ຕອນບ່າຍ ວັນທີ 4 ຕຸລານີ້ ທ່ານ ບຸນຄົງ ຫລ້າຈຽມພອນ ເຈົ້າແຂວງອຸດົມໄຊ ໄດ້ພົບປະ ໂອ້ລົມ ພະນັກງານ ຄູ-ອາຈານ ແລະ ນັກສຶກສາ ໂຮງຮຽນ ການເມືອງ ແລະການປົກຄອງ ແຂວງອຸດົມໄຊ ທີ່ໂຮງຮຽນດັ່ງກ່າວ ໂດຍມີ ທ່ານ ຄຳຟອງ ພັດທະມາວົງ ຫົວຫນ້າໂຮງຮຽນ ການເມືອງ ແລະ ການປົກຄອງແຂວງ ພ້ອມດ້ວຍ ພະນັກງານ ຄູ-ອາຈານ ໃຫ້ການຕ້ອນຮັບ.
ໂອກາດນີ້ ທ່ານ ຄໍາຟອງ ພັດທະມາວົງ ຫົວຫນ້າໂຮງຮຽນ ການເມືອງ ແລະ ການປົກຄອງ ແຂວງອຸດົມໄຊ ໄດ້ລາຍງານສະພາບລວມ ກ່ຽວກັບການຊີ້ນຳ-ນໍາພາ ຂອງຄະນະພັກ, ຄະນະນໍາໂຮງຮຽນ, ການຈັດຕັ້ງປະຕິບັດ ການຮຽນ-ການສອນ ໃນໄລຍະຜ່ານມາ ລວມທັງ ທິດທາງແຜນການແລະບາງຂໍ້ສະເໜີ.
ຈາກນັ້ນ ທ່ານ ບຸນຄົງ ຫລ້າຈຽມພອນ ເລຂາພັກແຂວງ ເຈົ້າແຂວງອຸດົມໄຊ ໄດ້ໂອ້ລົມ ໃຫ້ທິດຊີ້ນໍາ ແລະ ແລກປ່ຽນຄວາມຄິດເຫັນບາງບັນຫາ ກ່ອນອື່ນ ທ່ານໄດ້ຍົກໃຫ້ເຫັນເຖິງ ສະພາບຄວາມຫຍຸ້ງຍາກ, ສັບສົນ ແລະ ສິ່ງທ້າທາຍ ຂອງແຂວງໃນປັດຈຸບັນ ໂດຍຕິດພັນກັບຜົນສຳເລັດໃນການຊີ້ນຳ-ນໍາພາ ຂອງການນໍາພັກ-ລັດ ແຂວງ ໃນໄລຍະຜ່ານມາ ເຊິ່ງສາມາດແກ້ໄຂບາງບັນຫາໄດ້ຢ່າງມີປະສິດທິພາບ ແລະທັນກັບສະພາບການ ໂດຍສະເພາະແມ່ນ ສອງວາລະແຫ່ງຊາດ, ການຟື້ນຟູຜົນກະທົບ ຈາກໄພພິບັດ, ການລະບາດຂອງພະຍາດ, ການແກ້ໄຂ ພາຫະນະ ແລະ ດັດສົມລົດລັດ ແລະ ວຽກງານອື່ນໆ ໂດຍສົ່ງຜົນເຮັດໃຫ້ ເສດຖະກິດ-ສັງຄົມຂອງແຂວງ ຍັງສືບຕໍ່ຂະຫຍາຍຕົວຢ່າງຕໍ່ເນື່ອງ.
ເພື່ອເຮັດໃຫ້ການຈັດຕັ້ງປະຕິບັດວຽກງານຮອບດ້ານ ຂອງໂຮງຮຽນ ບັນລຸຕາມທິດທາງແຜນການ ແລະຄາດຫມາຍ ທີ່ກຳນົດໄວ້ ແມ່ນສືບຕໍ່ເອົາໃຈໃສ່ບາງບັນຫາ ເປັນຕົ້ນ ພະນັກງານ ຄູ-ອາຈານ: ຕ້ອງເປັນເຈົ້າການ ເຮັດຫນ້າທີ່ການເມືອງ, ປະຕິບັດຫນ້າທີ່ຄວາມຮັບຜິດຊອບຂອງຕົນຢ່າງຕັ້ງຫນ້າ, ວຽກງານການຮຽນ-ການສອນ ຍົກລະດັບການສອນໃຫ້ມີຄຸນນະພາບ ແລະ ເປັນມືອາຊີບ, ປັບປຸງແບບແຜນການເຮັດວຽກ, ການຊີ້ນຳ-ນໍາພາ, ມີການຕິດຕາມ, ກວດກາ ແລະ ສະຫລຸບ ລາຍງານເປັນແຕ່ລະໄລຍະ. ນັກສຶກສາ: ໃຫ້ເອົາໃຈໃສ່ ສຶກສາ, ຄົ້ນຄວ້າ ຝຶກຝົນຫລໍ່ຫລອມຕົນເອງ, ກໍາໄດ້ເນື້ອໃນບົດຮຽນ, ປະກອບສ່ວນເຂົ້າໃນກິດຈະກໍາ ທີ່ໂຮງຮຽນຈັດຂຶ້ນ ແລະ ນໍາເອົາບົດຮຽນ, ຄວາມຮູ້ ທີ່ໄດ້ຮັບ ຈາກການສຶກສາ ທິດສະດີ ການເມືອງ ແລະ ການປົກຄອງ ໃນຄັ້ງນີ້ ກັບໄປຫມູນໃຊ້ ເຂົ້າໃນການເຄື່ອນໄຫວວຽກງານ ວິຊາສະເພາະຕົວຈິງ ຢູ່ກົມກອງຂອງຕົນ ໃຫ້ກາຍເປັນພະນັກງານສືບທອດ ປ່ຽນແທນ ໃນຕໍ່ຫນ້າ.
ການພົບປະໂອ້ລົມ ຂອງທ່ານເຈົ້າແຂວງອຸດົມໄຊ ກໍເພື່ອເປັນການຊຸກຍູ້, ຊີ້ນຳວຽກງານ ຮອບດ້ານຂອງໂຮງຮຽນ ການເມືອງ ແລະ ການປົກຄອງ ແຂວງອຸດົມໄຊ ສືບຕໍ່ຈັດຕັ້ງປະຕິບັດໜ້າທີ່ວຽກງານ ການຮຽນ-ການສອນ ໃຫ້ມີຜົນສຳເລັດຕາມລະດັບຄາດຫມາຍ.
