄວາມຮັບຜິດຊອບທາງດ້ານການເມືອງໃນການຄົ້ນຄວ້າ, ວິເຄາະ, ວິໄຈ, ປະກອບຄໍາຄິດຄໍາເຫັນຢ່າງກົງໄປກົງມາເພື່ອຊອກໃຫ້ເຫັນບັນຫາ, ສາເຫດແລະກໍານົດທິດທາງໃນການແກ້ໄຂໃຫ້ຖືກຕ້ອງແນໃສ່ເຮັດໃຫ້ການເຄື່ອນໄຫວນໍາພາ-ຊີ້ນໍາຂອງອົງການປົກຄອງແຂວງໃນການຄຸ້ມຄອງລັດ, ຄຸ້ມຄອງສັງຄົມມີປະສິດທິຜົນສູງຂຶ້ນກວ່າເກົ່າແລະບັນລຸຜົນສໍາເລັດຕາມແຜນການທີ່ວາງໄວ້.
ທ່ານ ນາງ ອຳໄພວອນ ປັນຍາລັກ ຫົວໜ້າຫ້ອງວ່າການແຂວງ ສະຫຼຸບວ່າ: ໃນໄລຍະ 2 ເດືອນທີ່ຜ່ານມາ ອົງການປົກຄອງແຂວງ ໄດ້ສຸມໃສ່ເຄື່ອນໄຫວວຽກງານ ຕາມພາລະບົດບາດໃນສະພາບແວດລ້ອມທີ່ຍັງສືບຕໍ່ປະເຊີນໜ້າກັບຄວາມຫຍຸ້ງຍາກທາງດ້ານເສດຖະກິດ-ການເງິນ, ໄພເງິນເຟີ້, ເງິນກີບອ່ອນຄ່າ, ລາຄາສິນຄ້າເພີ້ມຂື້ນ, ຖືກໄພພິບັດທາງທຳມະຊາດ ແລະ ປະກົດການຫຍໍ້ທໍ້ຕ່າງໆ. ແຕ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈຳປີ 2024, ແຜນວຽກຈຸດສຸມຂອງ 2 ວາລະແຫ່ງຊາດ ແລະ ວຽກງານເຄັ່ງຮ້ອນຂອງລັດຖະບານ ກໍ່ໄດ້ຮັບການຈັດຕັ້ງປະຕິບັດຢ່າງຕັ້ງໜ້າເປັນຕົ້ນແມ່ນບັນດາຄາດໝາຍທີ່ສະພາປະຊາຊົນໄດ້ຮັບຮອງ ບັນລຸຄາດໝາຍເທື່ອລະກ້າວ ຊຶ່ງເຮັດໃຫ້ທົ່ວແຂວງສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ ເປັນລະບຽບຮຽບຮ້ອຍ ແລະເສດຖະກິດ-ສັງຄົມ ມີການຂະຫຍາຍຕົວຢ່າງຕົວເນື່ອງ.ສາມາດມ້າງຄະດີຢາເສບຕິດໄດ້ 45 ລາຍ, ຍຶດເຄື່ອງຂອງກາງຢາເສບຕິດປະເພດຢາບ້າໄດ້ 6,396 ເມັດແລະເຄື່ອງຂອງກາງອື່ນໆອີກຈຳນວນໜຶ່ງ, ຈັດພິທີສະເຫຼີມສະຫຼອງວັນແຫ່ງຊາດຕ້ານຢາເສບຕິດຄົບຮອບ 23 ປີແລະຈູດທໍາລາຍຢາເສບຕິດທີ່ສານປະຊາຊົນແຂວງໄດ້ມີຄໍາຕັດສິນໃຊ້ໄດ້ຢ່າງເດັດຂາດແລ້ວປະຈຳປີ 2024, ໄດ້ຢັ້ງຢືນການອະນຸມັດເບີກຈ່າຍໂຄງການລົງທຶນຂອງລັດ 61 ໂຄງການ, ມູນຄ່າ 50.82 ຕື້ກີບເທົ່າກັບ 83,4% ຂອງແຜນການ, ສໍາເລັດການຈັດສັນການລົງທຶນຂອງລັດບ້ວງປົກກະຕິປະຈໍາປີ 2025, ເຊັນສັນຍາໂຄງການລົງທຶນຂອງພາກເອກະຊົນພາຍໃນ ແລະ ຕ່າງປະເທດຈໍານວນ 2 ໂຄງການ, ແກ້ໄຂບັນດາໂຄງການທີ່ບໍ່ປະຕິບັດຕາມສັນຍາໄດ້ຈໍານວນໜຶ່ງ. ສາມາດຈັດເກັບລາຍຮັບໄດ້ 181.46 ຕື້ກີບ, ເທົ່າກັບ 93.73% ຂອງແຜນການປີ.ຊຸກຍູ້ສົ່ງເສີມການຜະລິດກະສິກໍາເພື່ອສະໜອງສະບຽງອາຫານແລະຜະລິດເປັນສິນຄ້າເປັນຕົ້ນແມ່ນການສົ່ງເສີມການຜະລິດດູຝົນປະຈຸບັນແມ່ນໄດ້ເລີ່ມເຂົ້າສູ່ການເກັບກ່ຽວເຂົ້ານາປີແລະເຂົ້າເນີນສູງເນື້ອທີ່26,264.91 ເຮັກຕາ, ຄາດຄະເນຜົນຜະລິດ 94,281.18 ໂຕນ.
ສຳລັບແຜນຈຸດສຸ່ມເດືອນ 10-11 ສືບຕໍ່ສຸມໃສ່ຍູ້ແຮງການຈັດຕັ້ງປະຕິບັດວຽກງານໃນ 2 ເດືອນທ້າຍປີຂອງແຜນພັດທະນາເສດຖະກິດ-ສັງຄົມປີ 2024 ຕິດພັນກັບການຈັດຕັ້ງ 2 ວາລະແຫ່ງຊາດແລະບັນຫາເຄັ່ງຮ້ອນຂອງລັດຖະບານໃຫ້ບັນລຸຜົນສໍາເລັດ.ກອງປະຊຸມຍັງໄດ້ເປີດກ້ວາງໃຫ້ຜູ້ເຂົ້າຮ່ວມໄດ້ປະກອບຄວາມຄິດເຫັນເຂົ້າໃນວຽກງານຕ່າງໆໃຫ້ແທດເໝາະແລະສົມບູນຂື້ນ.
