ກອງປະຊຸມ ເຜີຍແຜ່ເຊື່ອມຊຶມບັນດາ ມະຕິ ຄຳສັ່ງຂອງພັກ ແລະ ປາຖະກະຖາວັນສຳຄັນຕ່າງໆຂອງຊາດ ຈັດຂຶ້ນ ວັນທີ 17 ຕຸລາ 2022 ທີ່ຫ້ອງວ່າການແຂວງອຸດົມໄຊ ໂດຍການເປັນປະທານຂອງທ່ານນາງ ອຳໄພວອນ ປັນຍາລັກ ກຳມະການພັກແຂວງ, ຫົວຫນ້າຫ້ອງວ່າການແຂວງອຸດົມໄຊ.
ການດໍາເນີນກອງປະຊຸມ ໃນຄັ້ງນີ້ ກໍເພື່ອເຮັດໃຫ້ ສະມາຊິກພັກ, ພະນັກງານ – ລັດຖະກອນ ແລະ ພະນັກງານສັນຍາແຮງງານ ພາຍໃນຫ້ອງວ່າການແຂວງ ຮັບຮູ້, ເຂົ້າໃຈຢ່າງເລິກເຊິ່ງ ແລະ ກຳແຫນ້ນບັນດາເນື້ອໃນຂອງເອກະສານຕ່າງໆ ພ້ອມທັງສາມາດນຳໄປຈັດຕັ້ງປະຕິບັດ ເຂົ້າໃນການເຄື່ອນໄຫວວຽກງານ ຕາມຄວາມຮັບຜິດຊອບຂອງຕົນ ໃຫ້ໄດ້ຮັບຜົນສຳເລັດຕາມລະດັບຄາດຫມາຍ, ເຮັດໃຫ້ຮັບຮູ້, ເຂົ້າໃຈ ເຖິງປະຫວັດ, ຄວາມເປັນມາ, ການເຕີບໃຫຍ່ຂະຫຍາຍຕົວຂອງວັນສຳຄັນຕ່າງໆຂອງຊາດ.
ສໍາລັບເອກະສານທີ່ນໍາມາເຜີຍແຜ່ ເຊື່ອມຊຶມ ແລະ ປາຖະກະຖາ ໃນຄັ້ງນີ້ ປະກອບມີ: ມະຕິ ຂອງກົມການເມືອງສູນກາງພັກ ວ່າດ້ວຍການເພີ່ມທະວີການນຳພາຂອງພັກ ຕໍ່ວຽກງານວັດທະນະທຳໃນໄລຍະໃຫມ່, ວ່າດ້ວຍການຍົກສູງຄຸນນະພາບວຽກງານການເມືອງ – ແນວຄິດ, ຄໍາສັ່ງແນະນຳຂອງຄະນະປະຈຳພັກແຂວງ ວ່າດ້ວຍການຍົກສູງຄຸນນະພາບ ວຽກງານການເມືອງ – ແນວຄິດຢູ່ແຂວງອຸດົມໄຊ, ມະຕິຂອງຄະນະບໍລິຫານງານພັກແຂວງ ວ່າດ້ວຍການຈັດຕັ້ງ ຜັນຂະຫຍາຍ ມະຕິ 04 ຂອງຄະນະບໍລິຫານງານສູນກາງພັກ ກ່ຽວກັບການຫັນປ່ຽນຢ່າງແຂງແຮງ ແລະ ເລິກເຊິ່ງ ວຽກງານພະນັກງານ ຢູ່ແຂວງອຸດົມໄຊ, ມະຕິກອງປະຊຸມຄົບຄະນະ ຂອງຄະນະບໍລິຫານງານສູນກາງພັກ ຄັ້ງທີ 4 ສະໄຫມທີ XI, ມະຕິກອງປະຊຸມສະໄຫມສາມັນຄົບຄະນະບໍລິຫານງານພັກແຂວງ ຄັ້ງທີ 6 ສະໄຫມທີ IX ແລະ ແຈ້ງການຂອງພະແນກພາຍໃນ ກ່ຽວກັບການປະເມີນຜົນ ການປະຕິບັດວຽກງານຂອງພະນັກງານ – ລັດຖະກອນ ຕິດພັນກັບການແຂ່ງຂັນ ແລະ ຍ້ອງຍໍປະຈໍາປີ ລວມທັງ ມູນເຊື້ອ ວັນສ້າງຕັ້ງສະຫະພັນກຳມະບານແຂວງອຸດົມໄຊ ຄົບຮອບ 43 ປີ ( 11 ກັນຍາ 1979 – 11 ກັນຍາ 2022), ວັນລັດຖະທຳມະນູນແຫ່ງຊາດ ຄົບຮອບ 31 ປີ, ວັນຍຶດອຳນາດທົ່ວປະເທດ ຄົບຮອບ 47 ປີ ແລະ ວັນປະກາດເອກະລາດ 12 ຕຸລາ 1945 ຄົບຮອບ 77 ປີ.
ເຊິ່ງການເຜີຍແຜ່ ແລະ ປາຖະກະຖາ ແມ່ນຄະນະຫ້ອງວ່າການແຂວງ ຜັດປ່ຽນກັນ ໂດຍມີ ຫົວຫນ້າ, ຮອງຫົວຫນ້າຂະແຫນງ ຕະຫລອດຮອດສະມາຊິກພັກ, ພະນັກງານ-ລັດຖະກອນ ແລະ ພະນັກງານ ສັນຍາແຮງງານ ພາຍໃນ ຫ້ອງວ່າການແຂວງອຸດົມໄຊ ເຂົ້າຮ່ວມຮັບຟັງ.
