ລັດຖະມົນຕີ ຍທຂ ລົງຕິດຕາມໂຄງການຟື້ນຟູທາງຫຼວງແຫ່ງຊາດ 2E ແລະ 2W ຢູ່ແຂວງອຸດົມໄຊ

ວັນທີ 21 ມິຖຸນາ 2026 ທ່ານ ເຫຼັກໄຫຼ ສີວິໄລ ລັດຖະມົນຕີ ກະຊວງ ໂຍທາທິການ ແລະ ຂົນສົ່ງ (ຍທຂ),‎ທ່ານ ບຸນຄົງ ຫຼ້າຈຽມພອນ  ເລຂາຄະນະບໍລິຫານງານພັກແຂວງ, ປະທານສະພາປະຊາຊົນແຂວງ ພ້ອມດ້ວຍຄະນະ ແລະ ພາກສ່ວນກ່ຽວຂ້ອງບໍລິສັດຜູ້ຮັບເໝົາ ແລະທີມງານໂຄງການ, ທີມງານທີ່ປຶກສາ ເຂົ້າຮ່ວມ.

‎ໂຄງການກໍ່ສ້າງ  ແລະ ບູລະນະຮັກສາທາງຫຼວງແຫ່ງຊາດ  2E ແລະ 2W ມາດຕະຖານເຕັກນິກການອອກແບບ ສາມາດຮັບນໍ້າໜັກໄດ້ 11 ໂຕນຕໍ່ເພົາ ຕາມມາດຕະຖານທາງອາຊຽນຊັ້ນ III, ໜ້າທາງປູ ອັດສະຟານ ໜາ 8 ຊັງຕີແມັດ, ໜ້າທາງກວ້າງ 7-9 ແມັດ.
‎ການເຄື່ອນໄຫວ ຄັ້ງນີ້ໄດ້ລົງ ຕິດຕາມເບິ່ງຈຸດທີ່ໂຄງການ ກໍ່ສ້າງສໍາເລັດແລ້ວ ແລະ ຈຸດທີ່ກໍາລັງກໍ່ສ້າງຂອງໂຄງການກໍ່ສ້າງ  ແລະ ບູລະນະຮັກສາທາງຫຼວງແຫ່ງຊາດ  2E ( ແຕ່ເມືອງໄຊ ແຂວງ ອຸດົມໄຊ ຫາ ເມືອງຂວາ ແຂວງຜົ້ງສາລີ ມີລວງຍາວທັງໝົດ 99.05 ກມ)  ແລະ ເສັ້ນທາງ ຫຼວງແຫ່ງຊາດ 2W (ເມືອງໄຊ ຫາ ເມືອງປາກແບງ ລວງຍາວ 136 ກມ ) ໃນນີ້ເສັ້ນທາງ 2W ເຊິ່ງແບ່ງເປັນ 3 ສັນຍາ.
‎ສັນຍາ 1 ເລີ່ມແຕ່ ກມ 00+000- ກມ 68+400 ຄວາມຄືບໜ້າ ປະຕິບັດໄດ້ 33%,‎ສັນຍາທີ 2 ເລີ່ມແຕ່ ກມ 68+400 – 121 ຄວາມຄືບໜ້າປະຕິບັດໄດ້ 23.30% ‎ສັນຍາ 3 ຄວາມຄືບໜ້າ 4%.

‎ສໍາລັບ ໂຄງການ ກໍ່ສ້າງ ແລະ ບູລະນະຮັກສາທາງຫຼວງແຫ່ງຊາດ  2E ເຊິ່ງແບ່ງເປັນ 3 ສັນຍາ ສາມາດສະຫຼຸບຄວາມຄືບໜ້າຄື: ສັນຍາ  1 ຄວາມຄືບໜ້າປະຕິບັດໄດ້ 8.6%, ສັນຍາ 2 ປະຕິບັດໄດ້ 3.15% ແລະ ສັນຍາທີ3 ການຈັດຕັ້ງປະຕິບັດ ກໍາລັງຢູ່ໃນຂັ້ນຕອນ ສໍາຫຼວດອອກແບບ.  
‎ໂຄງການຟື້ນຟູທາງຫຼວງແຫ່ງຊາດ ໝາຍເລກ2E ແລະ 2W ເປັນໜ້າວຽກໜຶ່ງພາຍໃຕ້ໂຄງການພັດທະນາ ຕາມແລວທາງເສດຖະກິດ ອາຊີຕາເວັນອອກສ່ຽງໃຕ້ ເພື່ອການເຊື່ອມຈອດ-ເຊື່ອມໂຍງ (SEARECC) ໂດຍມີກະຊວງໂຍທາ ທິການ ແລະ ຂົນສົ່ງເປັນເຈົ້າການນໍາພາ ການຈັດຕັ້ງປະຕິບັດໂຄງການ ໂດຍມີບົດບາດພັດທະນາການເຊື່ອມໂຍງ ເຊື່ອມຈອດ ການຂົນສົ່ງ ເປັນຕົ້ນແມ່ນການຂົນສົ່ງທາງບົກ, ການບໍລິການໂລຈິດສຕິກ, ທ່າບົກ ແລະ ບັນດາສູນກະຈາຍ ແລະ ເຕົ້າໂຮມສິນ ຄ້າ. ໂດຍຮູບແບບຂອງສັນຍາ ຊຶ່ງມີໄລຍະສັນຍາ 10 ປີ (ກໍ່ສ້າງ 3 ປີ ແລະ ບຳລຸງຮັກສາ 7 ປີ) ‎ໃນໂອກາດນີ້ການນໍາຂັ້ນສູງຈາກສູນກາງ ແລະ ທ້ອງຖິ່ນກໍ່ໄດ້ເຂົ້າຮ່ວມປະຊຸມປຶກສາຫາລືກ່ຽວກັບຂໍ້ສະດວກ,ຂໍ້ຫຍຸ້ງຍາກໃນການດຳເນີນການກໍ່ສ້າງເພື່ອຮ່ວມກັນຊອກຫາວິທີທາງແກ້ໄຂໂດຍສະເພາະຂອດການປະສານງານໃຫ້ກົມກ່ຽວ,ການຄຸ້ມຄອງການກໍ່ສ້າງໃຫ້ໄດ້ມາດຕະຖານເຕັກນິກ, ການແກ້ໄຂສິ່ງກີດຂວາງ, ການອອກແບບໃຫ້ສອດຄ່ອງ ແລະ ເເທດເໝາະກັບສະພາບຄວາມເປັນຈິ່ງກັບພື້ນທີ່ທ້ອງຖິ່ນ, ‎ຫຼີກຫຼ່ຽງກະທົບຕໍ່ພໍ່ແມ່ປະຊາຊົນແນ່ໃສບັນລຸຜົນສຳເລັດຕາມແຜນຂອງໂຄງການທີ່ໄດ້ກຳນົດໄວ້.