ພິທີປະກາດ ແຕ່ງຕັ້ງຫົວໜ້າ ຫ້ອງວ່າການ ແຂວງອຸດົມໄຊ ຜູ້ໃໝ່ ແລະ ປະກາດຍົກຍ້າຍຫົວໜ້າ ຫ້ອງວ່າການແຂວງ ຜູ້ເກົ່າໄປຮັບໜ້າທີ່ຢູ່ບ່ອນໃໝ່ໄດ້ຈັດຂຶ້ນໃນວັນທີ 26 ພະຈິກ 2024ນີ້ ທີ່ຫ້ອງປະຊຸມວ່າການແຂວງໂດຍການໃຫ້ກຽດເຂົ້າຮ່ວມຂອງ ທ່ານ ບຸນຄົງ ຫຼ້າຈຽມພອນ ກຳມະການສຳຮອງສູນກາງພັກ ເລຂາພັກແຂວງເຈົ້້າແຂວງອຸດົມໄຊ,ມີຄະນະປະຈຳພັກແຂວງ, ກຳມະການພັກແຂວງ,ພະແນກການອ້ອມຂ້າງແຂວງ,ພະນັກງານຫຼັກແຫຼ່ງພ້ອມດ້ວຍພະນັກງານລັດຖະກອນຫ້ອງວ່າການເຂົ້າຮ່ວມ.
ພິທີຄະນະຈັດຕັ້ງແຂວງໄດ້ຜ່ານຂໍ້ຕົກລົງຂອງເຈົ້າແຂວງ ວ່າດ້ວຍການຍົກຍ້າຍ ທ່ານ ນາງ ອຳໄພວອນ ປັນຍາລັກ ກຳມະການພັກແຂວງ ເລຂາໜ່ວຍພັກ ຫົວໜ້າຫ້ອງວ່າການແຂວງອຸດົມໄຊ ໄປຮັບໜ້າທີ່ ເປັນເລຂາຄະນະພັກຮາກຖານ, ຫົວໜ້າພະແນກ ຖະແຫຼງຂ່າວ ວັດທະນະທຳ ແລະ ທ່ອງທ່ຽວແຂວງອຸດົມໄຊ ແລະ ປະກາດແຕ່ງຕັ້ງ ທ່ານ ພິໄລທອງ ຈິດມະນີ ຮອງຫົວໜ້າຫ້ອງວ່າການແຂວງ ຂຶ້ນເປັນເລຂາໜ່ວຍພັກ ເປັນຫົວໜ້າຫ້ອງວ່າການແຂວງອຸດົມໄຊ ຜູ້ໃໝ່.ພິທີ ທ່ານ ນາງ ອຳໄພວອນ ປັນຍາລັກ ຫົວໜ້າຫ້ອງວ່າການແຂວງໄດ້ສະຫຼຸບລາຍງານສະພາບລວມໂດຍຫຍໍ້ກ່ຽວກັບການຈັດຕັ້ງວຽກງານຮອບດ້ານຂອງຫ້ອງວ່າການແຂວງໃນໄລຍະຜ່ານມາ ແລະວຽກງານຈຸດສຸມທິດທາງແຜນການໃນຕໍ່ໜ້າ ພ້ອມທັງມີການລົງລາຍເຊັນມອບ-ຮັບໜ້າທີ່ ລະຫວ່າງ ທ່ານ ນາງ ອຳໄພວອນ ປັນຍາລັກຫົວໜ້າຫ້ອງວ່າການຜູ້ເກົ່າ ແລະ ທ່ານ ພິໄລທອງ ຈິດມະນີຫົວໜ້າຫ້ອງວ່າການຜູ້ໃໝ່.
ໂອກາດນີ້ ທ່ານ ບຸນຄົງ ຫຼ້າຈຽມພອນ ກຳມະການສຳຮອງສູນກາງພັກ,ເລຂາພັກແຂວງ,ເຈົ້າແຂວງອຸດົມໄຊໄດ້ມີຄຳເຫັນໂອ້ລົມເພື່ອເປັນທິດທາງໃນການນຳພາ-ຊີ້ນຳໃນຕໍ່ໜ້າ ກ່ອນອື່ນທ່ານສະແດງຄວາມຍ້ອງຍໍຊົມເຊີຍໃນການ ຊີ້ນຳ-ນຳພາວຽກງານຮອບດ້ານຂອງຫົວໜ້າຫ້ອງວ່າການຜູ້ເກົ່າທີ່ຍາດຜົນງານ ແລະ ມີຜົນສຳເລັດຫຼາຍດ້ານ.ພ້ອມທັງຮຽກຮ້ອງໃຫ້ທັງສອງທ່ານທີ່ຖືກແຕ່ງຕັ້ງ ແລະ ຍົກຍ້າຍ ເຊິ່ງວຽກງານທີ່ໄດ້ຮັບລ້ວນແຕ່ເປັນວຽກງານໃໝ່ ທີ່ສຳຄັນ ແລະ ເປັນການໄວ້ເນື້ອເຊື້ອໃຈ, ຄົ້ນຄ້ວາຖີ່ຖ້ວນຈາກຂັ້ນເທິງຢ່າງລະອຽດ. ສະນັ້ນ ຕ້ອງໄດ້ເອົາໃຈໃສ່ ຄົ້ນຄ້ວາ,ເຊື່ອມຊຶມ, ກຳແໜ້ນບັນດາມະຕິ, ຄຳສັ່ງຕ່າງໆ ເພື່ອເປັນແນວທາງໃນການນໍາພາກົມກອງທີ່ຕົນສັງກັດຂັບເຄື່ອນວຽກງານໄປໃນຕໍ່ໜ້າໃຫ້ຖືກຕ້ອງສອດຄ່ອງກັບແນວທາງນະໂຍບາຍຂອງພັກ-ລັດວາງອອກຢ່າງເຂັ້ມງວດ.
