ຂ່າວ ຫ້ອງວ່າການແຂວງ
ກອງປະຊຸມໃຫຍ່ ຄັ້ງທີ II ຂອງ ສະມາຊິກ ສະຫະພັນແມ່ຍິງຮາກຖານ ຫ້ອງວ່າການແຂວງ ຈັດຂຶ້ນ ໃນຕອນເຊົ້າວັນທີ 21 ຕຸລາ 2025 ທີ່ ຫ້ອງປະຊຸມຫ້ອງວ່າການແຂວງ ໂດຍການເປັນປະທານຂອງ ສະຫາຍ ນາງ ສີພອນ ເຈົ້າຊຸນລິ້ງ ປະທານສະຫະພັນແມ່ຍິງຮາກຖານ ຫ້ອງວ່າການແຂວງ, ເປັນກຽດເຂົ້າຮ່ວມມີ ສະຫາຍ ນາງ ອຳພອນ ອິນຕະລາ ຮອງປະທານສະຫະພັນແມ່ຍິງແຂວງ, ສະຫາຍ ກອງຄຳ ໄຊພົມປັນ ຄະນະຫນ່ວຍພັກຮາກຖານ, ຮອງຫົວຫນ້າຫ້ອງວ່າການແຂວງ, ມີຕາງຫນ້າອົງການຈັດຕັ້ງ ກຳມະບານ, ຊາວຫນຸ່ມ, ມີສະມາຊິກ ສະຫະພັນແມ່ຍິງພາຍໃນຮາກຖານ ແລະ ຕາງຫນ້າສະຫະ ພັນແມ່ຍິງ ຮາກຖານອ້ອມຂ້າງ ເຂົ້າຮ່ວມ.
ພິທີ ສະຫຼຸບການຈັດຕັ້ງປະຕິບັດວຽກງານຫ້ອງວ່າການແຂວງ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2025 ໂດຍການເປັນປະທານຂອງທ່ານ ພິໄລທອງ ຈິດມະນີ ຫົວໜ້າຫ້ອງວ່າການແຂວງ,ມີຄະນະພັກ,ຄະນະຫ້ອງວ່າການ ພ້ອມດ້ວຍພະນັກງານ-ວິຊາການເຂົ້າຮ່ວມ.
ກອງປະຊຸມໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານຫ້ອງວ່າການແຂວງ ປະຈໍາ 6 ເດືອນຕົ້ນປີ 2025 ໃນໄລຍະ 6 ເດືອນຜ່ານມາ ຫ້ອງວ່າການແຂວງ ໄດ້ສຸມໃສ່ຈັດຕັ້ງປະຕິບັດວຽກງານຕາມພາລະບົດບາດ, ສິດ ແລະ ໜ້າທີ່ຂອງຕົນ ໃນທ່າມກາງສະພາບແວດລ້ອມພາຍໃນປະເທດ ກໍຄືທ້ອງຖິ່ນມີການຜັນແປຢ່າງສະຫຼັບສັບຊ້ອນ, ມີທັງກາລະໂອກາດທີ່ເອື້ອອຳນວຍ, ຂໍ້ຫຍຸ້ງຍາກ ແລະ ສິ່ງທ້າທາຍທົດສອບຫຼາຍປະການ ເປັນຕົ້ນແມ່ນ ບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ, ງົບປະມານຈຳກັດ, ເຊິ່ງໄດ້ກາຍເປັນສິ່ງທ້າທາຍໂດຍກົງຢ່າງຫຼີກລ້ຽງບໍ່ໄດ້ ຕໍ່ກັບການຈັດຕັ້ງປະຕິບັດວຽກງານເສນາທິການລວມຂອງຫ້ອງວ່າການແຂວງ.